Amedya n uḥuři iweddaren
15
1 Xenni tuɣa ayt n ḍḍariba d imednab ttqarraben ɣares ḥima ad as sřen. ■ 2 Ttmeɛmiɛen imseřmaden n idlisen d Ifarisiyyen, qqaren: “Aqa Wa yareḥḥeb s imednab uca ittett akidsen.” 3 Xenni ihaja asen Yeccu amedya aya: 4 “Man bnadem zzaywem i ɣar iǧa mya n iḥuřiyyen uca iweddar as ijjen zzaysen, ma war ittejji tesɛa u tesɛin di řexřa uca ad yarzu x wenni iweddaren ař t ɣa yaf? 5 U xmi t ɣa yaf, ad ifraḥ, ad t issars x tɣardin nnes. 6 Xmi dd ɣa yaweḍ ɣar taddart, ad iřaɣa x imeddukkař nnes d jjiran nnes, ad asen yini: ‘Farḥem akidi, minzi ufiɣ ahuři inu iweddaren!’ 7 Necc ad awem iniɣ, ammu i ɣa tiři řefraḥet deg ujenna x ijj n umednub i ɣa ituben ktar x tesɛa u-tesɛin n imseggaden i war ixsen ad tuben!” ■ Amedya n uṣuldi iweddaren
8 “Niɣ man tamɣart i ɣar iǧa ɛecra n tepyisin n ijj n dirham, mařa iweddar icten zzaysen, ma war tessruɣi řqendiř, ad tfarḍ taddart uca ad tarzu mliḥ ař tt ɣa taf? □ 9 Mařa tufi t, ad třaɣa x tmeddukař d tijjarin, ad asent tini: ‘Farḥent akidi, minzi ufiɣ dirham nni tuɣa d ayi iweddaren.’
10 Necc ad awem iniɣ, ammu i ɣa tiři řefraḥet qibač i lmalakat n AREBBI s yijj n umednub i ɣa ituben.”
Amedya n mmis iweddaren
11 Yeccu inna asen ɛawed: “Ijj n bnadem tuɣa ɣares tnayen n iḥenjiren.
12 Inna umaẓuẓ nsen i babas: ‘A baba, ewc ayi tasɣart tenni d ayi dd-yusin zeg wagřa nnek!’ Xas uca ibḍa asen babas agřa nnes.
13 Awarni ca n wussan issmun mmis amaẓuẓ kuřci min d as immewcen, xenni isafar ɣar ict n temmurt tiggʷej. Iqarḍ marra agřa nnes am isseɛdu dinni ict n tudart n ufecceḥ.
14 Awarni řami iqarḍ kuřci, iwḍa-dd ijj n řaẓ iwɛar di temmurt nni uca ibda ad iḥwaj.
15 Iruḥ uca iřṣeq deg ijjen zeg imezdaɣ n temmurt nni uca wanita issekk i-t ɣar iyyar nnes ḥima ad yarwes iřfan.
16 Tuɣa immeẓri ad iccur aɛeddis nnes s tesriɣwa tenni ittetten iřfan, maca uřa d ijj war d as iwci ca.
17 Idweř ɣar řeɛqeř nnes, inna: ‘Mecḥař n ixemmasen n baba i ɣar iǧa aɣrum aṭṭas u necc da ttmettiɣ s řaẓ!
18 Ad kkareɣ, ad raḥeɣ ɣar baba uca ad as iniɣ: ‘A baba, aqa xḍiɣ ak-d ujenna u akidek!
19 War sdiheǧeɣ ad ayi třaɣid d mmic. Egg ayi amecnaw ijjen zeg icuwwaren nnek.’
20 Ikkar uca iɛqeb ɣar babas. Am t tuɣa ɛad ɣar řaggʷaj, ibarq i-t babas, iḥinn xas, uca yuzzeř ɣares, ingez as x yiri, issudem i-t. ■ 21 Inna as mmis: ‘A baba, xḍiɣ ak-d ujenna u akidek. War sdiheǧeɣ ad ayi řaɣan mmic.’ 22 Maca babas inna i imsexxaren nnes: ‘Suffɣem-dd arruḍ iḥřan aṭṭas, syarḍem as t, ggem txadent deg ufus nnes uca qqnem as sandaliyat i iḍaren nnes. 23 Awyem-dd ayenduz iṣeḥḥen, tɣarṣem as, xenni ad necc, ad nfarḥ, 24 minzi mmi wanita tuɣa immut, iddar. Tuɣa iweddar, maca ittwaf.’ Xenni bdan ad farḥen!
25 Maca mmis ameqqran tuɣa deg iyyar. Ařami dd-yareggʷeḥ, idweř iqarreb-dd ɣar taddart, xenni isřa i ǧɣa d uɣennej s waṭṭas. 26 Iřaɣa i yijjen zeg imsexxaren nnes, isseqsa t: ‘Man aya?’ 27 Wanita inna as: ‘Umac yusa-dd, babac iɣarṣ i uyenduz iṣeḥḥen, minzi iɛqeb-dd ɣares mliḥ!’ 28 Maca mmis ameqqran ixeyyeq, war ixs ad yadef. Xenni iffeɣ babas ɣar barra, iḥeccem i-t. 29 Maca netta yarra-dd, inna as i babas: ‘Aqa necc xedmeɣ ɣarek řexxu aṭṭas n iseggʷusa, ɛemmarṣ war jjiɣ zi tewṣeyyet nnek. Maca cek war d ayi tewcid uřa d ijj n uḥuři qaɛ, ḥima ad farḥeɣ ak-d imeddukkař inu. 30 Maca umi dd-yusa mmic wanita wenni iccin agřa nnek ak-d temɣarin n farq-ccɣeř, tɣarṣed as i uyenduz iṣeḥḥen!’ 31 Inna as babas: ‘A mmi, tuɣa cek akidi řebda, aqa marra min iǧan inu aqa nnek. 32 Maca tuɣa ittxeṣṣa ad nfarḥ ad nezhu, minzi umac wanita tuɣa immut, maca iddar ɛawed, tuɣa iweddar uca ittwaf!’ ”