7
1 ⵉⵏⵏⴰ ⵙⵉⴷⵉ ⵉ ⵏⵓⵃ: “ⴰⴷⴻⴼ ⵛⴻⴽ ⴷ ⵎⴰⵔⵔⴰ ⵍⴰⴵ ⵏ ⵜⴰⴷⴷⴰⵔⵜ ⵏⵏⴻⵛ ⵖⴰⵔ ⵓⵖⴰⵔⵔⴰⴱⵓ, ⵎⵉⵏⵣⵉ ⵥⵔⵉⵖ ⵛⴻⴽ ⴷ ⴰⵎⵙⴻⴳⴳⴻⴷ ⵣⵣⴰⵜ ⵉ ⵡⵓⴷⴻⵎ ⵉⵏⵓ ⴷⵉ ⵊⵊⵉⵍ-ⴰ. ■ 2 ⵣⵉ ⵎⴰⵔⵔⴰ ⵍⴻⴱⵀⴰⵢⴻⵎ ⵏ ⵍⴻⵃⵍⴰⵍ ⴰⴷ ⵖⴰⵔⴻⴽ ⵜⴻⴽⵙⵉⴷ ⵙⴻⴱⵄⴰ, ⵙⴻⴱⵄⴰ, ⴰⵡⵜⴻⵎ ⴷ ⵜⴻⵡⵜⴻⵎⵜ ⵏⵏⴻⵙ, ⵓ ⵣⵉ ⵍⴻⴱⵀⴰⵢⴻⵎ ⵏ ⵍⴻⵃⵔⴰⵎ ⵜⵢⵓⵢⴰ, ⴰⵡⵜⴻⵎ ⴷ ⵜⴻⵡⵜⴻⵎⵜ ⵏⵏⴻⵙ. ■ 3 ⵓⵍⴰ ⵣⴻⴳ ⵉⵊⴹⴰⴹ ⵏ ⵓⵊⴻⵏⵏⴰ ⵉⵜⵜⵅⴻⵚⵚⴰ ⴰⴷ ⵜⴻⴽⵙⵉⴷ ⵙⴻⴱⵄⴰ ⵏ ⵜⵉⵢⵓⵢⴰⵡⵉⵏ, ⴰⵡⵜⴻⵎ ⴷ ⵜⴻⵡⵜⴻⵎⵜ, ⵃⵉⵎⴰ ⴰⴷ ⵜⴻⵃⴹⵉⴷ ⵣⵣⴰⵔⵉⵄⴻⵜ ⵏⵙⴻⵏ ⵉ ⵜⵓⴷⴰⵔⵜ ⴷⵉ ⵎⴰⵔⵔⴰ ⵜⴰⵎⵎⵓⵔⵜ, 4 ⵎⵉⵏⵣⵉ ⵅⵎⵉ ⵖⴰ ⵄⴷⵓⵏ ⵄⴰⴷ ⵙⴻⴱⵄⴰ ⵏ ⵡⵓⵙⵙⴰⵏ ⵏⴻⵛⵛ ⴰⴷ ⵊⵊⴻⵖ ⴰⵏⵥⴰⵔ ⴰⴷ ⵉⵡⵡⴻⵜ ⵅ ⵜⴻⵎⵎⵓⵔⵜ ⴰⵔⴻⴱⵄⵉⵏ ⵏ ⵡⵓⵙⵙⴰⵏ ⴷ ⴰⵔⴻⴱⵄⵉⵏ ⵏ ⴵⵢⴰⵍⵉ, ⵓⵛⴰ ⴰⴷ ⵜⴻⵃⵃⵉⵖ ⵣⴻⴳ ⵡⵓⴷⴻⵎ ⵏ ⵜⴻⵎⵎⵓⵔⵜ ⵎⴰⵔⵔⴰ ⵎⵉⵏ ⵉⴵⴰⵏ, ⴷ ⵎⵉⵏ ⴳⴳⵉⵖ ⵏⴻⵛⵛ.” 5 ⵓⵛⴰ ⵉⴳⴳⴰ ⵏⵓⵃ ⴰⵎ ⵎⴰⵎⵎⴻⵛ ⴽⵓⵍⵛⵉ ⵉ ⵅⴻⴼ ⵜ ⵉⵡⴻⵚⵚⴰ ⵙⵉⴷⵉ. ■ 6 ⵜⵓⵖⴰ ⵏⵓⵃ ⴷ ⵎⵎⵉⵙ ⵏ ⵙⴻⵜⵜⴰ-ⵎⵢⴰ ⵏ ⵉⵙⴻⴳⴳⵯⵓⵙⴰ ⵍⴰⵎⵉ ⴷⴷ-ⵜⵓⵙⴰ ⵙⵙⴻⵃⵍⴻⵜ ⵏ ⵡⴰⵎⴰⵏ ⵅ ⵜⴻⵎⵎⵓⵔⵜ. 7 ⵓⵛⴰ ⵢⵓⴷⴻⴼ ⵏⵓⵃ ⵖⴰⵔ ⵓⵖⴰⵔⵔⴰⴱⵓ ⴷⵉ ⵙⵙⵉⴱⴱⴻⵜ ⵏ ⵡⴰⵎⴰⵏ ⵏ ⵙⵙⴻⵃⵍⴻⵜ, ⵏⴻⵜⵜⴰ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⴻⵎⵖⴰⵔⵜ ⵏⵏⴻⵙ ⴷ ⵜⴻⵎⵖⴰⵔⵉⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴽⵉⴷⴻⵙ. ■ 8 ⵣⵉ ⵍⴻⴱⵀⴰⵢⴻⵎ ⵏ ⵍⴻⵃⵍⴰⵍ ⵓ ⵣⵉ ⵍⴻⴱⵀⴰⵢⴻⵎ ⵏ ⵍⴻⵃⵔⴰⵎ ⵓ ⵣⴻⴳ ⵉⵊⴹⴰⴹ ⵓ ⵣⵉ ⵎⴰⵔⵔⴰ ⵎⵉⵏ ⵉⵜⵜⴱⵓⵄⴻⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ 9 ⵜⵓⴷⴻⴼ ⵜⵢⵓⵢⴰ ⵙ ⵜⵢⵓⵢⴰ ⵖⴰⵔ ⵏⵓⵃ ⵖⴰⵔ ⵓⵖⴰⵔⵔⴰⴱⵓ, ⴰⵡⵜⴻⵎ ⴷ ⵜⴻⵡⵜⴻⵎⵜ ⴰⵎ ⵎⴰⵎⵎⴻⵛ ⵉⵡⴻⵚⵚⴰ ⴰⵔⴻⴱⴱⵉ ⵉ ⵏⵓⵃ.
10 ⴰⵡⴰⵔⵏⵉ ⵙⴻⴱⵄⴰ ⵏ ⵡⵓⵙⵙⴰⵏ ⵉⵎⵙⴰⵔ ⴱⴻⵍⵍⵉ ⴰⵎⴰⵏ ⵏ ⵙⵙⴻⵃⵍⴻⵜ ⵓⵙⵉⵏ-ⴷⴷ ⵅ ⵜⴻⵎⵎⵓⵔⵜ. 11 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵙⴻⵜⵜⴰ-ⵎⵢⴰ ⵣⵉ ⵜⵓⴷⴰⵔⵜ ⵏ ⵏⵓⵃ, ⴷⴻⴳ ⵓⵢⵓⵔ ⵡⵉⵙⵙ ⵜⵏⴰⵢⴻⵏ, ⴷⴻⴳ ⵡⴰⵙⵙ ⵡⵉⵙⵙ ⵙⴱⴻⵄⵟⴰⵛ ⵏ ⵓⵢⵓⵔ ⵏⵏⵉ, ⴷⴻⴳ ⵡⴰⵙⵙ-ⴰ ⵏⵏⵉⵜ, ⵜⵓⵖⴰ ⵙⵙⴻⴼⵢⴻⵏ-ⴷⴷ ⵎⴰⵔⵔⴰ ⵍⵄⵓⵏⵚⴰⵔⴰⵜ ⵏ ⵡⴰⵎⴰⵏ ⵉⵀⴻⵡⵍⴻⵏ ⵓⵛⴰ ⵜⵜⵡⴰⵔⴻⵣⵎⴻⵏⵜ ⵜⴱⵓⵔⵊⴰⵜⵉⵏ ⵏ ⵓⵊⴻⵏⵏⴰ. 12 ⵜⵓⵖⴰ ⴰⵏⵥⴰⵔ ⵉⵇⵇⵉⵎ ⵉⵛⵛⴰⵜ ⵙ ⵊⵊⴻⵀⴷ ⵅ ⵜⴻⵎⵎⵓⵔⵜ ⴰⵔⴻⴱⵄⵉⵏ ⵏ ⵡⵓⵙⵙⴰⵏ ⴷ ⴰⵔⴻⴱⵄⵉⵏ ⵏ ⴵⵢⴰⵍⵉ.
13 ⴷⴻⴳ ⵡⴰⵙⵙ ⵏⵏⵉ ⵏⵏⵉⵜ ⵜⵓⵖⴰ ⵏⵓⵃ ⵢⵓⴷⴻⴼ ⵖⴰⵔ ⵓⵖⴰⵔⵔⴰⴱⵓ ⴰⴽ-ⴷ ⵛⴰⵎ ⴷ ⵃⴰⵎ ⴷ ⵢⴰⴼⴰⵜ, ⴰⵢⵜ ⵏ ⵏⵓⵃ, ⵓⵍⴰ ⴰⴽ-ⴷ ⵜⴰⵎⵖⴰⵔⵜ ⵏ ⵏⵓⵃ ⵓ ⴰⴽ-ⴷ ⵜⵍⴰⵜⴰ ⵏ ⵜⴻⵎⵖⴰⵔⵉⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴽⵉⴷⵙⴻⵏ, 14 ⵏⵉⵜⵏⵉ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⵍⵎⴰⵍ ⵏ ⵍⴻⵅⵍⴰ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⵍⴻⴱⵀⴰⵢⴻⵎ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⵉⵎⵓⴷⴷⴰⵔⴻⵏ ⵏⵏⵉ ⵉⵜⵜⴱⵓⵄⴻⵏ ⵅ ⵜⴻⵎⵎⵓⵔⵜ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⵉⵊⴹⴰⴹ, ⵎⴰⵔⵔⴰ ⴰⵊⴹⵉⴹ, ⴷ ⵎⴰⵔⵔⴰ ⵎⵉⵏ ⵖⴰⵔ ⵉⴵⴰ ⴰⴼⵔⵉⵡⴻⵏ. 15 ⵣⵉ ⵎⴰⵔⵔⴰ ⵉⵎⴻⴷⴷⴰⵔⴻⵏ ⵙ ⴰⵔⵔⵉⵎⴻⵜ ⵏ ⵡⴻⵢⵙⵓⵎ ⵉ ⴷⵉ ⵉⴵⴰ ⴰⵔⵔⵓⵃ ⵏ ⵜⵓⴷⴰⵔⵜ, ⵜⵓⵙⴰ-ⴷⴷ ⵜⵢⵓⵢⴰ ⵙ ⵜⵢⵓⵢⴰ ⵖⴰⵔ ⵏⵓⵃ ⵖⴰⵔ ⵓⵖⴰⵔⵔⴰⴱⵓ. 16 ⵓ ⵣⵉ ⵎⴰⵔⵔⴰ ⵉⵎⴻⴷⴷⴰⵔⴻⵏ ⵙ ⴰⵔⵔⵉⵎⴻⵜ ⵏ ⵡⴻⵢⵙⵓⵎ ⵉ ⴷⴷ-ⵢⵓⵙⵉⵏ, ⵢⵓⴷⴻⴼ ⵉⵊⵊ ⵏ ⵡⴻⵡⵜⴻⵎ ⴷ ⵉⵛⵜ ⵏ ⵜⴻⵡⵜⴻⵎⵜ ⴰⵎ ⵎⴰⵎⵎⴻⵛ ⵜ ⵢⵓⵎⵓⵔ ⴰⵔⴻⴱⴱⵉ, ⵓⵛⴰ ⵉⵇⵇⴻⵏ ⵙⵉⴷⵉ ⵜⴰⵡⵡⴰⵔⵜ ⴰⵡⴰⵔⵏⵉ ⴰⵙ. 17 ⵜⵓⵖⴰ ⵙⵙⴻⵃⵍⴻⵜ ⵅ ⵜⴻⵎⵎⵓⵔⵜ ⴰⵔⴻⴱⵄⵉⵏ ⵏ ⵡⵓⵙⵙⴰⵏ ⵓⵛⴰ ⴳⴻⵄⵄⴷⴻⵏ ⵡⴰⵎⴰⵏ ⵓⵛⴰ ⵙⵙⴳⴻⵄⵄⴷⴻⵏ ⴰⵖⴰⵔⵔⴰⴱⵓ ⴰⵍⴰⵎⵉ ⵉⴳⴻⵄⵄⴻⴷ ⵙⴻⵏⵏⴻⵊ ⵉ ⵡⵓⴷⴻⵎ ⵏ ⵜⴻⵎⵎⵓⵔⵜ. 18 ⴳⴻⵄⵄⴷⴻⵏ ⵡⴰⵎⴰⵏ ⵓⵛⴰ ⵎⵎⴰⵔⴻⵏⵢⴻⵏ-ⴷⴷ ⴰⵟⵟⴰⵙ ⵙⴻⵏⵏⴻⵊ ⵉ ⵜⴻⵎⵎⵓⵔⵜ ⵓⵛⴰ ⵢⵓⵢⵓⵔ ⵓⵖⴰⵔⵔⴰⴱⵓ ⵅ ⵡⵓⴷⴻⵎ ⵏ ⵡⴰⵎⴰⵏ. 19 ⴳⴻⵄⵄⴷⴻⵏ ⴰⵎⴰⵏ ⴰⵟⵟⴰⵙ ⵙ ⵡⴰⵟⵟⴰⵙ, ⴰⵍⴰⵎⵉ ⵎⴰⵔⵔⴰ ⵉⴷⵓⵔⴰⵔ ⵢⵓⵄⵍⴰⵏ ⵉ ⴷⵉⵏ ⵉⴵⴰⵏ ⵙⴰⴷⵓ ⵎⴰⵔⵔⴰ ⴰⵊⴻⵏⵏⴰ, ⴷⴻⵡⵍⴻⵏ ⴷⵍⵉⵏ. 20 ⵓⵍⵢⴻⵏ ⵡⴰⵎⴰⵏ ⵅⴻⵎⵎⴻⵙⵟⴰⵛ ⵏ ⵉⵖⴰⴵⴻⵏ ⵙⴻⵏⵏⴻⵊ ⵉ ⵉⴷⵓⵔⴰⵔ ⵓⵛⴰ ⴷⵍⵉⵏ ⵉⴷⵓⵔⴰⵔ. 21 ⵎⴰⵔⵔⴰ ⵉⵎⴻⴷⴷⴰⵔⴻⵏ ⵙ ⴰⵔⵔⵉⵎⴻⵜ ⵏ ⵡⴻⵢⵙⵓⵎ ⵉ ⵉⵜⵜⴻⵏⵀⴻⵣⵣⴰⵏ ⵅ ⵜⴻⵎⵎⵓⵔⵜ ⵉⴹⵍⴻⵇ ⵉ ⴱⵓⵃⴱⴻⵍ ⵏⵏⴻⵙ, ⵉⵊⴹⴰⴹ ⴷ ⵍⴻⴱⵀⴰⵢⴻⵎ, ⵍⵎⴰⵍ ⵏ ⵍⴻⵅⵍⴰ, ⵎⴰⵔⵔⴰ ⵉⵎⵓⴷⴷⴰⵔⴻⵏ ⵉⵜⵜⴱⵓⵄⴻⵏ, ⵉⵏⵏⵉ ⵉⵜⵜⴱⵓⵄⴻⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵓⵍⴰ ⴷ ⵎⴰⵔⵔⴰ ⵉⵡⴷⴰⵏ. ■ 22 ⵎⴰⵔⵔⴰ ⵎⵉⵏ ⴷⵉ ⵉⴵⴰ ⵍⴻⵄⵡⵉⵏ ⵏ ⴰⵔⵔⵓⵃ ⵏ ⵜⵓⴷⴰⵔⵜ ⵖⴰⵔⵙⴻⵏ ⴷⴻⴳ ⵡⴻⵏⵣⴰⵔⴻⵏ ⵏⵙⴻⵏ ⵣⵉ ⵎⴰⵔⵔⴰ ⵎⵉⵏ ⴷⵉⵏ ⵉⴵⴰⵏ ⵅ ⵍⴱⴰⵔⵔ, ⵉⵎⵎⵓⵜ. 23 ⵓⵛⴰ ⵎⴰⵔⵔⴰ ⵎⵉⵏ ⴷⵉⵏ ⵉⴵⴰⵏ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵉⵜⵜⵡⴰⵎⵃⴰ, ⵣⵉ ⴱⵏⴰⴷⴻⵎ ⴰⵍ ⵍⵎⴰⵍ ⴷ ⵉⵎⵓⴷⴷⴰⵔⴻⵏ ⵉⵏⵏⵉ ⵉⵜⵜⴱⵓⵄⴻⵏ ⴷ ⵉⵊⴹⴰⴹ ⵏ ⵓⵊⴻⵏⵏⴰ. ⵉⵏⴰ ⵜⵜⵡⴰⵜⴻⵃⵃⴰⵏ ⵣⵉ ⵜⴻⵎⵎⵓⵔⵜ. ⵏⵓⵃ ⵡⴻⵃⵃⴷⴻⵙ ⵉ ⵉⵇⵇⵉⵎⴻⵏ ⴷ ⵎⴰⵔⵔⴰ ⵎⵉⵏ ⴽⵉⴷⴻⵙ ⵉ ⵉⴵⴰⵏ ⴷⴻⴳ ⵓⵖⴰⵔⵔⴰⴱⵓ. ■ 24 ⴳⴻⵄⵄⴷⴻⵏ ⵡⴰⵎⴰⵏ ⵅ ⵜⴻⵎⵎⵓⵔⵜ ⵎⵢⴰ ⵓ-ⵅⴻⵎⵙⵉⵏ ⵏ ⵡⵓⵙⵙⴰⵏ.