9
1 Minzi ḥesbeɣ belli nhřa ma uriɣ awem-dd x tsexxart i twiza i imqeddasen, ■ 2 minzi ssneɣ nneyyet nwem iṣebḥen mixef xawem ssemɣareɣ jar inni n Masiduniya, belli Axaya tuɣa tewjed zeg useggʷas iɛdun uca cḍaret nwem aqa tesfaq azyen ameqqran. 3 Maca ssekkeɣ-dd awmaten-a, maḥend asemɣar nneɣ daywem war ittiři ca baṭeř di tmesřact-a, ḥima ad tiřim tḥezzmem am mammec nniɣ, 4 ḥima, xmi kidi i dd ɣa yasen ca n Imasiduniyyen uca ad kenniw afen ɛad war tḥezzmem, neccin, - maḥend war qqareɣ ca ‘kenniw’ -, war nɣeṭṭer zeg usemɣar i zzaywem nessemɣar. 5 S uyenni ggiɣ ad ttareɣ awmaten nni, maḥend ad ɣarwen dd-asen d amezwaru uca ad ssewjden qbeř lbaraka n ṣṣdaqi tinni x ittwanna qbeř i kenniw, aqa ittxeṣṣa ad tiři ṣṣedqet-a ɣar ufus am ict n lbaraka, war iǧi axmi tt-i-dd-kksen zi teřmect nwem. 6 Maca snem ddegga:
“Wenni i ɣa izarɛen s tceṭṭart, ad imjar s taceṭṭart,
uca wenni i ɣa izarɛen s tecrimet,
ad imjar ɛawed s tecrimet.” ■
7 Ad igg kuř ijjen am mammec inwa deg wuř nnes, war iǧi s imeṭṭawen niɣ s uɣiř, minzi AREBBI ittexs wenni itticen s řefraḥet, ■ 8 uca AREBBI aqa izemmar ad awem iwc s kuř arḍa s ufeyyeḍ, ḥima řebda u di marra ad ɣarwem yiři min teḥdajem uca ad tarnim aṭṭas di marra řxedmet iṣebḥen, 9 am mammec tura:
“Aqa ibeṭṭa, iwca i imezřaḍ,
tasegda nnes tᵉttɣima i řebda.” ■
10 Ejj ad yiři wenni itticen zzariɛet i wenni izarɛen uřa d aɣrum i macca, ad yarni di zzariɛet nwem uca ad issegma řɣiǧet n tsegda nwem,
11 maḥend ad tiřim ttejjarem di marra i marra tacrimet tenni ikemmřen zzayneɣ aqadi i AREBBI.
12 Minzi řxedmet n tsexxart tanita war teǧi waha di ṭṭweɛ n min ineqṣen i imqeddasen, maca tᵉttawi ɛawed ɣar waṭṭas n uqadi i AREBBI.
13 Minzi s tqeǧebt n tsexxart-a, aqa ssemɣaran di AREBBI zi ssibbet n ṭṭaɛet nwem di ṭṭweɛ n cchadet i Řexbar Aṣebḥan n Lmasiḥ uřa zi ssibbet n tecrimet n twiza nwem i nitni u i marra.
14 Nitni ad dd-qarrben ɣar AREBBI s tẓaǧitin i kenniw, s tayri aṭṭas x ssibbet n ufeyyeḍ n arḍa n AREBBI nni xawem iǧan.
15 Tqad as i AREBBI x tewhibt nnes i war nzemmar ad zzayes nenṭeq.