Yunus deg umseřman
2
1 Issewjed SIDI ijj n wesřem ameqqran ḥima ad isseɣri Yunus uca Yunus ikka třata n wussan d třata n ǧiyaři deg uɛeddis n wesřem. ■ 2 Uca iẓẓuǧ Yunus i SIDI, AREBBI nnes, zeg uɛeddis n wesřem. 3 inna: ”Zi řeḥṣaret inu řaɣiɣ i SIDI
u Netta yarra-dd xafi.
Zeg weḥwic n řaxart řaɣiɣ uca Cek tesřid i tmijja inu. ■
4 Tuɣa tenḍared ayi di řaǧaɣ,
deg wuř n řebḥur,
tennḍen ayi-dd řemwaj.
Marra zzhir nnek d řemwaj nnek kkin-dd xafi sennej. ■
5 Nniɣ: ‘Necc ttwasuffɣeɣ zi zzat i wudem nnek,
iři ad twařiɣ ɛawed Zzawect nnek Tameqqrant Iqeddsen.’
6 Ṭṭfen ayi waman ař mani iwḍen ɣar řeɛmar inu,
aman n řaǧaɣ nnḍen ayi-dd, iřṣeq-dd arrbiɛ n řebḥar deg uzeǧif inu.
7 Hwiɣ ɣar izuran n idurar,
ttwabellɛen zzekrunat n temmurt xafi sennej i řebda,
maca Cek tessgeɛɛded tudart inu zeg weḥfur,
a SIDI, AREBBI inu!
8 Umi idewwex řeɛmar inu dayi, fekkareɣ di SIDI,
u taẓaǧit inu tgeɛɛed ɣarek, di Zzawect nnek Tameqqrant Iqeddsen. □
9 Inni iṭṭfen deg ixarriqen ixwan,
semḥen di tmexsiwt nsen icewwaren.
10 Maca necc ad Cek ḥemdeɣ s yict n tmijja teccur s uqadi.
Min Cek waɛdeɣ, ad t qefřeɣ.
Asenjem zi SIDI.” ■
11 Issiweř SIDI ak-d wesřem uca iɛuqq-dd Yunus di řbar.