Tanukra
16
1 Umi iɛdu ssebt, tesɣa Maryam n Majdala d Maryam, yemmas n Yaɛqub, d Salumi řeɛṭur ḥima ad t dehnent. ■ 2 Ɣar ṣṣbeḥ zic deg wass amezwar n simana iwḍent-i-dd ɣar wenḍeř ařami dd-tenqar tfuct. 3 Nnant jar asent: “Wi d aneɣ i ɣa isseqnunnyen taṣḍart nni iǧan x wadaf n wenḍeř?” 4 Řami xzarent, ẓrint aqa taṣḍart tᵉttwasseqnunni zeg wenḍeř, waxxa tuɣa temɣar aṭṭas. 5 Řami udfent ɣar wenḍeř, ẓrint ijj n ubřiɣ iqqim ɣar uɣezdis afusi, yarḍ arruḍ d acemřař d azirar uca nitenti nnxeřɛent. ■ 6 Maca netta inna asent: “War ttnexřiɛent ca! Kennint tarezzunt x Yeccu Nnaṣiri wenni ittwaṣellben. Aqa Netta ikkar, war da iǧi, xzarent, aqa amcan mani t ssarsen. ■ 7 Maca ruḥent, inint i imeḥḍaren nnes uřa i Buṭrus, aqa ad awem izwar ɣar Ljalil. Dinni ad t tẓarem am mammec tuɣa i d awem inna.” ■ 8 Ffɣent deɣya uca arewřent zeg wenḍeř, minzi tqebs i-tent tarjijit d ddehcan uca war t nnint i ḥed, minzi tuɣa ggʷedent. ■ Aḍḥar n Yeccu awarni i tnukra nnes
9 Řami dd-ikkar Netta zic deg wass amezwar n simana, iḍhar-dd d amezwaru i Maryam n Majdala tenni zi tuɣa issuffeɣ sebɛa n ccwaṭen. ■
10 Tanita truḥ uca txebbar aya i yenni tuɣa akides iǧan, inni tuɣa iceḍnen u ttrun.
11 Řami ina sřin belli Netta aqa iddar uca iban asent, war zzaysent uminen.
12 Awarni aya iban-dd s yijj n waddud nneɣni i tnayen zzaysen umi tuɣa gguren nitni ɣar ijj n dcar. ■
13 Uřa d ina ruḥen ɛawed uca xebbaren inneɣni, maca war ten uminen.
Abarreḥ s L’Injil
14 Řexdenni iban-dd i ḥiṭac ařami tuɣa qqimen ɣar ṭṭabřa uca iɛayar i-ten minzi war uminen u minzi ssqesḥen uřawen nsen, minzi war uminen zeg inni t iẓrin awarni řami dd-ittwassnekkar Netta. ■
15 Inna asen: “Ruḥem ɣar ddunect marra, barrḥem s Řexbar Aṣebḥan di marra min dd-yejja AREBBI. ■
16 Wenni i ɣa yamnen uca ad ittwasseɣḍeṣ, aqa ad iddar, maca wenni war yuminen, ad ittwaḥaseb. ■
17 Tina d řeɛřamat i ɣa iḍfaren inni i ɣa yamnen: aqa nitni ad ssuffɣen ccwaṭen s Yisem inu uca ad ssiwřen s iřsawen n jdid, ■
18 ad ksin ifiɣran s ifassen nsen u mařa swin min ineqqen, war ten iḍḍarri ca man aya uca ad ssarsen ifassen nsen x imehřac, xenni ad ggenfan.” ■
Tameksit n Yeccu ɣar ujenna
19 Awarni řami kidsen issiweř, immeksi Siditneɣ Yeccu ɣar ujenna uca issɣim ixef nnes x ufusi n AREBBI. ■ 20 Maca nitni ffɣen uca barrḥen di kuř amcan u Siditneɣ tuɣa ixeddem akidsen uca issars řxeṭ nnes x wawařen nsen s řeɛřamat i t-i-dd iḍeffaren. Amin.
Aneggar n Řexbar Aṣebḥan Iqeddsen am mammec t ibarreḥ Markus. ■