ⵍⴻⵎⵍⴰⵛ ⵏ ⵢⴰⵄⵇⵓⴱ ⴰⴽ-ⴷ ⵍⵉⵢⴰ ⴷ ⵔⴰⵃⵉⵍ
29
1 ⵉⴽⵙⵉ ⵢⴰⵄⵇⵓⴱ ⴷⴻⴳ ⵉⴹⴰⵔⴻⵏ ⵏⵏⴻⵙ, ⵉⵔⵓⵃ ⵖⴰⵔ ⵜⴻⵎⵎⵓⵔⵜ ⵏ ⴰⵢⵜ ⵏ ⵛⵛⴰⵔⵇ. 2 ⵉⵅⵣⴰⵔ ⵓⵛⴰ ⵉⵥⵔⴰ ⵉⵊⵊ ⵏ ⵡⴰⵏⵓ ⴷⴻⴳ ⵉⵢⵢⴰⵔ ⵓ ⵜⵓⵖⴰ ⴷⵉⵏ ⵜⵍⴰⵜⴰ ⵏ ⵜⵃⵉⵎⵔⵉⵡⵉⵏ ⵏ ⵡⵓⴵⵉ ⵊⵏⵉⵏⵜ ⵣⵣⴰⵜⴻⵙ, ⵎⵉⵏⵣⵉ ⵣⴻⴳ ⵡⴰⵏⵓ ⵏⵏⵉ ⵡⴰⵔⵔⴷⴻⵏ ⵏⵉⵜⵏⵉ ⵜⵉⵃⵉⵎⵔⵉⵡⵉⵏ. ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵥⵔⵓ ⵅ ⵓⵇⴻⵎⵎⵓⵎ ⵏ ⵡⴰⵏⵓ. 3 ⵙⵙⵎⵓⵏⴻⵏ ⴷⵉⵏ ⵎⴰⵔⵔⴰ ⵜⵉⵃⵉⵎⵔⵉⵡⵉⵏ. ⵅⴰⵙ ⵓⵛⴰ ⴽⴽⵙⴻⵏ ⴰⵥⵔⵓ ⵅ ⵓⵇⴻⵎⵎⵓⵎ ⵏ ⵡⴰⵏⵓ ⵓⵛⴰ ⵡⴰⵔⴷⴻⵏ ⵓⴵⵉ. ⴰⵡⴰⵔⵏⵉ ⴰⵙ ⴰⵔⵔⵉⵏ ⴰⵥⵔⵓ ⵄⴰⵡⴻⴷ ⵅ ⵓⵇⴻⵎⵎⵓⵎ ⵏ ⵡⴰⵏⵓ. 4 ⵉⵏⵏⴰ ⴰⵙⴻⵏ ⵢⴰⵄⵇⵓⴱ: “ⴰⵢⵜⵎⴰ ⵉⵏⵓ, ⵎⴰⵏⵉⵙ ⴽⴻⵏⵏⵉⵡ?” ⵏⵉⵜⵏⵉ ⴰⵔⵔⵉⵏ-ⴷⴷ: “ⵣⵉ ⵃⴰⵔⴰⵏ ⵉ ⵏⴻⴵⴰ.” 5 ⵏⴻⵜⵜⴰ ⵉⵏⵏⴰ ⴰⵙⴻⵏ: “ⵎⴰ ⵜⴻⵙⵙⵏⴻⵎ ⵍⴰⴱⴰⵏ, ⵎⵎⵉⵙ ⵏ ⵏⴰⵃⵓⵔ?” ⵏⵉⵜⵏⵉ ⴰⵔⵔⵉⵏ-ⴷⴷ: “ⵡⴰⵀ, ⵏⴻⵙⵙⴻⵏ ⵉ-ⵜ.” 6 ⵉⵏⵏⴰ ⴰⵙⴻⵏ ⵏⴻⵜⵜⴰ: “ⵎⴰⵎⵎⴻⵛ ⵉⴵⴰ?” ⴰⵔⵔⵉⵏ-ⴷⴷ: “ⴰⵇⴰ-ⵜ ⵎⵍⵉⵃ, ⴰⵇⴰ ⴷⴰ ⵢⴻⴵⵉⵙ ⵔⴰⵃⵉⵍ ⵜⵓⵙⴰ-ⴷⴷ ⴰⴽ-ⴷ ⵡⵓⴵⵉ.” 7 ⵉⵏⵏⴰ ⴰⵙ: “ⴰⵇⴰ ⴷⴰ ⴰⵣⵉⵍ ⵄⴰⴷ ⵉⵎⵖⴰⵔ, ⵡⴰⵔ ⵢⴻⴵⵉ ⴱⵓ ⵍⵡⴻⵇⵜ ⵃⵉⵎⴰ ⴰⴷ ⵏⴻⵏⴷⴻⵀ ⵍⴻⴱⵀⴰⵢⴻⵎ. ⵡⴰⵔⴷⴻⵎ ⵓⴵⵉ ⵓⵛⴰ ⵔⵓⵃⴻⵎ, ⵎⴰⵃⴻⵏⴷ ⴰⴷ ⵜⴻⵏ ⵜⴰⵔⴻⵡⵙⴻⵎ.” 8 ⵏⵉⵜⵏⵉ ⴰⵔⵔⵉⵏ-ⴷⴷ: “ⵡⴰⵔ ⵏⵣⴻⵎⵎⴰⵔ ⴰⴷ ⵜ ⵏⴻⴳⴳ ⴰⵍ ⴷⴷ ⵖⴰ ⵎⵓⵏⴻⵏⵜ ⵎⴰⵔⵔⴰ ⵜⵉⵃⵉⵎⵔⵉⵡⵉⵏ. ⵅⴻⵏⵏⵉ ⴰⴷ ⵙⵙⴻⵃⵍⵓⴵⴷⴻⵏ ⴰⵥⵔⵓ ⵅ ⵓⵇⴻⵎⵎⵓⵎ ⵏ ⵡⴰⵏⵓ, ⵃⵉⵎⴰ ⴰⴷ ⵏⵡⴰⵔⴻⴷ ⵓⴵⵉ.” 9 ⵍⴰⵎⵉ ⵜⵓⵖⴰ ⵄⴰⴷ ⵉⵙⵙⴰⵡⴰⵍ ⴰⴽⵉⴷⵙⴻⵏ, ⵜⵓⵙⴰ-ⴷⴷ ⵔⴰⵃⵉⵍ ⵙ ⵡⵓⴵⵉ ⵏ ⴱⴰⴱⴰⵙ, ⵎⵉⵏⵣⵉ ⵏⴻⵜⵜⴰⵜ ⵜⵓⵖⴰ-ⵜⵜ ⴷ ⵜⴰⵎⴻⴽⵙⴰⵡⵜ. 10 ⵍⴰⵎⵉ ⵉⵥⵔⴰ ⵢⴰⵄⵇⵓⴱ ⵔⴰⵃⵉⵍ, ⵢⴻⴵⵉⵙ ⵏ ⵍⴰⴱⴰⵏ, ⵓⵎⴰⵙ ⵏ ⵢⴻⵎⵎⴰⵙ, ⴰⴽ-ⴷ ⵡⵓⴵⵉ ⵏ ⵍⴰⴱⴰⵏ, ⵓⵎⴰⵙ ⵏ ⵢⴻⵎⵎⴰⵙ, ⵉⵅⴻⵛⵛ-ⴷⴷ ⵢⴰⵄⵇⵓⴱ ⵓⵛⴰ ⵉⵙⵙⴻⵃⵍⵓⴵⴻⴷ ⴰⵥⵔⵓ ⵅ ⵓⵇⴻⵎⵎⵓⵎ ⵏ ⵡⴰⵏⵓ, ⵉⵡⴰⵔⴷ ⵓⴵⵉ ⵏ ⵍⴰⴱⴰⵏ, ⵓⵎⴰⵙ ⵏ ⵢⴻⵎⵎⴰⵙ. 11 ⵉⵙⵙⵓⴷⴻⵎ ⵢⴰⵄⵇⵓⴱ ⵔⴰⵃⵉⵍ, ⵉⵙⵙⴳⴻⵄⵄⴻⴷ ⵜⵎⵉⵊⵊⴰ ⵏⵏⴻⵙ ⵓⵛⴰ ⵉⵙⵖⵓⵢ. 12 ⵉⵏⵏⴰ ⵢⴰⵄⵇⵓⴱ ⵉ ⵔⴰⵃⵉⵍ ⴰⵇⴰ ⵏⴻⵜⵜⴰ ⵣⵉ ⵍⴰⴵ ⵏ ⴱⴰⴱⴰⵙ ⵉ ⵉⴵⴰ, ⵓⵍⴰ ⴷ ⵎⵎⵉⵙ ⵏ ⵔⵉⴼⵇⴰ. ⵓⵛⴰ ⵏⴻⵜⵜⴰⵜ ⵜⵓⵣⵣⴻⵍ, ⵜⵅⴻⴱⴱⴰⵔ ⴱⴰⴱⴰⵙ.
13 ⵓⵎⵉ ⵉⵙⵍⴰ ⵍⴰⴱⴰⵏ ⵍⴻⵅⴱⴰⵔ ⵅ ⵢⴰⵄⵇⵓⴱ, ⵎⵎⵉⵙ ⵏ ⵓⵍⵜⵎⴰⵙ, ⵢⵓⵣⵣⴻⵍ ⴰⴷ ⵜ ⵉⵍⵇⴰ ⵓⵛⴰ ⵉⴷⴰⵔⵔⴻⵄ ⴰⵙ, ⵉⵙⵙⵓⴷⴻⵎ ⵉ-ⵜ, ⵉⵏⴷⴻⵀ ⵉ-ⵜ ⵖⴰⵔ ⵜⴰⴷⴷⴰⵔⵜ ⵏⵏⴻⵙ. ⵓⵛⴰ ⵏⴻⵜⵜⴰ ⵉⵄⴰⵡⴻⴷ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ ⵉ ⵍⴰⴱⴰⵏ. 14 ⵉⵏⵏⴰ ⴰⵙ ⵍⴰⴱⴰⵏ: “ⴷ ⵜⵉⴷⴻⵜⵜ ⵛⴻⴽ ⴷ ⵉⵖⴻⵙ ⵉⵏⵓ ⴷ ⴰⵢⵙⵓⵎ ⵉⵏⵓ ⵉ ⵜⴻⴵⵉⴷ.” ⵓⵛⴰ ⵉⵇⵇⵉⵎ ⵖⴰⵔⴻⵙ ⵍⵇⴻⴷⴷ ⵏ ⵉⵊⵊ ⵏ ⵓⵢⵓⵔ ⵉⴽⵎⴻⵍ. 15 ⵍⴻⵅⴷⴻⵏⵏⵉ ⵉⵏⵏⴰ ⵍⴰⴱⴰⵏ ⵉ ⵢⴰⵄⵇⵓⴱ: “ⵓⵎⵉ ⵛⴻⴽ ⴷ ⵓⵎⴰ ⵉ ⵜⴻⴵⵉⴷ, ⵎⴰ ⴰⴷ ⵖⴰⵔⵉ ⵜⵅⴻⴷⵎⴻⴷ ⴱⴰⵟⴻⵍ? ⵉⵏⵉ ⴰⵢⵉ ⵎⵉⵏ ⵉ ⵖⴰ ⵜⵉⵍⵉ ⵍⵎⵓⵏⴻⵜ ⵏⵏⴻⵛ?” 16 ⵍⴰⴱⴰⵏ ⵖⴰⵔⴻⵙ ⵜⵏⴰⵢⴻⵏ ⵏ ⵢⴻⵙⵙⵉⵙ. ⵉⵙⴻⵎ ⵏ ⵜⵎⴻⵏⵣⵓⵜ ⴷ ⵍⵉⵢⴰ ⵓ ⵉⵙⴻⵎ ⵏ ⵜⵎⴰⵥⵓⵥⵜ, ⵔⴰⵃⵉⵍ. 17 ⵜⵉⵟⵟⴰⵡⵉⵏ ⵏ ⵍⵉⵢⴰ ⵜⵓⵖⴰ ⴽⴻⵛⵄⴻⵏⵜ, ⵎⴰⵛⴰ ⵔⴰⵃⵉⵍ ⵜⵓⵖⴰ ⴷⴰⵢⴻⵙ ⴰⵥⵍⵉ ⵏ ⵡⴰⴷⴷⵓⴷ ⵓ ⵏ ⵍⵅⴻⵣⵔⴰⵜ. 18 ⵢⴰⵄⵇⵓⴱ ⵉⵅⵙ ⵔⴰⵃⵉⵍ. ⵉⵏⵏⴰ: “ⵏⴻⵛⵛ ⴰⴷ ⵖⴰⵔⴻⴽ ⵅⴻⴷⵎⴻⵖ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵅ ⵔⴰⵃⵉⵍ ⵢⴻⴵⵉⵙ ⵜⵎⴰⵥⵓⵥⵜ.” ■ 19 ⵍⴰⴱⴰⵏ ⵢⴰⵔⵔⴰ-ⴷⴷ: “ⵅⴰⵔ ⴰⴷ ⴰⵛ ⵜⵜ ⵡⵛⴻⵖ ⵉ ⵛⴻⴽ ⵏⵉⵖ ⴰⴷ ⵜⵜ ⵡⵛⴻⵖ ⵉ ⵡⴻⵔⵢⴰⵣ ⵏⵏⴻⵖⵏⵉ. ⵇⵇⵉⵎ ⴰⴽⵉⴷⵉ.”
20 ⴰⵎⵎⵓ ⵉ ⵉⵅⴷⴻⵎ ⵢⴰⵄⵇⵓⴱ ⵅ ⵔⴰⵃⵉⵍ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵎⴰⵛⴰ ⴹⵀⴰⵔⴻⵏ ⴰⵙ-ⴷⴷ ⵉⵙⴻⴳⴳⵯⵓⵙⴰ ⵏⵏⵉ ⴰⵎⴻⵛⵏⴰⵡ ⵛⴰ ⵏ ⵡⵓⵙⵙⴰⵏ, ⵎⵉⵏⵣⵉ ⵜⵓⵖⴰ ⵉⵜⵜⴻⵅⵙ ⵉ-ⵜⵜ. 21 ⵉⵏⵏⴰ ⵢⴰⵄⵇⵓⴱ ⵉ ⵍⴰⴱⴰⵏ: “ⴻⵡⵛ ⴰⵢⵉ ⵍⴻⵅⵅⵓ ⵜⴰⵎⵖⴰⵔⵜ ⵉⵏⵓ, ⵎⵉⵏⵣⵉ ⴰⵇⴰ ⴽⴻⵎⵎⵍⴻⵏ ⵡⵓⵙⵙⴰⵏ ⵏ ⵍⵎⵉⵊⴰⵍ ⵉⵏⵓ, ⴰⵍⴰⵎⵉ ⵅⴰⵙ ⵉ ⵖⴰ ⵢⴰⴷⴼⴻⵖ.” 22 ⵅⴻⵏⵏⵉ ⵉⵙⵙⵎⵓⵏ ⵍⴰⴱⴰⵏ ⵎⴰⵔⵔⴰ ⵉⵔⵢⴰⵣⴻⵏ ⵏ ⵡⴻⵎⵛⴰⵏ ⵏⵏⵉ, ⵉⴳⴳⴰ ⵓⵔⴰⵔ. 23 ⵖⴰⵔ ⵜⵎⴻⴷⴷⵉⵜ ⵉⴽⵙⵉ ⵢⴻⴵⵉⵙ ⵍⵉⵢⴰ ⵓⵛⴰ ⵉⵙⵙⵉⵡⴻⴹ ⵉ-ⵜⵜ ⵖⴰⵔⴻⵙ ⵓⵛⴰ ⵢⵓⴷⴻⴼ ⵅⴰⵙ ⵢⴰⵄⵇⵓⴱ. 24 ⵉⵡⵛⴰ ⵍⴰⴱⴰⵏ ⵜⴰⵢⵢⴰ ⵏⵏⴻⵙ ⵣⵉⵍⴱⴰ ⵉ ⵢⴻⴵⵉⵙ ⵍⵉⵢⴰ ⴷ ⵜⴰⵢⵢⴰ. 25 ⵜⵉⵡⴻⵛⵛⴰ ⵏⵏⴻⵙ ⵉⵥⵔⴰ ⵢⴰⵄⵇⵓⴱ ⴱⴻⵍⵍⵉ ⴷ ⵍⵉⵢⴰ. ⵅⴻⵏⵏⵉ ⵉⵏⵏⴰ ⵉ ⵍⴰⴱⴰⵏ: “ⵎⵉⵏ ⴷ ⴰⵢⵉ ⵜⴻⴳⴳⵉⴷ? ⵎⴰ ⵡⴰⵔ ⴷ ⴰⵛ ⵅⴷⵉⵎⴻⵖ ⵅ ⵔⴰⵃⵉⵍ? ⵎⴰⵖⴰⵔ ⴷ ⴰⵢⵉ ⵜⵛⴻⵎⵜⴻⴷ?” 26 ⵍⴰⴱⴰⵏ ⵉⵏⵏⴰ: “ⵡⴰⵔ ⵉⵜⵜⵉⵍⵉ ⵓⵢⴰ ⴷⵉ ⵜⴻⵎⵎⵓⵔⵜ ⵏⵏⴻⵖ ⴰⴷ ⵏⴻⵙⵙⵉⵣⵣⴰⵔ ⵜⴰⵎⴰⵥⵓⵥⵜ ⵅ ⵜⵎⴻⵏⵣⵓⵜ. 27 ⴽⴻⵎⵎⴻⵍ ⵙⵙⵉⵎⴰⵏⴰ-ⵢⴰ ⵏ ⵡⵓⵔⴰⵔ ⵏ ⵜⴰ, ⵅⴻⵏⵏⵉ ⴰⴷ ⴰⵛ ⵏⴻⵡⵛ ⵄⴰⵡⴻⴷ ⵜⵉⵏ ⵅ ⵍⵅⴻⴷⵎⴻⵜ ⵉ ⵖⴰ ⵜⴻⴳⴳⴻⴷ ⵙⵙⴰ ⵜⵙⴰⵡⴻⵏⵜ ⴰⴽⵉⴷⵉ ⵄⴰⴷ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵏⵏⴻⵖⵏⵉ.” 28 ⵉⴳⴳⴰ ⵢⴰⵄⵇⵓⴱ ⴰⵎⴻⵏⵏⵉ, ⵉⴽⴻⵎⵎⴻⵍ ⵙⵙⵉⵎⴰⵏⴰ-ⵢⴰ ⵏ ⵡⵓⵔⴰⵔ. ⵅⴻⵏⵏⵉ ⵉⵡⵛⴰ ⴰⵙ ⵢⴻⴵⵉⵙ ⵔⴰⵃⵉⵍ ⴷ ⵜⴰⵎⵖⴰⵔⵜ 29 ⵓⵛⴰ ⵉⵡⵛⴰ ⵍⴰⴱⴰⵏ ⵜⴰⵢⵢⴰ ⵏⵏⴻⵙ ⴱⵉⵍⵀⴰ ⵉ ⵢⴻⴵⵉⵙ ⵔⴰⵃⵉⵍ ⵎⴰⵃⴻⵏⴷ ⴰⴷ ⵜⵉⵍⵉ ⴷ ⵜⴰⵢⵢⴰ ⵏⵏⴻⵙ. 30 ⵢⵓⴷⴻⴼ ⵢⴰⵄⵇⵓⴱ ⵄⴰⵡⴻⴷ ⵅ ⵔⴰⵃⵉⵍ ⵓⵛⴰ ⵉⵅⵙ ⵔⴰⵃⵉⵍ ⵄⴰⴷ ⴽⵜⴰⵔ ⵅ ⵍⵉⵢⴰ. ⵓⵛⴰ ⵉⵙⴻⵅⵅⴰⵔ ⴰⵙ ⵄⴰⵡⴻⴷ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵏⵏⴻⵖⵏⵉ.
ⵉⵃⴻⵏⵊⵉⵔⴻⵏ ⵏ ⵢⴰⵄⵇⵓⴱ
31 ⵓⵎⵉ ⵉⵥⵔⴰ ⵙⵉⴷⵉ ⴱⴻⵍⵍⵉ ⵍⵉⵢⴰ ⵜⵓⵖⴰ ⵜᵉⵜⵜⵡⴰⵙⵙⴻⵃⵇⴰⵔ, ⵢⴰⵔⵣⴻⵎ ⵍⴻⵎⵍⴰⵡⴻⵜ ⵏⵏⴻⵙ, ⵎⴰⵛⴰ ⵔⴰⵃⵉⵍ ⵜⵓⵖⴰ ⵡⴰⵔ ⴷⴷ-ⵜᵉⵜⵜⵉⵔⵓⵡ ⵛⴰ. 32 ⵜⴻⴽⵙⵉ ⵍⵉⵢⴰ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ-ⴷⴷ ⴰⵃⴻⵏⵊⵉⵔ, ⵉⴳⴳⴰ ⴰⵙ ⵔⵓⴱⵉⵏ, ⵎⵉⵏⵣⵉ ⵜⴻⵏⵏⴰ: “ⴰⵇⴰ ⵙⵉⴷⵉ ⵉⵅⵣⴰⵔ ⵖⴰⵔ ⵍⴻⵎⵃⴰⵢⴻⵎ ⵉⵏⵓ. ⵍⴻⵅⵅⵓ ⴰⴷ ⴰⵢⵉ ⵉⵅⵙ ⵡⴻⵔⵢⴰⵣ ⵉⵏⵓ.” □ 33 ⵜⴻⴽⵙⵉ ⵄⴰⵡⴻⴷ ⵙ ⴷⴷⴻⵢⵙⴻⵜ, ⵜⵓⵔⵓⵡ-ⴷⴷ ⴰⵃⴻⵏⵊⵉⵔ, ⵜⴻⵏⵏⴰ: “ⵓⵎⵉ ⵉⵙⵍⴰ ⵙⵉⴷⵉ ⴱⴻⵍⵍⵉ ⵏⴻⵛⵛ ⵜⵜⵡⴰⵙⵙⴻⵃⵇⴰⵔⴻⵖ, ⵉⵡⵛⴰ ⴰⵢⵉ ⵄⴰⵡⴻⴷ ⵡⴰ.” ⵓⵛⴰ ⵜⴻⴳⴳⴰ ⴰⵙ ⵛⵉⵎⵄⵓⵏ. 34 ⵜⴻⴽⵙⵉ ⵄⴰⵡⴻⴷ ⵙ ⴷⴷⴻⵢⵙⴻⵜ, ⵜⵓⵔⵓⵡ-ⴷⴷ ⴰⵃⴻⵏⵊⵉⵔ, ⵜⴻⵏⵏⴰ: “ⵍⴻⵅⵅⵓ ⵜⵡⴰⵍⴰ-ⵢⴰ ⴰⴷ ⵉⵎⵓⵏ ⵡⴻⵔⵢⴰⵣ ⵉⵏⵓ ⴰⴽⵉⴷⵉ, ⵎⵉⵏⵣⵉ ⵓⵔⵡⴻⵖ ⴰⵙ-ⴷⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ.” ⵅ ⵓⵢⴰ ⵏⴻⵜⵜⴰ ⵉⴳⴳⴰ ⴰⵙ ⵍⴰⵡⵉ. 35 ⵜⴻⴽⵙⵉ ⵜⵡⴰⵍⴰ ⵏⵏⴻⵖⵏⵉ ⵙ ⴷⴷⴻⵢⵙⴻⵜ, ⵜⵓⵔⵓⵡ-ⴷⴷ ⴰⵃⴻⵏⵊⵉⵔ ⵓⵛⴰ ⵜⴻⵏⵏⴰ: “ⵜⵡⴰⵍⴰ-ⵢⴰ ⴰⴷ ⵇⴰⴷⵉⵖ ⵙⵉⴷⵉ.” ⵅ ⵓⵢⴰ ⵜⴻⴳⴳⴰ ⴰⵙ ⵢⴰⵀⵓⴷⴰ. ⴰⵡⴰⵔⵏⵉ ⵎⴰⵏ ⴰⵢⴰ ⵜⴻⵙⵙⴱⴻⴷⴷ ⵜⴰⵔⵡⴰ. □