ⵢⵓⵙⵓⴼ ⵉⵙⵙⴰⵔⴳⴻⴱ ⵉⵅⴻⴼ ⵏⵏⴻⵙ ⵉ ⴰⵢⵜⵎⴰⵙ
45
1 ⵅⴻⵏⵏⵉ ⵡⴰⵔ ⵉⵣⴻⵎⵎⴰⵔ ⵄⴰⴷ ⵢⵓⵙⵓⴼ ⴰⴷ ⵉⵟⵟⴻⴼ ⵉⵅⴻⴼ ⵏⵏⴻⵙ ⵣⵣⴰⵜ ⵉ ⵢⵉⵏⵏⵉ ⴰⴽⵉⴷⴻⵙ ⵎⴰⵔⵔⴰ ⵓⵛⴰ ⵉⵍⴰⵖⴰ: “ⵙⵓⴼⴼⵖⴻⵎ ⵎⴰⵔⵔⴰ ⵉⵏⵏⵉ ⴰⴽⵉⴷⵉ ⴷⴰ!” ⵡⴰⵔ ⵉⵇⵇⵉⵎ ⵃⴻⴷ ⴰⴽⵉⴷⴻⵙ ⵍⴰⵎⵉ ⵉⵙⵙⵛⴻⵏ ⵢⵓⵙⵓⴼ ⵉ ⵢⴰⵢⵜⵎⴰⵙ ⵎⵉⵏ ⵉⵄⵏⴰ. 2 ⵍⴻⵅⴷⴻⵏⵏⵉ ⵢⴰⵔⵅⵓ ⵜⵎⵉⵊⵊⴰ ⵏⵏⴻⵙ ⵙ ⵉⵖⵓⵢⵢⴰⵏ, ⴰⵍⴰⵎⵉ ⴷ ⴰⵙ ⵙⵍⵉⵏ ⵉⵎⵉⵚⵔⵉⵢⵢⴻⵏ, ⵓⵛⴰ ⵓⵍⴰ ⴷ ⵜⴰⴷⴷⴰⵔⵜ ⵏ ⴼⵉⵔⵄⵓⵏ ⵜⴻⵙⵍⴰ ⴰⵢⴰ. 3 ⵉⵏⵏⴰ ⵢⵓⵙⵓⴼ ⵉ ⵢⴰⵢⵜⵎⴰⵙ: “ⵏⴻⵛⵛ ⴷ ⵢⵓⵙⵓⴼ! ⵎⴰ ⵉⴷⴷⴰⵔ ⵄⴰⴷ ⴱⴰⴱⴰ?” ⴰⵢⵜⵎⴰⵙ ⵡⴰⵔ ⵣⴻⵎⵎⴰⵔⴻⵏ ⴰⴷ ⵅⴰⵙ ⴷⴷ-ⴰⵔⵔⴻⵏ, ⵎⵉⵏⵣⵉ ⵜⵓⵖⴰ ⴳⴳⵯⴻⴷⴻⵏ ⵣⵣⴰⵢⴻⵙ. 4 ⵉⵏⵏⴰ ⵢⵓⵙⵓⴼ ⵉ ⵢⴰⵢⵜⵎⴰⵙ: “ⵇⴰⵔⵔⴱⴻⵎ-ⴷⴷ ⵍⴻⵅⵅⵓ ⵖⴰⵔⵉ!” ⵓⵛⴰ ⵏⵉⵜⵏⵉ ⵇⴰⵔⵔⴱⴻⵏ ⵖⴰⵔⴻⵙ. ⵉⵏⵏⴰ ⵅⴻⵏⵏⵉ: “ⵏⴻⵛⵛ ⴷ ⵢⵓⵙⵓⴼ ⵓⵎⴰⵜⵡⴻⵎ, ⵡⴻⵏⵏⵉ ⵜⴻⵣⵣⴻⵏⵣⴻⵎ ⵉ ⵎⵉⵚⵔⴰ. ■ 5 ⵍⴻⵅⵅⵓ, ⵡⴰⵔ ⴽⴻⵙⵙⵉⵎ ⵙ ⵡⴻⵎⵏⵓⵙ ⵓ ⵡⴰⵔ ⵜ ⵜⵜⴻⵊⵊⵉⵎ ⴰⴷ ⵢⵉⵍⵉ ⴷ ⴰⵅⴻⵢⵢⴻⵇ ⴷⵉ ⵜⵉⵟⵟⴰⵡⵉⵏ ⵏⵡⴻⵎ ⵓⵎⵉ ⴷ ⴰⵢⵉ ⵜⴻⵣⵣⴻⵏⵣⴻⵎ ⴷⴰⵏⵉⵜⴰ ⵉ ⵎⵉⵚⵔⴰ, ⴰⵇⴰ ⴰⵔⴻⴱⴱⵉ ⵉⵙⵙⴻⴽⴽ ⴰⵢⵉ-ⴷⴷ, ⵎⴰⵃⴻⵏⴷ ⴰⴷ ⴽⴻⵏⵏⵉⵡ ⵊⵊⴻⵖ ⵜⴻⴷⴷⴰⵔⴻⵎ. ■ 6 ⴰⵇⴰ ⵍⴻⵅⵅⵓ ⵄⴰⴷ ⵜⵏⴰⵢⴻⵏ ⵏ ⵉⵙⴻⴳⴳⵯⵓⵙⴰ ⵏ ⵍⴰⵥ ⴷⵉ ⵜⴻⵎⵎⵓⵔⵜ ⵓⵛⴰ ⵇⵇⵉⵎ ⵄⴰⴷ ⵅⴻⵎⵙⴰ ⵏ ⵉⵙⴻⴳⴳⵯⵓⵙⴰ ⵡⴰⵔ ⴷⴰⵢⵙⴻⵏ ⵉⵜⵜⵉⵍⵉ ⵜⵢⴰⵔⵣⴰ ⵏⵉⵖ ⵜⴰⵎⴻⵢⵔⴰ. 7 ⵎⴰⵛⴰ ⴰⵔⴻⴱⴱⵉ ⵉⵙⵙⴻⴽⴽ ⴰⵢⵉ-ⴷⴷ ⵣⵣⴰⵜⵡⴻⵎ, ⵃⵉⵎⴰ ⴰⴷ ⴰⵡⴻⵎ ⴳⴳⴻⵖ ⵎⵉⵏ ⵉⵇⵇⵉⵎⴻⵏ ⵅ ⵜⴻⵎⵎⵓⵔⵜ ⵓ ⵃⵉⵎⴰ ⴰⴷ ⵃⴹⵉⵖ ⵜⵓⴷⴰⵔⵜ ⵏⵡⴻⵎ ⵉ ⵢⵉⵊⵊ ⵏ ⵓⵙⴻⵏⵊⴻⵎ ⵉⵎⵖⴰⵔ. ■ 8 ⵅⴻⵏⵏⵉ ⵍⴻⵅⵅⵓ, ⴽⴻⵏⵏⵉⵡ ⵡⴰⵔ ⴷ ⴰⵢⵉ ⴷⴷ-ⵜⴻⵙⵙⴻⴽⴽⴻⵎ ⵛⴰ ⴷⴰ, ⵎⴰⵛⴰ ⴰⵔⴻⴱⴱⵉ ⴷ ⵡⴻⵏⵏⵉ ⴷ ⴰⵢⵉ ⵉⴳⴳⵉⵏ ⴷ ⴱⴰⴱⴰⵙ ⵉ ⴼⵉⵔⵄⵓⵏ ⴷ ⵙⵉⴷⵉ ⵅ ⵎⴰⵔⵔⴰ ⵜⴰⴷⴷⴰⵔⵜ ⵏⵏⴻⵙ ⴷ ⵍⵃⴰⴽⴻⵎ ⵅ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ. 9 ⵇⴻⴵⵇⴻⵎ ⴷⴻⵖⵢⴰ, ⵙⴳⴻⵄⵄⴷⴻⵎ ⵖⴰⵔ ⴱⴰⴱⴰ, ⵉⵏⵉⵎ ⴰⵙ: ‘ⴰⵎⵎⵓ ⵉ ⵉⵇⵇⴰⵔ ⵎⵎⵉⵛ ⵢⵓⵙⵓⴼ: ⴰⵔⴻⴱⴱⵉ ⵉⴳⴳⴰ ⴰⵢⵉ ⴷ ⵙⵉⴷⵉ ⵏ ⵎⴰⵔⵔⴰ ⵎⵉⵚⵔⴰ. ⴰⵔⴰⵃ-ⴷⴷ ⵖⴰⵔⵉ, ⵡⴰⵔ ⵜⵜⴻⵄⴳⵉⵣ. 10 ⴰⴷ ⵜⵣⴻⴷⵖⴻⴷ ⴷⵉ ⵜⴻⵎⵎⵓⵔⵜ ⵏ ⵊⵓⵛⴰⵏ, ⴰⴷ ⵜⵉⵍⵉⴷ ⵣⵣⴰⵜⵉ, ⵛⴻⴽ ⴷ ⵉⵃⴻⵏⵊⵉⵔⴻⵏ ⵏⵏⴻⵛ, ⴷ ⵉⵃⴻⵏⵊⵉⵔⴻⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵛ, ⴷ ⵡⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⵓⵍⴰ ⴷ ⵎⴰⵔⵔⴰ ⵎⵉⵏ ⵖⴰⵔⴻⴽ. 11 ⴰⴷ ⴰⵛ ⴳⴳⴻⵖ ⴰⵔⵣⴻⵇ ⴷⵉⵏ, ⵎⵉⵏⵣⵉ ⴰⴷ ⴷⴷ-ⴰⵙⴻⵏ ⵄⴰⴷ ⵅⴻⵎⵙⴰ ⵏ ⵉⵙⴻⴳⴳⵯⵓⵙⴰ ⵏ ⵍⴰⵥ, ⵃⵉⵎⴰ ⵡⴰⵔ ⵜᵉⵜⵜⴻⴹⵄⵉⴼⴻⴷ, ⵛⴻⴽ ⵍⵍⴰ, ⵜⴰⴷⴷⴰⵔⵜ ⵏⵏⴻⵛ ⵍⵍⴰ, ⵓⵍⴰ ⴷ ⵎⴰⵔⵔⴰ ⵎⵉⵏ ⵖⴰⵔⴻⴽ ⵍⵍⴰ! 12 ⵅⵣⴰⵔ, ⵜⵉⵟⵟⴰⵡⵉⵏ ⵏⵡⴻⵎ ⵥⵔⵉⵏⵜ, ⵓⵍⴰ ⴷ ⵜⵉⵟⵟⴰⵡⵉⵏ ⵏ ⵓⵎⴰ ⴱⵉⵏⵢⴰⵎⵉⵏ, ⴰⵇⴰ ⴷ ⵏⴻⵛⵛ ⵉ ⴽⵉⴷⵡⴻⵎ ⵉⵙⵙⴰⵡⴰⵍⴻⵏ. 13 ⵄⴻⵍⵎⴻⵎ ⵉ ⴱⴰⴱⴰ ⵅ ⵎⴰⵔⵔⴰ ⴰⵄⵓⴵⵉ ⵉⵏⵓ ⴷⵉ ⵎⵉⵚⵔⴰ ⵓ ⵅ ⵎⴰⵔⵔⴰ ⵎⵉⵏ ⵜⴻⵥⵔⵉⵎ. ⵇⴻⴵⵇⴻⵎ ⴷⴻⵖⵢⴰ, ⵜⵉⵡⵢⴻⵎ-ⴷⴷ ⴱⴰⴱⴰ ⴷⴰ.” ■ 14 ⵓⵛⴰ ⵉⵏⴳⴻⵣ ⵅ ⵢⵉⵔⵉ ⵏ ⴱⵉⵏⵢⴰⵎⵉⵏ ⵓⵎⴰⵙ, ⵉⵔⵓ, ⵓⵛⴰ ⴱⵉⵏⵢⴰⵎⵉⵏ ⵉⵔⵓ ⵅ ⵢⵉⵔⵉ ⵏⵏⴻⵙ. 15 ⵉⵙⵙⵓⴷⴻⵎ ⵎⴰⵔⵔⴰ ⴰⵢⵜⵎⴰⵙ, ⵉⵔⵓ ⵅⴰⵙⴻⵏ. ⴰⵡⴰⵔⵏⵉ ⵎⴰⵏ ⴰⵢⴰ ⵙⵙⵉⵡⵍⴻⵏ ⴰⴽⵉⴷⴻⵙ ⴰⵢⵜⵎⴰⵙ. 16 ⵍⴰⵎⵉ ⵜⴻⵙⵍⴰ ⵜⴰⴷⴷⴰⵔⵜ ⵏ ⴼⵉⵔⵄⵓⵏ ⵍⴻⵅⴱⴰⵔ-ⴰ, ⵏⵏⴰⵏ: “ⴰⵢⵜⵎⴰⵙ ⵏ ⵢⵓⵙⵓⴼ ⵓⵙⵉⵏ-ⴷⴷ!”. ⵜⵓⵖⴰ-ⵜ ⴷ ⵍⴻⵅⴱⴰⵔ ⴰⵚⴻⴱⵃⴰⵏ ⴷⵉ ⵜⵉⵟⵟⴰⵡⵉⵏ ⵏ ⴼⵉⵔⵄⵓⵏ ⴷ ⵉⵎⵙⴻⵅⵅⴰⵔⴻⵏ ⵏⵏⴻⵙ. 17 ⵉⵏⵏⴰ ⴼⵉⵔⵄⵓⵏ ⵉ ⵢⵓⵙⵓⴼ: “ⵉⵏⵉ ⵉ ⴰⵢⵜⵎⴰⵛ: ‘ⴳⴳⴻⵎ ⴰⵢⴰ: ⵙⴰⵔⴱⵓⵎ ⵣⵡⴰⵢⴻⵍ ⵏⵡⴻⵎ ⵓⵛⴰ ⴳⴻⵄⵄⴷⴻⵎ, ⵔⵓⵃⴻⵎ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ. 18 ⴽⵙⵉⵎ-ⴷⴷ ⴱⴰⴱⴰⵜⵡⴻⵎ ⴷ ⵔⴰⴵ ⵏⵡⴻⵎ, ⵜⵓⵙⵉⵎ-ⴷⴷ ⵖⴰⵔⵉ. ⴰⵇⴰ ⴰⴷ ⴰⵡⴻⵎ ⵡⵛⴻⵖ ⵍⴻⵎⵍⵉⵃ ⵏ ⵜⴻⵎⵎⵓⵔⵜ ⵏ ⵎⵉⵚⵔⴰ ⵓⵛⴰ ⴰⴷ ⵜⴻⵛⵛⴻⵎ ⵣⵉ ⵎⵉⵏ ⵉⵛⵏⴰⵏ ⵏ ⵜⴻⵎⵎⵓⵔⵜ. □ 19 ⴰⵇⴰ ⵜⵜⵡⴰⴳⴳⴻⵏⵜ ⵜⵉⵡⴻⵚⵚⴰ ⴷⵉ ⵟⵟⵡⴻⵄ ⵏⵏⴻⴽ. ⴳⴳⴻⵎ ⴰⵢⴰ: ⴽⵙⵉⵎ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵉⴽⴰⵔⵔⵓⵜⴻⵏ ⵉ ⵉⵃⴻⵏⵊⵉⵔⴻⵏ ⵏⵡⴻⵎ ⵓ ⵉ ⵜⴻⵎⵖⴰⵔⵉⵏ ⵏⵡⴻⵎ, ⴰⵡⵢⴻⵎ-ⴷⴷ ⵣⵣⴰⵢⴻⵙ ⴱⴰⴱⴰⵜⵡⴻⵎ ⵓⵛⴰ ⴰⵙⴻⵎ-ⴷⴷ ⴷⴰ. 20 ⵡⴰⵔ ⵜⵜⴻⵊⵊⵉⵎ ⵜⵉⵟⵟⴰⵡⵉⵏ ⵏⵡⴻⵎ ⴰⴷ ⵙⵙⵃⵉⵙⵙⴼⴻⵏⵜ ⵉ ⵍⵇⴻⵛⵛ ⵏⵡⴻⵎ, ⵎⵉⵏⵣⵉ ⵍⴻⵎⵍⵉⵃ ⵏ ⵜⴻⵎⵎⵓⵔⵜ ⵏ ⵎⵉⵚⵔⴰ ⴰⴷ ⵢⵉⵍⵉ ⵏⵡⴻⵎ.’ ”
21 ⵓⵛⴰ ⴰⵎⵎⵓ ⵉ ⴳⴳⵉⵏ ⴰⵢⵜ ⵏ ⵉⵙⵔⴰⵉⵍ. ⵉⵡⵛⴰ ⴰⵙⴻⵏ ⵢⵓⵙⵓⴼ ⵉⴽⴰⵔⵔⵓⵜⴻⵏ ⵅ ⵍⵓⵎⵓⵔ ⵏ ⴼⵉⵔⵄⵓⵏ ⵓⵛⴰ ⵉⵡⵛⴰ ⴰⵙⴻⵏ ⵄⴰⵡⴻⴷ ⵎⴰⵛⵛⴰ ⵉ ⵡⴻⴱⵔⵉⴷ. 22 ⵉⵡⵛⴰ ⵉ ⴽⵓⵍ ⵉⵊⵊ ⵣⵣⴰⵢⵙⴻⵏ ⵡⴻⵃⵃⴷⴻⵙ ⴰⵔⵔⵓⴹ ⵏ ⵊⴷⵉⴷ, ⵎⴰⵛⴰ ⵉ ⴱⵉⵏⵢⴰⵎⵉⵏ ⵉⵡⵛⴰ ⴰⵙ ⵜⴻⵍⵜ-ⵎⵢⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⴷ ⵅⴻⵎⵙⴰ ⵏ ⵡⴰⵔⵔⵓⴹ ⴷ ⵊⴷⵉⴷ. 23 ⵓ ⴰⵎⵎⵓ ⵄⴰⵡⴻⴷ ⵉⵙⵙⴻⴽⴽ ⵉ ⴱⴰⴱⴰⵙ ⵄⴻⵛⵔⴰ ⵏ ⵢⴻⵖⵢⴰⵍ ⵛⵛⵓⵔⴻⵏ ⵙ ⵎⵉⵏ ⵉⴼⴰⵔⵣⴻⵏ ⵏ ⵎⵉⵚⵔⴰ ⵓ ⵄⴻⵛⵔⴰ ⵏ ⵜⴻⵖⵢⴰⵍ ⵛⵛⵓⵔⴻⵏⵜ ⵙ ⵉⵎⴻⵏⴷⵉ ⴷ ⵡⴻⵖⵔⵓⵎ ⴷ ⵎⴰⵛⵛⴰ ⵉ ⴱⴰⴱⴰⵙ ⵓⵎⵉ ⵖⴰ ⵢⵉⵍⵉ ⵏⴻⵜⵜⴰ ⴷⴻⴳ ⵡⴻⴱⵔⵉⴷ. 24 ⵉⵇⴻⴱⴱⴻⴹ ⴰⵢⵜⵎⴰⵙ ⵓⵛⴰ ⵔⵓⵃⴻⵏ. ⵉⵏⵏⴰ ⴰⵙⴻⵏ ⵏⴻⵜⵜⴰ: “ⵡⴰⵔ ⵜⵜⵎⴻⵏⵖⵉⵎ ⵛⴰ ⴷⴻⴳ ⵡⴻⴱⵔⵉⴷ.” 25 ⴳⴻⵄⵄⴷⴻⵏ ⵣⵉ ⵎⵉⵚⵔⴰ, ⵉⵡⴹⴻⵏ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ ⵖⴰⵔ ⵢⴰⵄⵇⵓⴱ, ⴱⴰⴱⴰⵜⵙⴻⵏ. 26 ⵡⵛⵉⵏ ⴰⵙ ⵍⴻⵅⴱⴰⵔ, ⵏⵏⴰⵏ: “ⵢⵓⵙⵓⴼ ⴰⵇⴰ ⵉⴷⴷⴰⵔ ⵄⴰⴷ, ⵡⴰⵀ, ⴰⵇⴰ-ⵜ ⴷ ⵍⵃⴰⴽⴻⵎ ⵏ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ!” ⵅⴻⵏⵏⵉ ⵉⵙⵅⴻⴼ ⵡⵓⵍ ⵏⵏⴻⵙ, ⵎⵉⵏⵣⵉ ⵡⴰⵔ ⵜⴻⵏ ⵢⵓⵎⵉⵏ ⵛⴰ. 27 ⵓⵎⵉ ⴷ ⴰⵙ ⵄⴰⵡⴷⴻⵏ ⵎⴰⵔⵔⴰ ⴰⵡⴰⵍⴻⵏ ⵏ ⵢⵓⵙⵓⴼ ⵉⵏⵏⵉ ⴷ ⴰⵙⴻⵏ ⵉⵏⵏⴰ ⵓ ⵍⴰⵎⵉ ⵉⵥⵔⴰ ⵉⴽⴰⵔⵔⵓⵜⴻⵏ ⵉⵏⵏⵉ ⴷⴷ-ⵉⵙⵙⴻⴽⴽ ⵢⵓⵙⵓⴼ ⵃⵉⵎⴰ ⴰⴷ ⵜ ⴰⵡⵢⴻⵏ, ⵉⵄⵇⴻⴱ-ⴷⴷ ⴱⵓⵃⴱⴻⵍ ⵏ ⴱⴰⴱⴰⵜⵙⴻⵏ ⵢⴰⵄⵇⵓⴱ. 28 ⵓⵛⴰ ⵉⵏⵏⴰ ⵉⵙⵔⴰⵉⵍ: “ⴽⴼⴰ! ⵢⵓⵙⵓⴼ ⵎⵎⵉ ⴰⵇⴰ ⵉⴷⴷⴰⵔ! ⴰⴷ ⵔⴰⵃⴻⵖ ⵓⵛⴰ ⴰⴷ ⵜ ⵥⴰⵔⵖ ⵇⴱⴻⵍ ⵉ ⵖⴰ ⵎⵎⵜⴻⵖ!”