3
1 Uct x tendint n idammen! Aqa-tt d axarriq d lɛunf marra,
tukkarḍa war tᵉttbeddi ca. □
2 Řḥess n urekkuḍ,
řḥess n uqarqeb n tjarrarin,
aseqřeɛ n iysan
d ikarruten ineṭṭwen.
3 Amennay inya,
ssif ittwesseg,
fritca aqa-tt am wassam.
Aṭṭas d inni ittwanɣen
u aqa din aɛurric n imettan,
tirrimin war ɣarsent řḥed,
wah, ttenqraḍen di řxecbat nsen.
4 Zi ssibbet n waṭṭas n farq-ccɣeř n temɣart řmuḥesna,
n lalla n tseḥḥart,
tenni izznuzan řegnus s farq-ccɣeř nnes
uřa d marra tiqebbař s useḥḥar nnes,
5 xzar, s uya ad xam iřiɣ,
ammu iqqar SIDI n řɛeskar,
u Necc ad ssgeɛɛdeɣ timuwwa n warruḍ nnem tiwwa i uɣembub nnem,
u Necc ad ssecneɣ i řegnus tuɛɛaryent nnem,
u řefḍiḥet nnem i tgeldiwin.
6 Necc ad cem řeqfeɣ s nnɛawat,
u ad cem ssfeḍḥeɣ
u ad cem arreɣ i usfurrej.
7 Xenni ad imsar aqa man wen ma cem i ɣa iẓaren,
ad zzayem yarweř, ad yini “Tandint n Ninwa txarreb!
Wi zzayes i ɣa iceḍnen?”
Mani d am i ɣa yarzuɣ inni cem i ɣa issfewwjen?
8 Ma cem ḥsen zi Nu-Amun
nni ittɣiman ɣar iɣezran,
am d as qewwaren waman,
ařami řebḥar d acbar nnes n zzat,
aqa řḥiḍ nnes igeɛɛed zi řebḥar.
9 Kuc tuɣa d ṣṣulṭa nnes
uřa ɛawed Misřa, u war tuɣi ɣares aneggar.
Fuṭ d ayt n Libiya tuɣa aten zeg imɛawnen nnek.
10 Uřa d nettat tuyur di lmenfa,
di tmeḥbast.
Uřa d iḥenjiren nnes ttwařebzen di tɣemmura n marra n tebridin,
u x imcennɛen nnes nḍaren xasen taqedduḥt
u marra imɣaren nnes ttwacarfen s ssnaseř.
11 Uřa d cem ad tescared
ad tessnuffared ixef nnem.
Ɛawed cem ad tarzud ijj n lburj i udurri zi řeɛdu nnem.
12 Marra lbarajat nnem am wurtan
ak-d řbacur.
Mařa ttwanhezzen, ad wḍan
deg uqemmum n wenni ixsen ad ten yecc.
13 Xzar, aqa d wa d řgens nnem, aqa-t d timɣarin.
Ttnurzment tewwura n temmurt nnem qaɛ i řeɛdu,
timessi ad tecc iɛumad nnem n wefray.
14 Ayem aman i yixef nnem i řeḥṣaret,
semten lburjat nnem,
bedd di třaxt,
ɛefs di tarrist,
seqseḥ iẓra ittwassuydan!
15 Timessi ad cem tecc din,
ssif ad cem ineɣ,
ad cem tecc am bu-weřsaḥ!
Arni deg ixef nnem am bu-weřsaḥ,
arni deg yixef nnem am tmurɣi.
16 Cek tessmarnid deg isebbaben nnem
ktar zeg itran n ujenna.
Bu-weřsaḥ ad issars tiřmect nnes uca ad iḍwa.
17 Iɛessasen nnem n arrimet am yijj n weyřaf n tmurɣi
u řqebṭanat nnem am ixenfusen imeqqranen,
inni yarsan di řeḥyuḍ deg yijj n wass d aṣemmaḍ.
Řami dd-tenqar tfuct, ṭṭawen ssenni deɣya.
War issin ḥed amcan nsen. Mani ruḥen nitni?
18 Iničan nnek ttnudumen, aya, ajeǧid n Accur,
ayt n jjehd nnek ttᵉṭṭsen,
řgens nnek ad t zeǧɛen x idurar,
uca uřa d ijjen war ten issmun ca.
19 War din asgenfi i tareẓẓit nnek,
ittekkes ac uyezzim!
Marra inni i xak isřin řexbar,
ad ccaten deg ifassen zi ssibbet nnek,
maɣar x man wen war iɛeddu ca řebda řɣar nnek?