Asgenfi n ijj n uneɛḍab
2
1 Yudef Yeccu ɛawed ɣar Kafarnaḥum i ca n wussan. Řami sřin belli aqa-t di taddart. ■ 2 munen xas waṭṭas n iwdan, ařami war zemmaren ad dd-awḍen uřa ɣar tewwart, u Netta tuɣa issawař akidsen s wawař. 3 Usin-dd ca ɣares, iwyen-dd ijj n uneɛḍab ɣares, arbun t-i-dd jar asen arebɛa n yeryazen. ■ 4 Minzi war zemmaren ad dd ɣares dd-qarrben zi ssibbet n řɣaci, ksin cwayt zi tzeqqa sennej amcan mani tuɣa Yeccu, uca ssehwan-dd tassut min xef izzeř uneɛḍab. 5 Umi iẓra Yeccu l’iman nsen, inna i uneɛḍab: “A mmi, aqa ddnub nnek ttwaɣfaren.” 6 Tuɣa qqimen din ca n imseřmaden n idlisen, ttxarraṣen deg wuř nsen: 7 “Min iɛna wa i ittceqqafen ammu? Wi izemmaren ad iɣfar ddnub mɣir AREBBI weḥḥdes?” ■ 8 Řexdenni yuca Yeccu s Arruḥ nnes belli aqa ttxarraṣen ammu deg ixef nsen. Inna asen: “Mayemmi tᵉttxemmamem di man aya deg wuřawen nwem? 9 Min ihewnen ad iniɣ i uneɛḍab: ‘Ttwaɣfaren ddnub nnek!’ niɣ ad iniɣ: ‘Kkar, ksi tassut nnek uca uyur!’?
10 Maca ḥima ad tessnem belli Mmis n bnadem ɣares ṣṣulṭa x temmurt maḥend ad iɣfar ddnub - inna xenni i uneɛḍab -
11 ‘Necc ad ac iniɣ: Kkar, ksi tassut nnek u ruḥ ɣar taddart nnek!’ ”
12 Deɣya ikkar, řexdenni iksi tassut nnes uca iffeɣ qibač i marra iwdan, ařami tbehten marra, ssemɣaren di AREBBI, nnan: “Ɛemmarṣ war neẓri man aya!”
Tařaɣit n Yeccu Lmasiḥ x Matta Lawi
13 Xenni iffeɣ ɛawed ɣar řebḥar, uca yusa-dd ɣares řɣaci marra uca isseřmed i-ten. ■
14 Am yeɛdu, ibarq Lawi mmis n Ḥalfa, iqqim ɣar taddart n ḍḍariba, uca inna as: “Ḍfar ayi-dd!”. Ikkar uca iḍfar i-t.
15 Am iqqim Netta ɣar umensi di taddart nnes, tuɣa aṭṭas n ayt n ḍḍariba d imednab qqimen ak-d Yeccu d imeḥḍaren nnes, minzi tuɣa aten deg waṭṭas uca ḍfaren t.
16 Umi ẓrin imseřmaden n idlisen d Ifarisiyyen aqa ittett ak-d ayt n ḍḍariba d imednab, nnan i imeḥḍaren nnes: “Mayemmi ittett, isess ak-d ayt n ḍḍariba d imednab?”
17 Řami isřa Yeccu man aya, inna asen: “Inni iṣeḥḥen war ḥdijen ca aḍbib, maca imehřac wah. Aqa war dd-usiɣ ḥima ad řaɣiɣ i yenni iseggden maca i imednab.” ■
Aseqsi x uẓummi
18 Tuɣa imeḥḍaren n Yuḥanna Amseɣḍaṣ d Ifarisiyyen ttẓumman. Xenni usin-dd ɣares, nnan as: “Mayemmi ttẓumman imeḥḍaren n Yuḥanna d Ifarisiyyen, maca imeḥḍaren nnek war ttẓummin ca?” ■
19 Inna asen Yeccu: “Ma zemmaren tarwa n umuřay ad ẓummen d umuřay ɛad akidsen? Lla, min ɣa yekk umuřay ɛad akidsen, war zemmaren ad ẓummen. ■ 20 Maca ad dd-asen wussan xmi d ɣa immeksi umuřay xasen, uca xenni ad ẓummen, deg wussan nni. 21 War iǧi ḥed ittxeyyeḍ taneqqič zi tcuqqet n jdid x warruḍ aqdim, niɣ xenni taneqqič n jdid ad teqřeɛ zeg warruḍ abuřay, uca ad idweř ucarreg imɣar. 22 Uřa d ijj war ittfarreɣ binu n jdid di txuncay tiqdimin, ḥima binu n jdid war ittcarrig tixuncay u tixuncay ad ḍeyyɛent uca binu ad izeǧeɛ. Maca ittxeṣṣa ad ittwaffareɣ binu n jdid di txuncay n jdid.” ■
Lmasiḥ d Bab n ssebt
23 Xenni imsar aqa icuqq deg iyyaren n imendi di ssebt uca imeḥḍaren nnes bdan ttekksen tidrin am gguren. ■ 24 Nnan as Ifarisiyyen: “Xzar, mayemmi tteggen di ssebt min war iḥeǧřen?” ■ 25 Inna asen Yeccu: “Ma war teɣrim qaɛ min igga Dawud, řami tuɣa ittwaḥṣar, iṭṭef i-t řaẓ, netta d yenni akides? ■ 26 Mammec dd-yudef ɣar Taddart n AREBBI deg wussan n Abyatar, arrays n ikehhanen, uca icca aɣrum n wescan n SIDI i war iḥeǧřen ad t ccen mɣir ikehhanen waha, uca iwca ɛawed i yenni tuɣa akides?” ■ 27 Xenni inna asen: “Aqa ass n ssebt ittwagg i bnadem, maci bnadem i ssebt. 28 Ammu i iǧa Mmis n bnadem uřa d Bab n ssebt.” ■