Řḥukm x Israil d ikehhanen nnes
5
1 “Sřem aya, kenniw ikehhanen, ḥḍam kenniw ayt n taddart n Israil u wcem amezzuɣ kenniw aytbab n taddart n ujeǧid, maɣar tdewřem d ijj n řfex di Miṣfat d ict n tracca yarezmen x wedrar n Tabur. 2 Inni i dd-itteffɣen zeg webrid ssiǧɣen tasraft n wenɣay, maca Necc ad ten ɛaqbeɣ marra. 3 Necc ssneɣ Ifrayim u Israil war izemmar ad zzayi innuffar. Maɣar řexxu issefsed Ifrayim ixef nnes, Israil issexmej ixef nnes. 4 Timegga nsen tmenneɛ i-ten ad dd-dewřen ɣar AREBBI, maɣar ijj n buḥbeř n farq-ccɣeř aqa-t di řwest nsen uca war ssinen SIDI. ■ 5 Tunfaxt n Israil ad t idɛa s bṭayṭay. Israil d Ifrayim ad nqarḍen zi řmuɛṣiyyet nsen uřa d Yahuda ad kidsen inqarḍ. ■ 6 Nitni ad aggʷejen ak-d wuǧi nsen d ifunasen d tfunasin nsen ḥima ad arzun x SIDI, maca nitni war t ttifen. Netta aqa issnuffar ixef nnes xasen. 7 Nitni ɣdaren SIDI maɣar nitni jjin-dd tarwa n ffarq-ccɣeř. Řexxu ad ten yecc uyur amaynu ak-d tseqqař nsen n řwart.
8 Ṣuḍem deg uyicc n icarri di Jibɛa, di řɣayṭa di Rama, ad sɣuyyen imezdaɣ n Bayt-Awan: ‘Awarni ac, a Binyamin!’ 9 Ifrayim ad idweř d ict n řxarbet deg wass n lɛiqab. Necc barrḥeɣ jar tqebbař n Israil min ittwagg ad imsar.
10 Řḥukkam n Yahuda tteggen am yenni issmuṭṭuyen iẓra n weymir. Necc ad xasen zeǧɛeɣ aduqqez inu n ufugem amecnaw aman.
11 Ifrayim ittwaḥṣar, řḥeqq ittwařbez, maɣar iḍeffar ict n tewṣeyyet n řbaṭeř.
12 X uyenni Necc am tcinda i Ifrayim u am ureṣṣuḍ i taddart n Yahuda.
13 Umi iẓra Ifrayim řehřac nnes u Yahuda tareḥsit nnes, yuyur Ifrayim ɣar Accur, issekk ijj n ureqqas ɣar ujeǧid Yarib. Maca wanita war izemmar ad kenniw issgenfa u war xawem ikessi tareḥsit nwem. □
14 Maɣar Necc ad iřiɣ i Ifrayim am weyrad izehharen u am weyrad ameẓyan i taddart n Yahuda. Necc, wah Necc, ad mezzqeɣ u xenni ad uyureɣ, ad t awyeɣ uca war din wi i ɣa ifekken.
15 Necc ad ffɣeɣ u xenni ad ɛeqbeɣ ɣar wemcan inu, ɣares ař ɣa neɛmen u ad arzun udem inu. Di řeḥṣaret nsen ad xafi arzun zic ɣar ṣṣbeḥ.”