Ccariɛa n Arebbi war tᵉttis ak-d tɣuri d tweṣṣa n iwdan
15
1 Řexdenni usin-dd ca n imseřmaden n idlisen d ca n Ifarisiyyen zi Urcalim ɣar Yeccu, nnan: ■ 2 “Mayemmi ttɛeddan imeḥḍaren nnek x tubbart n řejdud? Minzi nitni war ssiriden ca ifassen nsen qbeř i ɣa ccen aɣrum.” 3 Yarra-dd Yeccu, inna asen: “Mayemmi kenniw ɛawed tᵉttɛeddam x tewṣeyyet n AREBBI zi ssibbet n tubbart nwem? 4 Minzi AREBBI tuɣa inna: ‘Weqqar babac d yemmac!’ u: ‘Wenni i ɣa ineɛřen x babas niɣ x yemmas, ittxeṣṣa as ad immet!’ ■ 5 Maca kenniw teqqarem: ‘Marra wi i ɣa yinin i babas niɣ i yemmas: Marra min tzemmarem ad zzayi tnefɛem, aqa ggiɣ t d tawhibt i Arebbi!, 6 aqa netta war iḥdij ɛad ad iweqqar babas niɣ yemmas s marra man aya!’ Ammu tbeṭṭřem awař n AREBBI di ṭṭweɛ n tubbart nwem. ■ 7 Kenniw, a imnafqen! Icaɛya tuɣa ittnabba xawem s ṣṣeḥ, inna: 8 ‘Řgens-a ittcenneɛ ayi s iyencicen nsen, maca uř nsen iggʷej xafi. ■ 9 Aqa nitni cennɛen ayi baṭeř, minzi nitni sseřmaden tiɣuriwin nni iǧan d tiweṣṣa n iwdan.’ ” ■ 10 Řami d iřaɣa-dd x řɣaci ɣares, inna asen: “Sřem mliḥ, fehmem! ■
11 War iǧi min ittadfen deg uqemmum issexmej bnadem, maca min i dd-itteffɣen zeg uqemmum d man aya i issexmajen bnadem.” ■
12 Řexdenni usin-dd ɣares imeḥḍaren nnes, nnan as: “Ma tessned belli Ifarisiyyen ɣewwɣen, řami sřin man aya?”
13 Maca Netta yarra-dd, inna asen: “Kuř aɣeddu, war t iẓẓu Baba wenni iǧan deg ujenna, ad ittwaqřeɛ. ■
14 Ejj i-ten! Nitni d idarɣařen neddhen idarɣařen. Mařa adarɣař ineddeh adarɣař, ad wḍan s tnayen idsen deg weḥfur.” ■
15 Yarra-dd Cimɛun Buṭrus, inna as: “A Sidi, fessar aneɣ amedya aya!” ■
16 Maca Yeccu inna asen: “Ma kenniw ɛad břa řefhamet ař řexxu?
17 Ma war tefhimem ca belli marra min ɣa yadfen deg uqemmum, ad iraḥ ɣar uɛeddis uca ad iffeɣ deg wemcan nnes?
18 Maca min i dd-itteffɣen zeg uqemmum ittas-dd zeg wuř, aqa d man aya i issxemmajen bnadem.
19 Minzi zeg wuř n iwdan i zi dd-tteffɣen ixarriṣen iɛeffanen, zzina, anɣay, farq-ccɣeř, tuceffra, cchadat s ẓur d uceqqef. ■ 20 Aqa d man aya min issxemmajen bnadem, maca macca s ifassen war issirden war tessxemmij ca bnadem.”
Liman n temɣart zeg ayt n Kenɛan
21 Řexdenni iffeɣ-dd Yeccu ssenni, iruḥ ɣar jjwayeh n Ṣur d Ṣaydun. ■ 22 U xzar, ict n temɣart zeg ayt n Kenɛan zi temmurt nni tesɣuyy, tenna: “A Sidi, a mmis n Dawud, arḥem ayi! Yeǧi aqa dayes cciṭan.” 23 Maca Netta war xas dd-yarri ca, uřa s yijj n wawař. Xenni usin-dd ɣares imeḥḍaren nnes, ttaren zzayes, nnan: “Aẓẓeř xas, minzi nettat teḍfar aneɣ-dd s iɣuyyan.” 24 Netta yarra-dd, inna asen: “Necc ttwassekkeɣ-dd ɣar wuǧi iweddaren n taddart n Israil waha.” ■ 25 Maca nettat tusa-dd, tesjed as, tenna: “A Sidi, ɛawen ayi!” 26 Maca Netta yarra-dd, inna: “War iɛeddeř ad immeksi weɣrum n iḥenjiren, maḥend ad immenḍar i yiṭan.” 27 Maca nettat tenna: “Wah, a Sidi, maɣar uřa d iṭan ttᵉtten iřeqqwaz i dd-iweṭṭan zi ṭṭabřa n siditsen uca ttɣiman ddaren.” 28 Řexdenni inna as Yeccu: “A tamɣart, l’iman nnem imɣar! War ittiři mɣir řxaḍar nnem.” Uca yeǧis teggenfa di tsaɛɛet nni.
Yeccu issgenfa aṭṭas n iwdan
29 Uca yuyur Yeccu ssenni, yiweḍ-dd ɣar tma n řebḥar n Ljalil, igeɛɛed ɣar wedrar, iqqim dinni. ■ 30 Yusa-dd ɣares ijj n ubarru ameqqran n řɣaci, iwyen-dd akidsen ineɛḍaben d idarɣařen d ignawen d iqejdaḥen d inneɣni aṭṭas, ssarsen ten ɣar iḍaren n Yeccu uca issgenfa ten, ■ 31 ařami itebhet řɣaci, aqa ẓrin ignawen ssawařen, iqejdaḥen ggenfan, ineɛḍaben gguren, idarɣařen ttwařan, uca ssɛuǧen AREBBI n Israil.
Lmuɛjiza n usecci i twařa wiss tnayen n ktar n arebɛa-ařaf n yeryazen
32 Yeccu iřaɣa-dd x imeḥḍaren nnes, inna asen: “Ḥinneɣ x řɣaci minzi qqimen akidi třata n wussan, war ɣarsen min ɣa ccen. War xseɣ ca ad ten ssqebḍeɣ amenni s řaẓ ḥima war tteḍɛifen ca deg webrid.” ■ 33 Nnan as imeḥḍaren nnes: “Manis d ɣa nawi aɣrum di řexřa-ya i zi ɣa nessecc ijj n řɣaci d ameqqran am wanita?” 34 Inna asen Yeccu: “Mecḥař ɣarwem d aɣrum?” Nnan as: “Sebɛa n tecnifin d ca n iseřman imeẓyanen.” 35 Xenni yumur řɣaci ḥima ad qqimen di temmurt. 36 Xenni iksi sebɛa n tecnifin d iseřman nni, iqada Arebbi, yarẓa i-tent uca iwca i-tent i imeḥḍaren nnes uca nitni wcin tent i iwdan. ■ 37 Marra ccin, jjiwnen. Xenni yarwen-dd iřeqqwaz iceṭṭen: tuɣa din sebɛa n tsuǧatin ɛemmarent. 38 Inni tuɣa iccin aqa aten di arebɛa ařaf n yeryazen břa timɣarin d iḥenjiren. 39 Awarni řami issqebeḍ řɣaci, inya di tɣarrabut uca yiweḍ ɣar weymir n jjwayeh n Magdu.