I tmesmunt di Sardis
3
1 Ari i lmalak n tmesmunt di Sardis! Ammu i iqqar wenni ɣar iǧa sebɛa n arruḥat n AREBBI d sebɛa n itran: Necc ssneɣ řexdayem nnek, aqa ɣarek isem aqa teddared, maca cek temmuted. ■
2 “Ḥḍa, sejhed min iqqimen min igguren ad ittwahellek, maɣar ufiɣ aqa řexdayem nnek war kemmřent ca ɣar AREBBI inu. 3 Ɛqeř mliḥ, mammec xas tesřid u mammec tᵉṭṭfed, ḥḍa uca tub! Maca mařa war tᵉttfiqed, ad ɣarek dd-aseɣ am uceffar, war tessined ca di man tasaɛɛet i xak dd ɣa beddeɣ. ■
4 Maca ɣari ca n ismawen di Sardis, inni war issxemjen ca arruḍ nsen uca nitni ad uyuren akidi s warruḍ acemřař, minzi nitni sdaheǧen t.
5 Wenni i ɣa iɣellben ad yarḍ ammu arruḍ acemřař. Ɛemmarṣ ad kkseɣ isem nnes zeg Wedlis n Tudart, maca ad cehdeɣ x yisem nnes zzat i Baba d lmalakat nnes. ■
6 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.”
I tmesmunt di Filadelfiya
7 Ari i lmalak n tmesmunt di Filadilfiya!
Ammu i iqqar Umqeddas wenni d Tidett d wenni ɣar iǧa tsarut n Dawud d wenni i ɣa yarezmen, xenni uřa d ijjen ad ibelleɛ, d wenni i ɣa ibellɛen, xenni uřa d ijjen ad yarzem: ■
8 “Necc ssneɣ řexdayem nnek. Aqa ggiɣ zzatec ict n tewwart tarzem, tenni uřa d ijj war izemmar ad tt ibelleɛ, minzi jjehd nnek d ameẓyan, qaɛ amenni teḥḍid Awař inu uca war tenkared ca Isem inu. 9 Xzar, ad wceɣ ca zi temzida n cciṭan, inni iqqaren aqa nitni d Udayen, maca nitni war ǧin ca amenni, maca nitni ssxarriqen. Ad ten arreɣ ad ac wḍan ɣar iḍaren nnek. Nitni uca ad neɛmen belli Necc ssɛizzeɣ cek, ■
10 Minzi aqa cek teḥḍid awař inu n ṣṣbar, ad xak ḥḍiɣ ɛawed zi tsaɛɛet n ujarreb tenni i dd ɣa yasen x temmurt marra i ujarreb n yinni izeddɣen x temmurt.
11 Necc ad dd-aseɣ deɣya. Ṭṭef di min ɣarek ḥima uřa d ijj war d ac ittekkes ca ttaj nnek. ■
12 Wenni i ɣa iɣellben ad t ggeɣ d apilar di Zzawect n AREBBI inu uca war zzayes ittwammeksi ɛemmarṣ. Necc ad xas ariɣ Isem n AREBBI inu d yisem n tendint n AREBBI inu, Urcalim n jdid, tenni i dd ɣa ihwan zeg ujenna zi zzat i AREBBI inu, uřa d Isem inu n jdid. ■
13 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.”
I tmesmunt n Ilayudikiyyen
14 Ari i lmalak n tmesmunt n Ilayudikiyyen!
Ammu i iqqar wenni d ‘Amin’, Acehhad amtiqqi d tidett, wenni d beddu n marra min dd-ixřeq AREBBI: ■
15 “Necc ssneɣ řexdayem nnek, aqa cek war tesmiḍed war teḥmid. Meɛlik beɛda tsemḍed niɣ teḥmid!
16 S uyenni, umi cek temřuded, war teḥmid war tesmiḍed, ad cek ɛuqqeɣ zeg uqemmum inu.
17 Minzi cek teqqared: ‘Necc ɣari agřa uca immarni-dd ɣari wagřa, war d ayi ittxeṣṣi walu!’, uca war tessined ca belli aqa cek tḥeřced u dayek řeɣben d zzeřḍ u aqa cek d adarɣař d aɛaryan,
18 ad cek neṣḥeɣ maḥend ad xafi tesɣed wureɣ iqquren ikkin timessi ḥima ad tdewřed d bu-wagřa, řa d arruḍ d acemřař ḥima ad t tyarḍed u war teḍhar ɛad řefḍiḥet n tuɛaryent nnek, uřa d ddhen i tiṭṭawin nnek ḥima ad tmesḥed tiṭṭawin nnek, ad twařid. ■
19 Marra wenni ssɛizzeɣ, ttwebbxeɣ t u arebbiɣ t. Cḍar xenni, u tub! ■
20 Aqa da, Necc beddeɣ ɣar tewwart, ssqarqubeɣ-dd. Mařa ḥed isřa i tmijja inu, ad yarzem tawwart, Necc ad ɣares adfeɣ uca ad kis mmunesweɣ d netta akidi.
21 Wenni i ɣa iɣellben ad as wceɣ ḥima ad iqqim akidi x řɛarc inu, amecnaw Necc ɣellbeɣ uca qqimeɣ ak-d Baba x řɛarc nnes. ■
22 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.”
Sebɛa n tmesmunin di Asiya Ameẓyan (Asa. 2, 3)