Amedya n tajjač d řqaḍi
18
1 Inna asen ɛawed ijj n umedya belli aqa ittxeṣṣa asen ad ẓẓaǧen di kuř řweqt břa amelli. ■ 2 “Tuɣa deg ict n tendint ijj n řqaḍi war itteggʷed ca AREBBI, war ittweqqar bnadem. 3 Tuɣa di tendint nni ict n tajjač, tuɣa tᵉttas-dd ɣares, teqqar as: ‘Ewc ayi tasɣart inu x weɣrim inu!’ 4 Aṭṭas i ikka tuɣa yugi. Xenni inna deg ixef nnes: ‘Necc zeɛma war tteggʷedeɣ ca AREBBI u war ttweqqireɣ bnadem, 5 qaɛ ammu, minzi tajjač-a thekkweř ayi, ad as wceɣ tasɣart nnes, ḥima war dd-tᵉttɛiqqib řebda uca ad ayi tarẓ azeǧif.’ ”
6 Siditneɣ inna: “Sřem min iqqar řqaḍi aɣeccac! 7 Ma war ittic AREBBI tasɣart i yenni zzayes ittwafarzen, inni ɣares dd-isɣuyyun ass d ǧiřet, am igga Arruḥ nnes ittraja s ttasiɛ n řxaḍar xasen? ■ 8 Ad awem iniɣ, aqa ad asen iwc tasɣart deɣya. Maca xmi dd ɣa iɛqeb Mmis n bnadem, ma ad yaf l’iman di temmurt?”
Amedya n Ufarisi d ijj n bu-ḍḍariba
9 Inna amedya aya i iwdan nni ɣar teǧa ttiqqet deg yixef nsen aqa aten d imseggaden u sseḥqaran inneɣni.
10 “Gaɛɛden tnayen n iwdan ɣar Zzawect Tameqqrant ḥima ad ẓẓaǧen, ijjen d Afarisi u wenneɣni d ijj n bu-ḍḍariba.
11 Ibedd Ufarisi, ittẓaǧa ak-d yixef nnes: ‘A AREBBI, ttqadiɣ Cek umi war ǧiɣ ca amecnaw iwdan nneɣni: iɣeccacen d yenni iḥeṣṣaren d yenni izennan, uřa amecnaw bu-ḍḍariba wanita. ■
12 Necc ttẓummiɣ tnayen n imuren di simana, tticeɣ řeɛcur zi marra min ɣari iǧan d agřa.’
13 Maca bu-ḍḍariba wenni ibedden ɣar řaggʷaj, war izɛim uřa ad issiři tiṭṭawin nnes ɣar ujenna, maca iwta ixef nnes ɣar idmaren, inna: ‘A AREBBI, arḥem ayi, aqa necc d amednub!’
14 Necc ad awem iniɣ, aqa wanita ad yiři ittwasegged s waṭṭas x Ufarisi nni umi dd-ihwa ɣar taddart nnes. Minzi marra wenni i ɣa issuɛřan ixef nnes ad ittwasswaḍeɛ, u wenni i ɣa isswaḍɛen ixef nnes ad ittwassuɛřa.” ■
Yeccu d iḥenjiren
15 Iwyen as-dd iḥenjiren imeẓyanen ḥima ad ten isřuf. Umi ten ẓrin imeḥḍaren, webbxen ten. ■
16 Maca Yeccu iřaɣa xasen, inna asen: “Jjem iḥenjiren imeẓyanen ad ɣari dd-asen, war ten ttᵉṭṭfem minzi Tageldit n ijenwan i yenni amecnaw ina. ■
17 S tidett, Necc ad awem iniɣ: Wenni war iqbiřen Tageldit n AREBBI amecnaw aseymi, war tt ittidef ɛemmarṣ!”
Aseqsi n ijj n bab n wagřa i Yeccu
18 Isseqsa t ijj n umeqqran, inna as: “A Amseɣɣar Aṣebḥan, min ɣa ggeɣ ḥima ad warteɣ Tudart ittduman?” ■
19 Inna as Yeccu: “Mayemmi d ayi třaɣid s ‘Aṣebḥan’? Uřa d ijj war iǧi d aṣebḥan mɣir ijjen, aqa-t d AREBBI. 20 Cek tessned tiweṣṣa: War zenni, war neqq, war tticar, war cehhed s ẓur, weqqar babac d yemmac!” ■ 21 Inna as: “Aqa marra tina ḥḍiɣ tent zi temẓi inu.” 22 Umi isřa Yeccu aya, inna as: “Ict teqqim ac. Zenz marra min ɣarek, farq i-t x imezřaḍ uca ad ɣarek yiři řkenz deg ujenna, xenni as-dd, ḍfar ayi-dd.” ■
23 Umi isřa man aya, icḍen minzi tuɣa-t d bab n wagřa ameqqran. 24 Umi iẓra Yeccu belli netta icḍen, inna: “Mammec yewɛar x aytbab n wagřa maḥend ad dd-adfen ɣar Tgeldit n AREBBI. ■ 25 Minzi adaf n weřɣem zi tiṭṭ n tsineft ihwen x wadaf n bab n wagřa ɣar Tgeldit n AREBBI.” 26 Inni tuɣa ittesřan aya, nnan: “Wi ɣar xenni i ɣar tiři Tudart ɛad?” 27 Yeccu inna: “Min war izemmaren ad yiři ɣar iwdan, ɣar AREBBI izemmar ad yiři.” ■
Řmunet n weḍfar n Yeccu
28 Inna asen Buṭrus: “Aqa neccin nejja kuřci uca neḍfar i Cek.” ■ 29 Yeccu inna as: “S tidett ad awem iniɣ, war din uřa d ijj i ittejjin taddart niɣ lwalidin niɣ tawmat, niɣ tamɣart niɣ tarrawt di ṭṭweɛ n Tgeldit n AREBBI, ■ 30 wenni war iksin aḍeffus x uḍeffus n tseqqar di řweqt-a, uca di řweqt i dd ɣa yasen ad iksi Tudart ittduman.” ■
Yeccu izwar issiweř x řmewt d tnukra nnes i twařa wiss třata
31 Yecci iksi tenɛac nnes ɣares, inna asen: “Ad ngeɛɛed ɣar Urcalim. Marra min yuran s ufus n inabiyyen x Mmis n bnadem ad ittwaqfeř. ■ 32 Minzi Netta ad ittwasellem i řegnus, uca ad zzayes stehzan, ad xas ssusfen x uɣembub nnes, ■ 33 ad t hettken s urekkuḍ, ad t sseḥqaren, ad t nɣen, uca deg wass wiss třata ad dd-ikkar.” 34 Nitni war fhimen walu zi man aya. Tuɣa awař-a iwɛar xasen, u nitni war fhimen min d asen ittwannan.
Asgenfi n ijj n udarɣař
35 Ařami dd-qarrben ɣar Ariḥa tuɣa ijj n udarɣař iqqim deg webrid, ittᵉttar. ■ 36 Řami isřa i řḥess n řɣaci iɛdu, isseqsa: “Man aya?” 37 Nnan as: ‘Yeccu Nnaṣiri iɛdu.” 38 Iřaɣa, inna: “A Yeccu, a mmis n Dawud, arḥem ayi!” 39 Inni tuɣa igguren ɣar zzat n Yeccu, webbxen t maḥend ad isqar, maca netta ibda ittřaɣa s jjehd ktar: “A mmis n Dawud, arḥem ayi!” 40 Ibedd Yeccu uca yumur ad t-i-dd-awyen ɣares. Umi dd ɣares iqarreb, isseqsa t, 41 inna as: “Min texsed ad ac t ggeɣ?” Inna: “A Sidi, xseɣ ad dewřeɣ ttwařiɣ!” 42 Inna as Yeccu: “Dweř ad twařid, aqa l’iman nnek issgenfa cek.” 43 Řexdenni idweř ittwařa uca iḍfar i-t, issemɣara di AREBBI. Marra iwdan i iẓrin man aya, ḥemden AREBBI.