16
1 “Aqa ssiwřeɣ akidwem aya ḥima war tendrifem. 2 Ad kenniw ssuffɣen zi temzidawin nsen. Iwa, tasaɛɛet ad dd-tas umi kuř ijjen wenni kenniw i ɣa inɣen ad as ittɣiř aqa iwca ict n tewhibt i AREBBI. ■ 3 Ad zzaywem ggen man aya, minzi nitni war ssinen Baba uřa d Necc. ■ 4 Maca aqa nniɣ awem man aya ḥima, xmi i dd ɣa tas tsaɛɛet, xenni ad tɛeqřem x man aya. Necc war daywem nniɣ ca man aya qbeř, minzi Necc tuɣa ayi akidwem.” ■ Arruḥ Iqeddsen d Amefdi nneɣni
5 “Maca řexxu ad raḥeɣ ɣar wenni d ayi dd-issekken, uca uřa d ijj zzaywem war d ayi isseqsi: ‘Mani i ɣa traḥed?’ 6 Maɣar minzi nniɣ awem man aya, aqa ccuren wuřawen nwem s wecḍan. 7 Maca Necc ad awem iniɣ tidett: Ḥsen awem ad raḥeɣ, maɣar mařa war ruḥeɣ ca, war ɣarwem dd-ittis Umefdi. Mařa ruḥeɣ, ad awem t-i-dd-ssekkeɣ. ■ 8 Řami dd-yusa wanita, ad isseqneɛ ddunect x ddnub x tsegda u x řḥukm. 9 X ddnub minzi nitni war zzayi uminen,
10 x tsegda, minzi Necc ad raḥeɣ ɣar Baba uca war d ayi tẓarrem ɛad,
11 uca x řḥukm, minzi ameqqran n ddunect-a aqa ittwaḥaseb. ■
12 Ɣari aṭṭas min daywem i ɣa iniɣ, maca řexxu war tzemmarem ad t teksim.
13 Maca řami dd-yusa Arruḥ n tidett, ad kenniw indeh di marra tidett, minzi Netta war issiwiř ca zeg ixef nnes, maca marra min ɣa isřa, ad zzayes issiweř uca ad awem isscen timesřayin i dd ɣa yasen. ■
14 Netta ad ayi issɛuǧ, minzi ad iksi zi min ɣari uca ad kenniw issargeb zzayes.
15 Marra min iǧan ɣar Baba, aqa-t inu. S uyenni nniɣ, belli Netta ad iksi zi min ɣari uca ad kenniw tt issargeb.” ■
Řweqt n wecḍan ad tedweř d řefraḥet
16 “War ittɣimi ca uca war d ayi tẓarrem ɛad, u xenni ɛawed war ittɣimi ca uca ad ayi tẓarem, minzi Necc ad raḥeɣ ɣar Tbabat.” ■
17 Ca zeg imeḥḍaren nnes nnan jar asen: “Manawya min i d aneɣ inna: ‘War ittɣimi ca uca war d ayi tẓarrem ɛad, u xenni ɛawed war ittɣimi ca uca ad ayi tẓarem ɛawed!’, u: ‘Necc ad raḥeɣ ɣar Tbabat!’?”
18 Nitni nnan: “Manawya min iqqar: ‘War ittɣimi ca!’? War nessin ca min ixs ad yini.”
19 Issen Yeccu min xsen ad t sseqsan, inna asen: “Ma temmseqsam minzi nniɣ: ‘War ittɣimi ca uca war d ayi tẓarrem ɛad u xenni ɛawed war ittɣimi ca uca ad ayi tẓarem ɛawed!’?”
20 “S tidett, s tidett, Necc ad awem iniɣ: Kenniw ad trum, ad tesɣuyyem, maca ddunect ad tfarḥ. Kenniw ad tceḍnem, maca acḍan nwem ad idweř d řefraḥet. 21 Tamɣart, xmi i ɣa taruw, ad dayes yiři řeḥriq minzi tasaɛɛet nnes aqa tiweḍ-dd. Maca xmi dd ɣa taruw mmis, war tfekkar ca ɛad di řeḥriq nnes s řefraḥet minzi tarni-dd ijj n bnadem ɣar ddunect. ■ 22 Uřa d kenniw aqa daywem acḍan řexxu, maca ad kenniw ẓareɣ ɛawed uca ad farḥen wuřawen nwem uca uřa d ijj war zzaywem ittekkes řefraḥet nwem.
23 Deg wass nni war d ayi tᵉttarem ca. S tidett, s tidett, Necc ad awem iniɣ: Marra min ɣa tᵉttarem zi Baba s Yisem inu, ad awem t iwc. ■ 24 Ař i řexxu war tᵉttarem ca s Yisem inu. Ttarem, ad teksim, ḥima ad tiři řefraḥet nwem tekmeř.
25 Ssiwřeɣ awem x man aya s imedya, maca ad dd-taweḍ tsaɛɛet i di war ɣarwem i ɣa ssiwiřeɣ ɛad s imettiřen, maca ad awem dd-barrḥeɣ x Tbabat s bṭayṭay. 26 Deg wass nni ad tᵉttarem s Yisem inu. Necc war d awem qqareɣ ca belli ad ttareɣ ca i Tbabat di ṭṭweɛ nwem, 27 minzi Tababat simant nnes ittexs kenniw, minzi kenniw tuɣa tᵉttexsem ayi uca aqa tumnem aqa Necc zi ɣar AREBBI i dd-ffɣeɣ. ■ 28 Ffɣeɣ-dd zi Tbabat, usiɣ-dd ɣar ddunect. Ad jjeɣ Necc ɛawed ddunect uca ad raḥeɣ ɣar Tbabat.” ■
29 Nnan as imeḥḍaren nnes: “Aqa řexxu tessawařed s bṭayṭay, war tessiwiřed ca s ijj n umedya. 30 Řexxu nessen aqa tessned kuřci, war teḥdijed ad Cek isseqsa ḥed. Zi manawenni numen aqa Cek teffɣed-dd zi AREBBI.” ■ 31 Yeccu yarra-dd xasen: “Ma řexxu tumnem? 32 Ad dd-taweḍ tsaɛɛet, aqa tiweḍ-dd, i di i ɣa tᵉttwassuzzarem, kuř ijj ad iṭṭef ɣar wemcan nnes, ad ayi tejjem weḥḥdi, maca Necc war ǧiɣ bu weḥḥdi, minzi Tababat aqa-t akidi. ■ 33 Aqa ssiwřeɣ akidwem s man aya ḥima ad ɣarwem yiři řehna dayi. Di ddunect ad ɣarwem tiři řmeḥnet, ggem uř, Necc aqa ɣellbeɣ x ddunect.” ■