11
1 “Ařami tuɣa Israil ɛad d aḥenjir d ameẓyan, tuɣa ttexseɣ t u Necc řaɣiɣ-dd i mmi zi Miṣra. ■ 2 Nitni řaɣan xasen, maca waxa amenni ggʷejen nitni x iɣembab nsen. Nitni iwyen tiɣarṣa i Ibaɛlen u iwyen tiwhibin n řebxur i řexyařat nsen ineqcen. 3 D Necc i tuɣa isseřmaden ticři i Ifrayim. Netta iksi ten x iɣaǧen nnes, maca nitni war ssinen ca aqa necc d wenni i ten issgenfan. 4 S tesɣunin n bnadem jebdeɣ ten-dd ɣari, s tmurar n tmexsiwt, u Necc tuɣa i nitni am wenni dd-issgeɛɛaden zzayřet zeg iɣesmiren nsen, u Necc sswiẓẓḍeɣ as ifassen inu maḥend ad as wceɣ ad icc. 5 Netta war dd-ittarri s uzeǧif ɣar Miṣra. Accur, netta ad yiři d ajeǧid nnes, maɣar nitni ugin ad dd-dewřen. 6 Ssif ad inneḍ di tneddam nsen uca ad yaredeǧ iɛumad nnes n ubelleɛ n tewwura u ad ten yecc, zi ssibbet n ixarriṣen n yixef nsen.
Arreḥmet n SIDI x Ifrayim
7 Maɣar řgens inu iqqim itteṭṭef deg wecrah zi jjihet inu. Am yijj n weryaz ttřaɣan nitni ɣar Umɛuǧi x kuřci, maca Netta war ten issgiɛɛid ca. 8 Mammec zemmareɣ Necc ad cek sellmeɣ, Ifrayim? Mammec zemmareɣ Necc ad cek sellmeɣ, Israil? Mammec zemmareɣ Necc ad cek sellmeɣ am Adama, ad cek ggeɣ d amedya am Ṣabuyim? Uř inu inneḥweř zzayi, aziǧez inu ittextux jmiɛ. ■ 9 Necc war tejjiɣ ad arxuɣ řḥaduq n weɣḍab inu, Necc war dd-ddikkwiřeɣ ca maḥend ad areddǧeɣ Ifrayim, maɣar Necc d Arebbi u Necc war ǧiɣ d bnadem, Amqeddas di řwest nnek, war dd-ttiseɣ ca s isnexřiɛen.
10 Nitni ad gguren awarni i SIDI. Netta ad issmuhrut am yijj n weyrad, maɣar ad issmuhrut Netta uca iḥenjiren ad dd-asen ttarjijjin zi tma n řebḥar.
11 Am ijḍaḍ ad dd-asen ttarjijjin zi temmurt n Miṣra u am tedbirt zi temmurt n Accur u necc ad ten sszedeɣ di tudrin nsen, inna SIDI.”