Řḥukkam d inabiyyen n Israil ttfecřen
3
1 “Xenni nniɣ necc: ‘Sřem, a kenniw, izeǧifen n Yaɛqub,
u kenniw, řḥukkam n taddart n Israil!
Ma war ittxeṣṣi i kenniw ad tessnem tasɣart?
2 Nitni carrhen min icnan
u ttexsen min iǧan d aɛeffan!
Nitni kksen asen tiřmect
uřa d aysum x ixsan nsen.
3 Wah, aqa aten d yenni ittetten aysum n řgens inu
uca kksen asen tiřmect uca ttareẓẓan ixsan nsen.
Nitni ttbezzaɛen ten am di marmita,
am weysum deg uṭenjir.”
4 “Řexdenni ad sɣuyyen ɣar SIDI,
maca war xasen dd-ittarri.
Ad xasen iffar udem nnes di řweqt nni,
zi ssibbet n řɣar i iggin.”
5 “Ammu i iqqar SIDI i inabiyyen
inni ittɣarran řgens inu,
inni umi ɣarsen ɛad min di i ɣa izeɛfen s teɣmas nsen,
ad řaɣan ‘Řehna!’,
maca ḍidd n wenni war d asen ittegg walu deg uqemmum nsen,
ad xas qeddsen ijj n umenɣi. ■
6 X uyenni ad xawem dd-tewḍa ǧiřet břa tameẓriwt,
u ad xawem dd-iwḍa taǧest břa tagezzant
uca ad teɣři tfuct x inabiyyen
u ad ibbarcen wass tiwa nsen. ■
7 Imwařawen ad sseḍḥan,
u igezzanen ad dewřen zewɣwen s řeḥya,
u nitni marra ad dřen ccnabar nsen,
minzi twarrit n AREBBI war dd-tᵉttis ca.
8 Maca necc ccureɣ s jjehd
n Arruḥ n SIDI,
u s řḥeqq d teryast,
ḥima ad barrḥeɣ i Yaɛqub x uxeṭṭu nnes
u i Israil x ddenb nnes.”
9 “Sřem xenni ɣar man aya, a izeǧifen n taddart n Yaɛqub
u kenniw imeqqranen n taddart n Israil,
inni icarrhen řḥeqq,
u ssfarraɣen marra min iǧan iseggem, ■
10 inni ibennan Ṣihyun s idammen,
u Urcalim s řɣecc. ■
11 Izeǧifen nnes ttḍebbaran ddɛawi i arrecwet,
ikehhanen nnes sseřmaden s řmunet,
u ikehhanen nnes ttgezzanen s ttmenyat.
Aqa nitni ttcařen x SIDI xmi qqaren:
‘Ma war iǧi SIDI di řwest nneɣ?
War d aneɣ iřeqqef řɣar.’
12 X uya, aqa-tt zzaywem,
aqa ad carzen Ṣihyun am ijj n yeyyar,
ad tedweř tendint n Urcalim d ict n řxarbet,
u adrar n Taddart d řegɛudi n wezɣar.” □