Tanukra
24
1 Deg wass amezwar n simana ɣar ṣṣbeḥ, řami tuɣa ɛad d taǧest, ruḥent ɣar wenḍeř, ksint řeɛṭur i tuɣa ssewjdent, u tuɣa din ɛad timɣarin nneɣni akidsent. ■ 2 Aqa ufint, taṣḍart i tuɣa x wenḍeř, tᵉttwasseqnuni zzayes. 3 Udfent, maca war ufint ca řxecbet n Yeccu. 4 Am tbehtent di man aya, xzar, aqa din tnayen n yeryazen deg warruḍ ittissiqen, bedden sennej nsent. 5 Nitenti ggʷedent aṭṭas uca qbařent azeǧif nsent ɣar temmurt. Nitni maca nnan asent: “Mayemmi tarezzunt jar imettinen x Wenni iddaren? 6 Aqa war da iǧi, minzi aqa ikkar! Ɛeqřent x min d akent inna umi t tuɣa ɛad di Ljalil, ■ 7 inna: ‘Aqa tura belli Mmis n bnadem ad immewc deg ifassen n imednab, ad ittwaṣelleb uca deg wass wiss třata ad dd-ikkar.’ ”
8 Xenni ɛeqřent x wawařen nnes. ■ 9 Ɛeqbent-i-dd zeg wenḍeř uca xebbarent marra man aya i ḥiṭac u i inneɣni. ■
10 Ina tuɣa d Maryam n Majdala d Yuḥanna d Maryam yemmas n Yaɛqub d min tuɣa iqqimen n temɣarin i iǧan akidsent, ḥajant nitenti man aya i rrusul.
11 Maca nitni ḥesben awařen-a d tubbuheřya uca war tent ttiqqen.
12 Maca Cimɛun ikkar-dd, yuzzeř deɣya ɣar wenḍeř, ixezzar daxeř, iẓra řecfun ttwamarsen ɣar uɣezdis. Xenni iruḥ, ittebhet deg yixef nnes s min imsaren. ■
Deg webrid ɣar Ɛimwas
13 U xzar, deg wass nni tuɣa tnayen zzaysen deg webrid ɣar ijj n dcar qqaren as Ɛimwas, iggʷej settin ‘istadiyyen’ x Urcalim, ɛřaḥař ḥiṭac kilumitr. ■
14 Tuɣa ssawařen ak-d wayawya x marra min tuɣa imsaren.
15 Am ssawařen nitni, ttemsawaḍen, iqarreb-dd ɣarsen Yeccu, yuyur akidsen. ■
16 Ttwacebbarent tiṭṭawin nsen ařami war t ɛqiřen.
17 Inna asen: “Man awařen-a i xef tessawařem ak-d wayawya deg webrid, am teggurem u ttbanent řxeẓrat nwem ceḍnent?”
18 Ijjen zzaysen umi qqaren Kliyupas, inna as: “Ma Cek d ayenni n ubarrani di Urcalim i war issinen min din imsaren deg wussan-a?”
19 Inna asen: “Min imsaren?” Nnan as: “Min imsaren i Yeccu Nnaṣiri, tuɣa-t d Anabi, tuɣa ɣares jjehd di min ittegg u di min issawař qibač i AREBBI d marra iwdan. ■ 20 Sellmen t imeqqranen n ikehhanen d imeqqranen i řḥukm s řmewt uca ṣellben t. 21 Neccin maca tuɣa nessitim, aqa d Netta i ɣa isellken Israil, maca xzar, ass-a ɛdun ɛad třata n wussan zeg wami imsar man aya marra. ■ 22 Maca ca n temɣarin zzayneɣ ssḥeyyarent aneɣ ɛawed, maɣar nitenti tuɣa tent d amezwaru ɣar wenḍeř. ■ 23 Řami war din ufint řxecbet nnes, usint-i-dd, nnant: “Aqa neẓra din lmalakat, u lmalakat nnant xas: ‘Aqa iddar!’ ” 24 Ca zeg inni akidneɣ iǧan, ruḥen ɣar wenḍeř, ufin timesřayin am mammec xas nnant ɛawed temɣarin, maca Netta war t ẓrin ca.”
25 Inna asen: “Mecḥař ifɣař d ineḍqař n wuř i teǧam maḥend ad tamnen marra min ssiwřen inabiyyen! 26 Ma war ittxeṣṣi ad iweddeb Lmasiḥ ḥima ad yadef ɣar uɛuǧi nnes?” ■ 27 Xenni ibda-dd zi Musa u zi marra inabiyyen, ittfessar asen x Yixef nnes zi marra Adlis Iqeddsen. ■
28 Umi dd-qarrben ɣar dcar i ɣar tuɣa gguren, igga Netta axmi tuɣa ixs ad yarni deg webrid ɣar ijj n wemcan iggʷejen. 29 Maca nitni ggin xas bezzez, nnan: “Qqim akidneɣ, minzi tameddit teggur ad tewḍa, aqa imeyyeř uziř.” Uca yudef, iqqim akidsen. ■ 30 Imsar ařami tuɣa akidsen iqqim ɣar ṭṭabřa, iksi aɣrum, ibarek i-t, yarẓa i-t, xenni iwca asen t. 31 Deɣya nnurzment tiṭṭawin nsen, ɛeqřen t. Xas uca ittwammeksi zzaysen.
32 Nitni nnan ijjen i wenneɣni: “Ma war tuɣi icemmeḍ wuř nneɣ ařami tuɣa akidneɣ issawař deg webrid, issefham aneɣ idlisen?” 33 Di tsaɛɛet nni kkaren nitni, ɛeqben ɣar Urcalim, uca ufin ḥiṭac n rrusul munen, nitni d yenni akidsen. 34 Ina nnan: “D tidett, aqa ikkar-dd Siditneɣ uca iban-dd i Cimɛun.” 35 Xas uca xebbaren nitni s min imsaren deg webrid u mammec t ɛeqřen ařami yarẓa aɣrum.
Aḍhar n Yeccu i imeḥḍaren nnes
36 Am tuɣa ssawařen nitni x man aya, ibedd Yeccu simant nnes di řwest nsen, inna asen: “Sřam xawem, aqa d NECC, war tteggʷedem ca!” ■ 37 Maca nitni nnxeřɛen uca ggʷeden aṭṭas, ittɣiř asen belli ttwařan ijj n řexyař. 38 Inna asen Yeccu: “Mayemmi tᵉttnexřiɛem, mayemmi tᵉtteggem ixarriṣen deg wuřawen nwem? 39 Xzarem ifassen d iḍaren inu, aqa d NECC. Ḥadam ayi, u snem belli ijj n řexyař war ɣares bu weysum uřa d iɣsan am mammec d ayi tᵉttwařam.” 40 Umi inna aya, isscen asen ifassen nnes d iḍaren nnes. 41 War uminen ɛad zi ssibbet n řefraḥet, qqimen ttbehten. Inna asen: “Ma ɣarwem da ca n macca?” ■ 42 Wcin as ict n tecwiḥt n wesřem icenfen d ca n tezřeft n tamment. 43 Iksi t uca icca i-t qibač nsen.
44 Inna asen: “Ina d awařen i zi kidwem ssiwřeɣ umi d ayi tuɣa ɛad akidwem, aqa ittxeṣṣa ad ittwakemmeř marra min xafi yuran di Ccariɛa n Musa, deg Inabiyyen u deg Izehhiden.” ■ 45 Xenni yarzem asen řeɛqeř nsen ḥima ad fehmen i Idlisen Iqeddsen. 46 Inna asen: “Ammu i tura u ammu i tuɣa ittxeṣṣa ad imarret Lmasiḥ u ad dd-ikkar zi taddart n imettinen deg wass wiss třata, ■ 47 ḥima ad ittwabarreḥ s ttubet i weɣfar n ddnub i marra řegnus s Yisem nnes, d amezwaru di Urcalim. ■ 48 Kenniw d řechud x man aya. 49 Aqa Necc ad awem dd-ssekkeɣ lwaɛd n Baba. Qqimem maca di tendint n Urcalim ař ɣa tᵉttwassyarḍem s jjehd zi řuɛřa!” ■
Tameksit n Yeccu ɣar ujenna
50 Xenni indeh i-ten ɣar tendint n Bayt-Ɛanya, issgeɛɛed ifassen nnes uca ibark i-ten. ■ 51 Awarni řami ten tuɣa ittbarak, imsar, aqa imsebḍa xasen uca iggeɛɛed ɣar ujenna. ■ 52 Sejden as uca ɛeqben ɣar Urcalim s řefraḥet temɣar. 53 Tuɣa-ten řebda di Zzawect Tameqqrant, ssemɣaran u ttbaraken AREBBI. Amin.
Aneggar n Řexbar Aṣebḥan Iqeddsen am mammec t ibarreḥ Luka.