Tasexxart n Bulus di Tissaluniki
2
1 Maɣar kenniw simant nwem, a aytma, tessnem belli adaf nneɣ nni d ɣarwem negga, war tuɣi iǧa baṭeř. ■ 2 Tuɣa xaneɣ ikka uweddeb d řḥagra di Filippi qbeř, am mammec tuɣa tessnem. Awarni man aya, aqa nbarreḥ awem Řexbar Aṣebḥan n Lmasiḥ s teryast di AREBBI u s umenɣi ameqqran. ■ 3 S minzi afewwej nneɣ war iǧi ca zeg uɣekkwi niɣ zi řexmej niɣ zi řɣecc, 4 maca nessawař am iwdan i ittwaḥesben nican zi AREBBI ařami d aneɣ iwekkeř tabarreḥt n Řexbar Aṣebḥan, war iǧi i arḍa n iwdan, maca i arḍa n AREBBI wenni iqeǧben uřawen nneɣ. ■ 5 Minzi ɛemmarṣ war tuɣi nettegg tiqedduḥin, aqa kenniw tessnem tt, u war ǧi ca di ca n ṭṭmeɛ nneɣ, AREBBI aqa-t din! ■ 6 War narezzu aɛuǧi n iwdan uřa zzaywem uřa zeg inneɣni, waxxa tuɣa nzemmar ad negg ixef nneɣ jar awen am rrusul n Lmasiḥ. □ ■ 7 Maca tuɣa aneɣ d iḥninen akidwem, am ict n tebřiɣt tᵉtthilla deg iḥenjiren nnes. 8 Ammu ɛawed i kenniw nettexs u tuɣa dayneɣ meẓri maḥend ad ncarc akidwem, war iǧi Řexbar Aṣebḥan n AREBBI waha, aḥeqqa uřa d tudart nneɣ, minzi tdewřem d imɛizzen ɣarneɣ. 9 Ɛeqřem xenni, a awmaten, mammec tuɣa nᵉttamar u nxeddem s ifassen nneɣ ǧiřet d wass, ḥima war xawem nettegg ddqeř. ■ 10 Kenniw d AREBBI aqa d řechud x mammec d awem tuɣa nettbarreḥ s Řexbar Aṣebḥan n AREBBI di řeṣfayet d tnicant n wuř, u mammec tuɣa neggur břa řɛib jar marra inni yumnen.
11 Aqa tessnem ɛawed mammec tuɣa nɛeǧem ijj-ijj zzaywem am ijj n babas i iḥenjiren nnes, negga daywem uř u neched
12 maḥend ad tuyurem am mammec isdaheǧ qibač i AREBBI, wenni d awem dd-iřaɣan ɣar Tgeldit nnes d uɛuǧi nnes. ■
13 S uyenni nettqada AREBBI břa qeṭṭu, umi kenniw tqebřem Awař n AREBBI i tᵉṭṭfem zzayneɣ, war iǧi am ijj n wawař n iwdan, maca am Wawař n AREBBI uca d man aya i yeǧan d tidett u awař-a ixeddem daywem s řexdayem n yinni yumnen.
14 Minzi kenniw, a aytma, tdewřem d imeḍfaren n tmesmunin n AREBBI i iǧan di Yahudiyya di Yeccu Lmasiḥ, minzi kenniw teksim ɛawed arrmeḥ zeg iwdan nwem, am mammec t ksin uřa d nitni zeg Wudayen, ■
15 inni inɣin Siditneɣ Yeccu Lmasiḥ d inabiyyen nsen uca darrcen xaneɣ. Aqa aten war areṭṭin ca i AREBBI uca dewřen ḍidd n iwdan marra. ■
16 Maɣar menɛen aneɣ maḥend ad nessiweř ɣar řegnus, ḥima ad qqimen ddaren maḥend ad ɛemmaren řmizan n ddnub nsen i řebda. Maca aɣḍab aqa iwḍa-dd xasen ař aneggar. ■
Amnus n Bulus d Timutiyu
17 A aytma, aqa nedweř d iyujiřen nwem zi jjihet n uɣembub, waxxa ɣar drus n řweqt waha, maca war iǧi zi jjihet n wuř. Aqa tuɣa narezzu s meẓri ktar ad nẓar aɣembub nwem.
18 Tuɣa nexs ad ɣarwem-dd nas, u necc Bulus ict n twařa d ict n twařa nneɣni, maca cciṭan ibedd ayi deg webrid. ■
19 Minzi man wen i iǧan d asitem nneɣ, d řefraḥet nneɣ niɣ d ttaj n uɛuǧi nneɣ illa kenniw waha zzat i Siditneɣ Yeccu Lmasiḥ xmi dd ɣa yas? ■ 20 Aqa kenniw d aɛuǧi nneɣ d řefraḥet nneɣ.