Acetci n SIDI x řgens nnes u x Urcalim
6
1 “Sřem xenni min iqqar SIDI: Kkar, carreɛ zzat i wudem n idurar,
u ejj tiwririn ad sřent i tmijja nnek!
2 Sřem, a idurar, i ddeɛwet n SIDI,
uřa d kenniw, dsusa imetnen n temmurt,
minzi SIDI ɣares ict n ddeɛwet ak-d řgens nnes
Netta iggur ɣar taddart n ccreɛ ak-d Israil.” ■
3 “A řgens inu, min d ac ggiɣ,
u s manten i zi cek ssiḥřeɣ? Cehhed ḍidd inu!
4 Necc nedheɣ cek zi temmurt n Miṣra,
zi taddart n tesmuɣi.
Necc ssekkeɣ-dd Musa d Harun d Maryam zzat i uɣembub nnek. ■
5 A řgens inu, fekkar mliḥ di řɣar i tuɣa inekkʷa ad yegg Balak, ajeǧid n Mu’ab,
u di min xas dd-yarra Bilɛam, mmis n Baɛur
u di min imsaren zi Sittim ař Jiljal,
ḥima ad tessned timegga iseggden n SIDI.” ■
Min yarezzu SIDI zi jar řgens nnes?
6 “S min zi ɣa raḥeɣ ad mmeřqiɣ ak-d SIDI,
ad aḍareɣ zzat i Arebbi yuɛřan?
Ma ad raḥeɣ ad t mmeřqiɣ s tɣarṣa n wecmaḍ,
niɣ s iyenduzen n ijj n useggʷas? □
7 Ma ad yarḍa SIDI s řuřuf n icarriyyen,
s ɛecra n řuřuf n tɣezratin n zzect?
Ma ad wceɣ amenzu inu i uxeṭṭu inu,
řɣiǧet n uɛeddis inu i ddnub n řeɛmar inu?
8 Netta issargeb i cek, a bnadem, min icnan,
u min zzayek ittettar SIDI, aqa ad tegged řxar,
ad texsed tamexsiwt icewwaren,
u ad tuyured ak-d AREBBI nnek s uwaḍeɛ!” ■
Areddeǧ n iɛeffanen
9 “Tmijja n SIDI tᵉttřaɣa i tendint.
Isem nnek ittawi-dd ufekki.
Sřem i weɛmud u ɣar wenni t-i-dd issekken!
10 Ma din ɛad řexzin ccuren s řɣar di taddart n uɛeffan
uřa d ijj n nnɛi n řmud n ifa inqeṣ?
11 Ma izemmar ad iřiɣ d amezdag s řmizanat n řɣar,
u s yict n tecyart teccur s řewznat iɣeccen? ■
12 Ayt bu-wagřa nnes aqa ccuren s lɛunf,
uřa d imezdaɣ nnes qqaren ixarriqen
u iřes nsen aqa ittɣecca deg uqemmum nsen.” ■
13 “Xenni Necc aqa jarḥeɣ cem s teyyita,
aqa tᵉttwareddǧed zi ssibbet n ddnub nnem.
14 Ad tecced, maca war tᵉttjiwined,
u ad dayem yiři řaẓ di daxeř nnem.
Ad teffɣed,
maca war tnejjmed,
u min inejmen,
ad t sseɛduɣ i ssif. ■
15 Ggur ad tzarɛed, maca war tmejjared,
ad teddzed aẓemmur, maca war tdehhned ixef nnem s zzect
ad tẓemmed uřa d binu n jdid zeg uḍiř, maca war ggur ad tesswed binu. ■
16 Maɣar nitni ḥeṭṭan tiweṣṣa n Ɛumri
u marra timegga tiɛeffanin n taddart n Axab,
u kenniw tḍeffarem řecwar nsen,
ařami cem i ɣa yarreɣ i ureddeǧ uřa d imezdaɣ nnes i usemẓi.
Ammu i ɣa yarbun nitni řḥegra n řgens inu.” ■