Imsexxaren d bab nsen
6
1 Ittxeṣṣa i marra inni iǧan sadu azayřu n tesmuɣi ad weqqaren aytbab nsen di marra, ḥima war ittᵉtwaceqqaf ca Isem n AREBBI d tɣuri nnes. ■ 2 Ejj isemɣan nni ɣar iǧa imasen yumnen war ten sseḥqirin, umi nitni d awmaten nsen. Maca s řɛeks ejj i-ten ad asen sexxaren minzi nitni umnen u aqa aten d awmaten iɛizzen. Seřmed man aya u ziyyar xasen. Lxaṭar n waṭṭas n wagřa
3 Maca mařa din ḥed isseřmed ict n řḥajjet nneɣni uca war yareddef ca awařen iṣeḥḥen n Siditneɣ Yeccu Lmasiḥ d tɣuri n weɛbed i AREBBI s uweqqar, 4 aqa netta ittuff am war issin walu, iweddar deg imḥarwaḍen d imcubbecen i-dd-ittawyen řeḥsed d umenɣi d uceqqef, řa d ict n nneyyet d taɛeffant, ■ 5 uřa d tamara i dd-yekkin zeg iwdan inni ittwaɣeccen di řeɛqeř nsen, tweddar asen ttidet, ittɣiř asen aqa řefḍeř d aɛbad n AREBBI s uweqqar. Beɛɛed xasen. ■ 6 Waxxa amenni aqa řefḍeř nneɣ d ameqqran am neɛbed AREBBI s uweqqar am neqneɛ s min nehdaj aṭṭas. ■ 7 Minzi war dd-niwi walu ɣar ddunect uca aqa nessen war nzemmar akidneɣ neksi walu zzayes. ■ 8 S uyenni, mařa ɣarneɣ řmeɛteq d dduri, aqa neqneɛ. ■ 9 Maca inni ixsen ad ssmunen agřa, ad wḍan deg iɣekkwan u di txecfin u deg waṭṭas n nnecwat tifɣař ittḍarran, tinni ittejjan iwdan ad ɣarqen deg uteḥḥi d řekḥeḍ. ■
10 Minzi aẓwar n marra tuɛeffna aqa tt d ṭṭmeɛ n tmenyat, inni ittexsen man aya, iweddar asen l’iman uca ɣeḍren-dd xasen aṭṭas n tamara. ■
11 Maca cek, a bnadem n AREBBI, arweř zi man aya uca arzu x tsegda, x tnicant, x l’iman, x tayri, x ṣṣbar uřa x temhint. ■
12 Mneɣ amenɣi aṣebḥan n l’iman, cebbar di Tudart ittduman, ɣar tmesřayin nni umi ɣar dd-tᵉttwařaɣid, d yenni umi tcehhded cchadet taṣebḥant zzat i waṭṭas n řechud. ■
13 Cehhdeɣ i cek zzat i AREBBI, wenni iwcin Tudart i marra, u zzat i Yeccu Lmasiḥ, wenni tuɣa icehhden cchadet taṣebḥant aṭṭas zzat i Punṭiyus Pilaṭus, ■
14 ḥima ad teḥḍid ttewṣeyyet břa ssuss niɣ řɛib ař dd ɣa iban Siditneɣ Yeccu Lmasiḥ.
15 Netta ad ittwasseḍhar di řweqt nnes: AREBBI Ibarken, Amzemmar kuřci x marra min iǧan, Ajeǧid x marra ijeǧiden d Sidi n isiditen, ■
16 wenni weḥḥdes waha war ifennin, wenni izeddɣen di tfawt i war izemmar ad ɣares yadef ḥed, wenni war iẓri bnadem niɣ izemmar ɛad ad t iẓar. I Netta umi ɣa iǧa ccan d ṣṣulṭa i řebda qaɛ. Amin. ■
17 Ɛřem i aytbab n wagřa di ddunect-a war ttiřin d imɛeffaren uřa ad tecřen x wagřa war yarekknen, maca ad tecřen x AREBBI iddaren wenni d aneɣ itticen marra timesřayin s ufeyyeḍ ḥima nettwafewwej, ■
18 uca ejj i-ten ad ggen řexdayem iṣebḥen, ad ɣarsen iřint tmegga tiṣebḥanin, ad wejden maḥend ad wcen u ad carcen.
19 maḥend ad ssarsen dsas aṣebḥan i yixef nsen i řweqt i dd ɣa yasen maḥend ad ɣarsen tiři Tudart d Tidett. ■