ⵍⵄⴰⵀⴷ ⵏ ⴰⵔⴻⴱⴱⵉ ⴰⴽ-ⴷ ⴰⴱⵔⴰⵎ
15
1 ⴰⵡⴰⵔⵏⵉ ⵎⴰⵏ ⴰⵢⴰ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⴰⴱⵔⴰⵎ ⴷⴻⴳ ⵉⵊⵊ ⵏ ⵍⴻⵡⵃⵉⵢ. ⵉⵏⵏⴰ ⴰⵙ “ⵡⴰⵔ ⵜⵜⴻⴳⴳⵯⴻⴷ ⵛⴰ, ⴰⴱⵔⴰⵎ, ⵏⴻⵛⵛ ⴷ ⴰⵙⴻⵍⵇⵉ ⵉ ⵛⴻⴽ, ⵍⵎⵓⵏⴻⵜ ⵏⵏⴻⵛ ⵜⴻⵎⵖⴰⵔ ⴰⵟⵟⴰⵙ ⴷ ⵏⴻⵛⵛ.” ■ 2 ⵓⵛⴰ ⵉⵏⵏⴰ ⴰⴱⵔⴰⵎ: “ⵙⵉⴷⵉ ⵉⵏⵓ, ⵙⵉⴷⵉ, ⵎⵉⵏ ⴷ ⴰⵢⵉ ⵖⴰ ⵜⴻⵡⵛⴻⴷ, ⵎⴰⵖⴰⵔ ⵏⴻⵛⵛ ⴰⴷ ⵔⴰⵃⴻⵖ ⴰⵎⵎⵓ ⴱⵍⴰ ⵎⵎⵉ ⵓ ⴰⵍⵉⵄⴰⵣⵉⵔ ⵣⵉ ⴷⵉⵎⴰⵛⵇ ⴰⴷ ⵢⵉⵍⵉ ⴰⵎⴻⵛⵏⴰⵡ ⵎⵎⵉ ⵅ ⵡⴰⴳⵍⴰ ⵏ ⵜⴰⴷⴷⴰⵔⵜ ⵉⵏⵓ?” □ 3 ⵉⵏⵏⴰ ⴰⴱⵔⴰⵎ ⵄⴰⵡⴻⴷ: “ⵅⵣⴰⵔ, ⵡⴰⵔ ⴷ ⴰⵢⵉ ⵜⴻⵡⵛⵉⴷ ⵣⵣⴰⵔⵉⵄⴻⵜ, ⵙ ⵓⵢⴻⵏⵏⵉ, ⵡⴻⵏⵏⵉ ⵉⴵⴰⵏ ⴰⵎ ⵎⵎⵉ ⵏ ⵜⴰⴷⴷⴰⵔⵜ ⵉⵏⵓ, ⴰⴷ ⵢⵉⵍⵉ ⴷ ⴰⵡⵔⵉⵜ ⵉⵏⵓ!” □ 4 ⵓⵛⴰ ⵅⵣⴰⵔ, ⴰⵡⴰⵍ ⵏ ⵙⵉⴷⵉ ⵢⵓⵙⴰ-ⴷⴷ ⵖⴰⵔⴻⵙ, ⵉⵏⵏⴰ: “ⵡⴰⵔ ⵛⴻⴽ ⵉⵡⴰⵔⵔⴻⵜ ⵛⴰ ⵡⴰ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⴼⴼⵖⴻⵏ ⵣⵣⴰⵢⴻⴽ ⴰⴷ ⵢⵉⵍⵉ ⴷ ⴰⵡⵔⵉⵜ ⵏⵏⴻⵛ.” 5 ⵉⵙⵙⵓⴼⴼⴻⵖ ⵉ-ⵜ ⵖⴰⵔ ⴱⴰⵔⵔⴰ, ⵉⵏⵏⴰ: “ⵅⵣⴰⵔ ⵖⴰⵔ ⵓⵊⴻⵏⵏⴰ, ⵜⵃⴻⵙⴱⴻⴷ ⵉⵜⵔⴰⵏ, ⵎⴰⵍⴰ ⵜⵣⴻⵎⵎⴰⵔⴻⴷ ⴰⴷ ⵜⴻⵏ ⵜⵃⴻⵙⴱⴻⴷ!” ⵓⵛⴰ ⵉⵏⵏⴰ ⴰⵙ: “ⴰⵎⵎⵓ ⵉ ⵖⴰ ⵜⵉⵍⵉ ⵣⵣⴰⵔⵉⵄⴻⵜ ⵏⵏⴻⵛ!” ■ 6 ⵓⵛⴰ ⵏⴻⵜⵜⴰ ⵢⵓⵎⴻⵏ ⴷⵉ ⵙⵉⴷⵉ ⵓⵛⴰ ⵉⵃⵙⴻⴱ ⴰⵙ ⵜ-ⵉ-ⴷⴷ ⴷ ⵜⴰⵙⴻⴳⴷⴰ. □ ■ 7 ⵉⵏⵏⴰ ⴰⵙ ⵄⴰⵡⴻⴷ: “ⵏⴻⵛⵛ ⴷ ⵙⵉⴷⵉ, ⵡⴻⵏⵏⵉ ⵛⴻⴽ ⴷⴷ-ⵢⵉⵡⵢⴻⵏ ⵣⵉ ⵓⵔ ⵏ ⵉⴽⴰⵍⴷⴰⵏⵉⵢⵢⴻⵏ, ⵃⵉⵎⴰ ⴰⴷ ⴰⵛ ⵡⵛⴻⵖ ⵜⴰⵎⵎⵓⵔⵜ-ⴰ ⴷ ⵍⵡⴰⵔⵜ.” ■ 8 ⵅⴻⵏⵏⵉ ⵏⴻⵜⵜⴰ ⵉⵏⵏⴰ: “ⴰ ⵙⵉⴷⵉ ⵉⵏⵓ, ⵙⵉⴷⵉ, ⵙ ⵎⵉⵏⵣⵉ ⵉ ⵖⴰ ⵙⵙⵏⴻⵖ, ⴱⴻⵍⵍⵉ ⴰⴷ ⵜⵜ ⵡⴰⵔⵜⴻⵖ?” 9 ⵉⵏⵏⴰ ⴰⵙ ⵏⴻⵜⵜⴰ: “ⴰⵡⵉ ⴰⵢⵉ-ⴷⴷ ⵉⵛⵜ ⵏ ⵜⵄⴻⵊⵎⵉⵜ ⵏ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴷ ⵉⵊⵊ ⵏ ⵉⵖⴰⵢⴹ ⵏ ⵜⵍⴰⵜⴰ ⵉⵙⴻⴳⴳⵯⵓⵙⴰ ⴷ ⵉⵊⵊ ⵏ ⵉⵛⴰⵔⵔⵉ ⵏ ⵜⵍⴰⵜⴰ ⵉⵙⴻⴳⴳⵯⵓⵙⴰ ⴷ ⵉⵛⵜ ⵏ ⵜⴻⵊⵍⵉⵍⵍⴻⵃⵜ ⴷ ⵉⵊⵊ ⵏ ⵡⴻⴷⴱⵉⵔ ⴷ ⴰⵎⴻⵥⵢⴰⵏ.” 10 ⵏⴻⵜⵜⴰ ⵢⵉⵡⵉ-ⴷⴷ ⵖⴰⵔⴻⵙ ⵎⴰⵔⵔⴰ ⵎⴰⵏ ⴰⵢⴰ, ⵉⴱⴹⴰ ⵜⴻⵏ ⵅ ⵡⴻⵣⵢⴻⵏ ⵓ ⵉⴳⴳⴰ ⴽⵓⵍ ⴰⵣⵢⴻⵏ ⵇⵉⴱⴰⵍⵜ ⵉ ⵡⴻⵏⵏⴻⵖⵏⵉ, ⵎⴰⵛⴰ ⵡⴰⵔ ⵉⴱⴹⵉ ⵛⴰ ⵉⵊⴹⴰⴹ. ■ 11 ⵀⵡⴰⵏ-ⴷⴷ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵅ ⵉⵎⵓⵔⴹⴰⵙ, ⵎⴰⵛⴰ ⴰⴱⵔⴰⵎ ⵢⵓⵥⵥⴻⵍ ⵅⴰⵙⴻⵏ. 12 ⵖⴰⵔ ⵓⵖⴻⴵⴰⵢ ⵏ ⵜⴼⵓⵛⵜ, ⵉⵎⵙⴰⵔ ⴰⵇⴰ ⵢⵓⵙⴰ ⴰⵙ-ⴷⴷ ⵉ ⴰⴱⵔⴰⵎ ⵉⵊⵊ ⵏ ⵢⵉⴹⴻⵚ ⵢⵓⴵⴻⵖ, ⵓⵛⴰ ⵅⵣⴰⵔ, ⵜⵉⴳⴳⵯⵓⴷⵉ ⴷ ⵜⴰⴵⴻⵙⵜ ⵉⵃⴻⴷⵇⴻⵏ ⵡⴹⴰⵏ-ⴷⴷ ⵅⴰⵙ. 13 ⵅⴻⵏⵏⵉ ⵉⵏⵏⴰ ⵉ ⴰⴱⵔⴰⵎ: “ⵙⵙⴻⵏ ⵙ ⵜⵉⴷⴻⵜⵜ ⴰⵇⴰ ⵣⵣⴰⵔⵉⵄⴻⵜ ⵏⵏⴻⵛ ⴰⴷ ⵜⵉⵍⵉ ⴷ ⵜⴰⴱⴰⵔⵔⴰⵏⴻⵛⵜ ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵉ ⵡⴰⵔ ⵉⴵⵉⵏ ⵏⵏⴻⵙ ⵓⵛⴰ ⴰⴷ ⴰⵙⴻⵏ ⵅⴻⴷⵎⴻⵏ ⴰⵎ ⵉⵙⴻⵎⵖⴰⵏ ⵓ ⵏⵉⵜⵏⵉ ⴰⴷ ⵅⴰⵙⴻⵏ ⴳⴳⴻⵏ ⴰⵖⵉⵍ ⴰⵔⴻⴱⵄⴰ-ⵎⵢⴰ ⵏ ⵉⵙⴻⴳⴳⵯⵓⵙⴰ. ■ 14 ⵎⴰⵛⴰ ⵍⴳⴻⵏⵙ ⵓⵎⵉ ⵖⴰ ⵅⴻⴷⵎⴻⵏ ⴰⵎ ⵉⵙⴻⵎⵖⴰⵏ, ⴰⴷ ⵅⴰⵙⴻⵏ ⵃⴻⴽⵎⴻⵖ ⵄⴰⵡⴻⴷ, ⵓⵛⴰ ⴰⵡⴰⵔⵏⵉ ⵎⴰⵏ ⴰⵢⴰ ⴰⴷ ⴼⴼⵖⴻⵏ ⵙ ⵡⴰⴳⵍⴰ ⵉⵎⵖⴰⵔ. ■ 15 ⴰⴷ ⵜᵉⵜⵜⵡⴰⵙⵙⵎⵓⵏⴻⴷ ⵖⴰⵔ ⵍⴻⵊⴷⵓⴷ ⵏⵏⴻⵛ ⵙ ⵍⴻⵀⵏⴰ ⵓⵛⴰ ⴰⴷ ⵛⴻⴽ ⵏⴻⴹⵍⴻⵏ ⴰⵎ ⵓⵎⴻⵛⵛⴰⵢⴱⵓ ⵉⵡⴻⵇⵇⴰⵔ. ■ 16 ⵊⵊⵉⵍ ⵡⵉⵙⵙ ⴰⵔⴻⴱⵄⴰ ⴰⴷ ⴷⴷ-ⵉⵄⵇⴻⴱ ⴷⴰⵏⵉⵜⴰ, ⵎⵉⵏⵣⵉ ⵍⵇⴻⴷⴷ ⵏ ⵍⵎⵓⵄⵚⵉⵢⵢⴻⵜ ⵏ ⵉⵎⵓⵔⵉⵢⵢⴻⵏ ⵄⴰⴷ ⵡⴰⵔ ⵉⴽⴻⵎⵎⴻⵍ.” ■ 17 ⵍⴰⵎⵉ ⵜⴻⵖⵍⵉ ⵜⴼⵓⵛⵜ ⵓⵛⴰ ⵜⴻⴷⵡⴻⵍ ⴷ ⵜⴰⴵⴻⵙⵜ, ⵜⵓⵖⴰ ⴷⵉⵏ ⴰⴼⴰⵔⵔⴰⵏ ⵉⴷⴷⴻⵅⵅⵏⴻⵏ ⵓ ⵉⵄⴷⵓ ⵉⵊⵊ ⵏ ⵡⴻⵚⴼⴻⴹ ⵏ ⵜⵎⴻⵙⵙⵉ ⵊⴰⵔ ⵉⵣⴻⵢⵏⴰⵏ ⵏⵏⵉ. □ 18 ⴷⴻⴳ ⵡⴰⵙⵙ ⵏⵏⵉ ⵏⵏⵉⵜ ⵉⴳⴳⴰ ⵙⵉⴷⵉ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⴰⴱⵔⴰⵎ, ⵉⵏⵏⴰ: “ⵉ ⵣⵣⴰⵔⵉⵄⴻⵜ ⵏⵏⴻⵛ ⵓⵎⵉ ⵡⵛⵉⵖ ⵜⴰⵎⵎⵓⵔⵜ-ⴰ ⵣⴻⴳ ⵉⵖⵣⴰⵔ ⵏ ⵎⵉⵚⵔⴰ ⴰⵍ ⵉⵖⵣⴰⵔ ⴰⵎⴻⵇⵇⵔⴰⵏ, ⵉⵖⵣⴰⵔ ⵏ ⵍⴼⵓⵔⴰⵟ: ■ 19 ⵜⴰⵎⵎⵓⵔⵜ ⵏ ⵉⵇⵉⵏⵉⵢⵢⴻⵏ, ⵉⵇⴻⵏⵉⵣⵉⵢⵢⴻⵏ, ⵉⵇⴰⴷⵎⵉⵢⵢⴻⵏ, 20 ⵉⵃⵉⵜⵜⵉⵢⵢⴻⵏ, ⵉⴼⵉⵔⵣⵉⵢⵢⴻⵏ, ⵉⵔⴰⴼⴰⵡⵉⵢⵢⴻⵏ, 21 ⵉⵎⵓⵔⵉⵢⵢⴻⵏ, ⴰⵢⵜ ⵏ ⴽⴻⵏⵄⴰⵏ, ⵉⴳⵉⵔⴳⴰⵛⵉⵢⵢⴻⵏ ⴷ ⵉⵢⵉⴱⵓⵙⵉⵢⵢⴻⵏ.”