Uḍuf n Yeccu
18
1 Awarni řami inna Yeccu aya, iffeɣ ak-d imeḥḍaren nnes, ẓwan x yeɣzar n Qidrun. Tuɣa din ijj n weḥwic, yudef dayes ak-d imeḥḍaren nnes. ■ 2 Maca uřa d Yahuda wenni t isellmen, issen amcan nni ɛawed, minzi Yeccu tuɣa issmuna dayes aṭṭas ak-d imeḥḍaren nnes. 3 Yiwi-dd Yahuda akides ict n terbiɛt n řɛeskar, uřa d iɛessasen n imeqqranen n ikehhanen d Ifarisiyyen, uca yusa-dd diha s iṣefḍawen d řeqnadeř d řesnaḥ. ■ 4 Yeccu, wenni issen marra min d as ɣa imsaren, iffeɣ-dd ɣarsen, inna asen: “Min xef tarezzum?” 5 Arrin-dd xas: “Yeccu Nnaṣiri!” Inna asen: “D NECC!” Tuɣa Yahuda, wenni t isellmen, ibedd ɛawed akidsen. 6 Řami d asen inna Yeccu: “D NECC!”, dewřen nitni ɣar ḍeffar uca wḍan ɣar temmurt.
7 Isseqsa ten Yeccu ɛawed: “Min xef tarezzum?” Nnan: “Yeccu Nnaṣiri!” 8 Yeccu yarra-dd: “Aqa nniɣ awem, aqa d NECC. Mařa tarezzum xafi, jjem ina ad raḥen!”, 9 ḥima ad ittwakemmeř wawař i tuɣa inna: “Inni d ayi tewcid, war zzaysen weddareɣ uřa d ijj.” ■
10 Cimɛun Buṭrus wenni tuɣa ɣares ssif, ijbed i-t-i-dd, iwta zzayes amsexxar n arrays n ikehhanen, iqess as amezzuɣ nnes afusi. Tuɣa amsexxar nni qqaren as Malxis. ■
11 Xas uca inna Yeccu i Buṭrus: “Arr ssif ɣar weɣřaf nnes, řkas wenni d ayi iwca Baba, ma war t sesseɣ?” ■
Yeccu zzat i Ḥannan, azeǧif n ikehhanen
12 Tarbiɛt n řɛeskar d umeqqran x ařef n iɛeskariyyen uřa d iɛessasen n Wudayen ṭṭfen Yeccu, carfen t.
13 Nedhen t amezwaru ɣar Ḥannan, minzi netta d aḍeggʷař n Qayafa, wenni tuɣa d arrays n ikehhanen deg useggʷas nni. ■
14 Qayafa d netta tuɣa iweṣṣa i Wudayen, aqa ḥsen ad immet ijj n Bnadem di ṭṭweɛ n řgens. ■
Ankar n Buṭrus
15 Cimɛun Buṭrus d ijjen zeg imeḥḍaren inneɣni ḍfaren Yeccu. Ameḥḍar nni tuɣa ittwassnen ɣar arrays n ikehhanen uca yudef ak-d Yeccu ɣar řemraḥ n taddart n arrays n ikehhanen. ■
16 Cimɛun ibedd-dd barra ɣar tewwart. Iffeɣ-dd umeḥḍar i tuɣa ittwassnen ɣar arrays n ikehhanen, issiweř ak-d tɛessast tenni iḥeṭṭan tawwart uca issidef-dd Cimɛun ɣar daxeř.
17 Tabɣirt tenni iḥeṭṭan tawwart tenna i Cimɛun: “Ma war teǧid cek zeg imeḥḍaren n bnadem-a?” Inna: “Lla!”
18 Tuɣa imsexxaren d iɛessasen bedden din, ssarɣen timessi s řefḥem, minzi tuɣa tesmeḍ uca tuɣa ttweqqaḥen. Uřa d Cimɛun ibedd akidsen, ittweqqaḥ. ■
Iseqsiten n arrays n ikehhanen i Yeccu
19 Isseqsa arrays n ikehhanen Yeccu x imeḥḍaren nnes u x tɣuri nnes. 20 Yarra-dd xas Yeccu: “Necc tuɣa ssawařeɣ i řgens s bṭayṭay, ssɣareɣ řebda di temzida u di Zzawect Tameqqrant mani ttmunen Wudayen řebda. Di tnuffra war ssiwřeɣ uřa d ict n řḥajjet. ■ 21 Mayemmi d ayi tesseqsid? Seqsa inni isřan min d asen nniɣ. Xzar, nitni ssnen min nniɣ!” 22 Řami inna ammu, xenni ijjen zeg iɛessasen i tuɣa din ibedden, iwta Yeccu x umeggiz nnes, inna as: “Ma ammu i dd ɣa tarred x arrays n ikehhanen?” ■ 23 Yarra-dd xas Yeccu, inna: “Mařa ssiwřeɣ min war iḥřin, ched x min war iḥřin, maca mařa ssiwřeɣ mliḥ, mayemmi d ayi teccated xenni?” 24 Xas uca Ḥannan issekk i-t ittwacarf ɣar Qayafa, arrays n ikehhanen. ■
Cimɛun Buṭrus inkar ɛawed aqa netta issen Yeccu
25 Tuɣa Cimɛun Buṭrus ibedd dinni ittweqqaḥ. Nnan as: “Ma war teǧid uřa d cek zeg imeḥḍaren nnes?” Netta inkar, inna: “War ǧiɣ ca d necc!” ■ 26 Ijjen zeg imsexxaren n arrays n ikehhanen i tuɣa itteɛnan i wenni umi iqess Cimɛun amezzuɣ, inna: “Ma war cek ẓriɣ akides deg weḥwic?” 27 Řexdenni inkar Cimɛun ɛawed uca deɣya issquqeɛ uyaẓiḍ. ■
Yeccu zzat i Pilaṭus
28 Xenni iwyen-dd Yeccu zi Qayafa ɣar taddart n ccreɛ, umi qqaren ‘Prituriyum’. Tuɣa d zic di ṣṣbeḥ. Nitni war udifen ca ɣar taddart n ccreɛ, ḥima war ttwessixen qbeř ma i ɣa ccen Tɣarṣt n Useɛdu. ■ 29 S uyenni iffeɣ-dd ɣarsen Pilaṭus, inna asen: “Man acetci i ɣarwem x Weryaz-a?” 30 Arrin-dd, nnan as: “Mařa Wanita war tuɣi d mmis n řmuɛṣiyyet, ad tiři war d ac t-i-dd-nettiwi.” 31 Inna asen Pilaṭus: “Awyem t-i-dd kenniw, tḥekmem xas ɛlaḥsab Ccariɛa nwem.” Xenni nnan as Wudayen: “War ɣarneɣ bu ttesriḥ maḥend ad neneɣ uřa d ijj!”, 32 ḥima ad ittwakemmeř wawař n Yeccu i tuɣa iqqar, am tuɣa isscanen i man řmewt i ɣa immet. ■
33 Xenni yudef-dd Pilaṭus ɛawed ɣar taddart n Ccraɛ, umi qqaren Prituriyum, iřaɣa-dd x Yeccu, inna as: “Ma Cek d Ajeǧid n Wudayen?” ■ 34 Yarra-dd xas Yeccu: “Ma teqqared aya zi ɣarek niɣ tuɣa inneɣni qqaren ac t xafi?” 35 Yarra-dd Pilaṭus: “Ma necc d Uday? Aqa řgens nnek d imeqqranen n ikehhanen iwyen-dd Cek ɣari. Min tuɣa teggid?” 36 Yarra-dd xas Yeccu: “Tageldit inu war teǧi ca zi ddunect-a. Mařa teǧa Tgeldit inu zi ddunect-a, ad yiři aqa imsexxaren inu ad mmenɣen ḥima war ttwasellameɣ i Wudayen, maca řexxu Tageldit inu war teǧi ca ssanita.” ■ 37 Inna as Pilaṭus: “Xenni aqa Cek d Ajeǧid nican!” Yarra-dd Yeccu: “Cek teqqared, aqa Necc d Ajeǧid. I man aya i dd-xeřqeɣ u i uya i dd-usiɣ ɣar ddunect ḥima ad cehdeɣ i tidett. Marra wenni iǧan zi tidett, ad iseř i tmijja inu.”
38 Inna as Pilaṭus: “Umi qqaren d tidett?” Řami inna ammu, iffeɣ-dd ɛawed ɣar Wudayen, inna asen: “War dayes ufiɣ uřa d ijj n uxeṭṭu. ■ 39 Maca aqa tennumem ad awem sarrḥeɣ ijj n bnadem di Řɛid n Tɣarṣt n Useɛdu. Ma texsem xenni ad awem sarrḥeɣ Bnadem-a, Ajeǧid n Wudayen?” ■ 40 Sɣuyyen ɛawed marra, nnan: “War iǧi ca Wanita, ḥaca Bar-Abbas!” Tuɣa Bar-Abbas d aceffar. ■