Axřaq n Yeccu Lmasiḥ
2
1 Deg wussan nni iffeɣ-dd ijj n řumur zi qayṣar Uɣustus ḥima ad ttwazemmemen marra imezdaɣ n řeḥkamet nnes. 2 Azemmem-a tuɣa-t d amezwaru umi tuɣa Qiriniyus iḥekkem di Suriya. 3 Kuř ijjen iřuḥ ɣar tendint nnes ḥima ad ittwazemmem dinni. 4 Igeɛɛed ɛawed Yusuf zi Nnaṣira, ict n tendint di Ljalil, ɣar Yahudiyya ɣar tendint n Dawud tenni umi qqaren Bayt-Laḥm umi t tuɣa zi taddart u zeg warraw n Dawud, ■ 5 ḥima ad ittwazemmem ak-d Maryam, tanexḍabt nnes, tenni tuɣa s ddeyset. 6 Uca imsar, ařami ten tuɣa dinni, qefřen wussan nnes ḥima ad taru. 7 Turuw-dd Mmis amenzu, tessenneḍ i-t di teḥřucin uca tessars i-t di řmedwed, minzi war ɣarsen bu wemcan mani zemmaren ad qqimen. ■
Imeksawen d lmalakat
8 Di jjwayeh nni tuɣa din ca n imeksawen, ḥeṭṭan tiḥimriwin nsen di ǧiřet. 9 U xzar, Lmalak n AREBBI ibedd-dd ɣarsen uca aɛuǧi n SIDI issarɣ xasen, inneḍ asen uca třeḥḥef asen ict n tiggʷudi temɣar.
10 Inna asen Lmalak nni: “War tteggʷedem ca, ad awem-dd ssiwḍeɣ ict n řefraḥet temɣar i ɣa yiřin i ddunect marra.
11 Aqa ittwaxřeq awem-dd ass-a Umsenjem, SIDI, Lmasiḥ, di tendint n Dawud.
12 D wa d awem i ɣa yiřin d řeɛřamet: Ad tafem aseymi ittwanneḍ di teḥřucin, immars di řmedwed.”
13 Řexdenni iban-dd ak-d Lmalak ijj n řɣaci n řɛeskar n ujenna ttṣebbaḥen AREBBI, qqaren: ■
14 “Aɛuǧi i AREBBI di řuɛřa,
řehna x temmurt,
u asitem d aṣebḥan i yewdan.” ■
Imeksawen di Baytlaḥm
15 Umi xasen uyuren lmalakat ɣar ujenna, ssiwřen imeksawen ak-d wayawya, nnan: “Ejj aneɣ ad nraḥ ɣar Bayt-Laḥm ḥima ad nẓar min imsaren min xef d aneɣ issargeb SIDI.”
16 Usin-dd s tazřa, ufin Maryam d Yusuf d Useymi immars di řmedwed.
17 Umi t ẓrin, ɛawden awař i d asen ittwannan x Useymi.
18 Marra inni isřin, ttbehten s min d asen nnan imeksawen.
19 Maca Maryam tuɣa txemmeř marra awařen-a, tᵉttxarraṣ daysen deg wuř nnes. 20 Xenni ɛeqben-dd imeksawen, ttṣebbaḥen u ssemɣaran di AREBBI x marra min sřin d marra min ẓrin, nican am mammec i d asen tuɣa ittwanna.
Axtan n Yeccu Lmasiḥ
21 Umi kemmřen tmenya n wussan ḥima ad ittwaxten Useymi, semman t ‘Yeccu’, am mammec tuɣa t isemma Lmalak qbeř ma ad ittwaksi deg uɛeddis. ■ 22 Umi kemmřen wussan n usizdeg nnes ɛlaḥsab Ccariɛa n Musa, iwyen t ɣar Urcalim ḥima ad t qeddmen zzat i SIDI, ■ 23 - am mammec tura di Ccariɛa n SIDI: ‘Aqa kuř mmis amenzu i dd-ittwaxeřqen zeg uɛeddis n yemmas ad ittwasemma d amqeddas i SIDI!’ - , ■ 24 u ḥima ad ḥḍaren taɣarṣt am mammec tᵉttwanna di Ccariɛa n SIDI: tnayen n idbiren niɣ tyuya n iwarruḍen n idbiren. ■
Řefraḥet n Cimɛun d Anna
25 Tuɣa di Urcalim ijj n weryaz qqaren as Cimɛun. Tuɣa aryaz-a nican d amsegged, ittraja afewwej n Israil uca tuɣa Arruḥ Iqeddsen xas.
26 Tuɣa Arruḥ Iqeddsen iweḥḥa as-dd aqa war ittmetti ca ař dd-iẓar Lmasiḥ n SIDI. 27 Yusa-dd ɣar Zzawect Tameqqrant am t iɛarren Arruḥ Iqeddsen, umi dd-udfen lwalidin s Uḥenjir Yeccu ḥima ad as ggen ɛlaḥsab lqaɛida n Ccariɛa. 28 Iksi t deg iɣaǧen nnes uca ibarek AREBBI, inna:
29 “Ejj amsexxar nnek ad iraḥ di řehna řexxu, a Sidi inu,
ɛlaḥsab awař nnek, ■
30 minzi tiṭṭawin inu ẓrint arreḥmet nnek, ■
31 i tesswejded zzat i wudem n marra řegnus: ■
32 tafawt yareqqen i řegnus,
d uɛuǧi i řgens nnek Israil!” ■
“Aqa wa immars i uweṭṭu d tnukra n waṭṭas di Israil,
u ɛawed i řeɛřamet i ɣa ittwaɛekksen. ■
35 Ad icuqq ɛawed ssif di řeɛmar nnem,
ḥima ad dd-ttwasseḍharen ixarriṣen zeg waṭṭas n wuřawen.”
36 Ict n tnabit, qqaren as Ḥanna, yeǧis n Fanwil, zi teqbič n Acir, tuɣa-tt uřa d nettat tewsar aṭṭas. Teddar ak-d weryaz nnes sebɛa n iseggʷusa zeg wami tt tuɣa ɛad d taɛzarect. 37 Tuɣa-tt d tajjač i yijj n řmijař n arebɛa u-tmanyin n iseggʷusa, war tᵉttbeɛɛid ca x Zzawect Tameqqrant, tuɣa tɛebbed AREBBI s uẓummi d tẓaǧit ǧiřet d wass. ■ 38 Ɣar tsaɛɛet nni tbedd nettat ɛawed, tᵉttṣebbaḥ i SIDI, tessawař xas ak-d marra inni ittrajan aṣřaḥ n Urcalim. □ 39 Umi kemmřen nitni kuřci ɛlaḥsab Ccariɛa n SIDI, ɛeqben ɣar tendint nsen Nnaṣira di Ljalil. 40 Tuɣa Aḥenjir iggam, yarenni dayes Arruḥ, idweř iccur s tiɣit, u arḍa n AREBBI aqa-tt xas. ■
Yeccu di Zzawect Tameqqrant řami igga tenɛac n isseggʷusa
41 Tuɣa řaǧ nnes ttraḥen kuř aseggʷas ɣar Urcalim di Řɛid n Tɣarṣt n Useɛdu. ■ 42 Umi ɣares yiweḍ tenɛac n iseggʷusa, geɛɛden ɣar Řɛid am mammec nnumen nitni. 43 Awarni řami ɛdun wussan n Řɛid, řami dd-ɛeqben, iqqim Uḥenjir Yeccu awarni asen di Urcalim, umi Yusuf d yemma as war argiben ca x man aya. 44 Ittɣiř asen aqa-t jar imsebriden. Awarni řami uyuren ict n ticři n wass, arezzun xas jar řaǧ d imeddukkař nsen. 45 Umi war t ufin, ɛeqben ɣar Urcalim, arezzun xas. 46 Awarni třata n wussan ufin t di Zzawect Tameqqrant, tuɣa iqqim di řwest n imesɣaren n Ccariɛa, ittesřa ɣarsen, ittseqsa ten. 47 Marra inni d as isřin, ttbehten di řefhamet d wawař i dd-ittarra. ■ 48 Řami t ẓrin, tbehten. Tenna as yemmas: “A mmi, mayemmi d aneɣ teggid ammu? Aqa, babac d necc nedɛeq s tarezzut xak.” 49 Inna asen: “Mayemmi xafi tarzum? Ma war targibem ca belli ittxeṣṣa ayi ad iřiɣ di Taddart n Baba?” 50 Maca war fhimen awař i d asen inna. ■ 51 Uca ihwa-dd akidsen ɣar Nnaṣira, tuɣa ittegg asen array. Maca yemmas txemmeř marra awařen-a deg wuř nnes.
52 Uca tuɣa Yeccu yarenni di tiddi d tiɣit d arḍa ɣar AREBBI d yewdan. ■