Actab n Urcalim
52
1 Ṣidqiya tuɣa ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Ḥamutal, yeǧis n Irmiya zi Libna. ■ 2 Netta igga min iǧan d aɛeffan di tiṭṭawin n SIDI, nican am mammec t igga Yahuyaqim. 3 Maɣar aya imsar minzi SIDI tuɣa ixeyyeq x Urcalim d Yahuda, ařami ten inḍar zi zzat n wudem nnes. Xenni tuɣa Ṣidqiya iɣewweɣ x ujeǧid n Babil. 4 Deg useggʷas wiss tesɛa n řeḥkamet nnes, deg wass wiss ɛecra n uyur wiss ɛecra, iffeɣ-dd Nabuxadraṣṣar, ajeǧid n Babil, s marra řɛeskar nnes ɣar Urcalim, Nitni nnḍen as-dd uca qewwaren as-dd s jjehd ɣar marra iɣezdisen nnes. ■ 5 Ammu i tᵉttwaḥsar tendint ař aseggʷas wiss ḥiṭac n ujeǧid Ṣidqiya. 6 Deg uyur wiss arebɛa, deg wass wiss tesɛa n uyur, řami idweř řaẓ imeqqar di tendint uca řgens n temmurt war ɣares iqqim bu weɣrum ɛad, 7 aqa tᵉttwarẓ tendint u marra iɛeskariyyen arewřen uca ffɣen s ǧiřet x webrid n tewwart i iǧan jar tnayen n řeḥyuḍ nni iǧan ɣar řemraḥ n ujeǧid, waxxa Ikaldaniyyen tuɣa quwwaren i tendint. Uca ajeǧid yuyur x webrid n Řewḍa. 8 Řɛeskar n Ikaldaniyyen iḍfar ajeǧid uca nitni ḥarten x Ṣidqiya di řwaṭat n Ariḥa. Marra řɛeskar nnes ttwasebḍan xas. 9 Nitni ṭṭfen ajeǧid uca iwyen t ɣar Nabuxadraṣṣar, ajeǧid n Babil, ɣar Ribla di temmurt n Ḥamat uca wanita iḥkem xas.
10 Ajeǧid n Babil inɣa iḥenjiren n Ṣidqiya zzat i ṭṭitawin nnes. Uřa d marra řḥukkam n Yahuda inɣa i-ten di Ribla.
11 Issdarɣeř tiṭṭawin n Ṣidqiya uca iqqen i-t s tnayen n ssnaseř n nnḥas. Ammu i t yiwi ujeǧid n Babil ɣar Babil uca igga i-t di řeḥbes ař ass umi immut.
12 Deg uyur wiss xemsa, deg wass wiss ɛecra n uyur, - tuɣa aseggʷas d aseggʷas wiss tseɛṭac n ujeǧid Nabuxadraṣṣar, ajeǧid n Babil - , xmi dd-yusa Nabuzaradan, řqebṭan n iɛessasen ifarzen wenni tuɣa isexxar zzat i wudem n ujeǧid n Babil, ɣar Urcalim, □
13 issarɣ netta Taddart n SIDI d taddart n ujeǧid d marra tudrin n Urcalim d marra tudrin n imcenɛen issarɣ i-tent ɛawed s tmessi.
14 Marra řɛeskar n Ikaldaniyyen, inni dd-yusin ak-d řqebṭan n iɛessasen n arrimet, aqa arẓin marra řeḥyuḍ n Urcalim min d as dd-innḍen.
15 Imezřaḍ qaɛ n řgens d min iceṭṭen n řgens nni ittwajjen di tendint uřa d icekkamen nni iffɣen ɣar ujeǧid n Babil, d min iceṭṭen n řɣaci, indeh i-ten Nebuzaradan, řqebṭan n iɛessasen n arrimet, di lmenfa.
16 Maca zeg imezřaḍ n temmurt ijja Nebuzaradan, řqebṭan n iɛessasen n arrimet, ijj n drus am imeřqaḍ n tzayart u am ifeǧaḥen.
17 Uca arẓin Ikaldaniyyen ipilaren n nnḥas di Taddart n SIDI, ikarruten d trimant n nnḥas inni tuɣa iǧan di Taddart n SIDI uca ksin marra nnḥas akidsen ɣar Babil. □ ■
18 Uřa d tiydurin d iɣenjayen d tjeqqaḍin d ṭṭawyat i urucci d tɣenjayin d marra řeqcuɛ n nnḥas i zi ttsexxaren, ksin ten.
19 Ammu i iksi řqebṭan n iɛessasen n arrimet ṭṭbaṣa d ṭṭawyat i urucci d teydurin d řeqnaḍeř d tɣenjayin d řkisan, marra min tuɣa iǧan n wureɣ qaɛ niɣ n nnuqart qaɛ. 20 X tnayen n ipilaren d trimant d tenɛac n ifunasen n nnḥas nni tuɣa iǧan sadu nnes uřa x tkarrutin nni igga ujeǧid i Taddart n SIDI, aqa nnḥas n marra řeqcuɛ-a tuɣa war izemmar ad ittwawzen. 21 X ipilaren, tuɣa řuɛřa n ijj n upilar dayes tmenṭac n iɣaǧen uca ijj n ufiřu n řeɛbar n tenɛac n iɣaǧen izemmar ad as inneḍ. Tuɣa řgedran nnes dayes arebɛa n iḍewḍan uca ɣar daxeř tuɣa-t ixwa.■ 22 Ttaj sennej nnes tuɣa-t n nnḥas. Řuɛřa n ijj n ttaj tuɣa xemsa n iɣaǧen u x ttaj tuɣa xas tracca d tiremmamin i d as dd-innḍen. Tuɣa marra n nnḥas. Amecnaw wanita, ammu tuɣa uřa d apilar nneɣni d tremmamin nnes. 23 Tiremmanin tuɣa atent di setta u-tesɛin ɣar marra iɣezdisen n usemmiḍ. Marra tiremmanin tuɣa atent di mya x tracca i d as dd-innḍen.
24 Řqebṭan n iɛessasen n arrimet yiwi-dd akides uřa d akehhan ameqqran Saraya, akehhan wiss tnayen Ṣafanya d třata n iɛessasen n tewwart. □ 25 Zi tendint iksi netta ijj n umsexxar icenɛen wenni tuɣa x iɛeskariyyen, řa d sebɛa n yeryazen nni izemmaren ad ẓaren udem n ujeǧid d yenni ittwafen di tendint, řa d amarir n ukumandar n řɛeskar nni tuɣa izemmen řgens n temmurt i umenɣi, uřa d settin n yeryazen zi řgens n temmurt nni ittwafen di řwest n tendint. 26 Nebuzaradan, řqebṭan n iɛessasen n arrimet, iṭṭef i-ten uca yiwi ten ɣar ujeǧid n Babil, ɣar Ribla. 27 Ajeǧid n Babil iwta i-ten uca inɣa i-ten di Ribla, di temmurt n Ḥamat. Ammu i ittwandeh Yahuda zi temmurt nnes ɣar lmenfa.
28 Wa d řgens nni indeh Nabuxadraṣṣar di lmenfa: deg useggʷas wiss sebɛa indeh teřt-ařaf u-třata u-ɛicrin n ayt n Yahuda.
29 deg useggʷas wiss tmenṭac n Nabuxadraṣṣar, yiwi temnem-mya u-tnayen u-třatin n iwdan zi Urcalim.
30 deg useggʷas wiss třata u-ɛicrin n Nabuxadraṣṣar indeh Nebuzaradan, řqebṭan n iɛessasen n arrimet,
sebɛa-mya u-xemsa u-rebɛin n ayt n Yahuda ɣar lmenfa.
Marra jmiɛ tuɣa aten di arebɛa-ařaf u-setta-mya n iwdan. □
Ajeǧid Yahuyakin ittaf řxaḍar di tiṭṭawin n ujeǧid n Babil
31 Deg useggʷas wiss sebɛa u-třatin n tmeḥbast n Yahuyakin, ajeǧid n Yahuda, deg uyur wiss tenɛac, deg wass wiss xemsa u-ɛicrin n uyur, issgeɛɛed Awil-Marudax, ajeǧid n Babil, deg useggʷas amezwaru n tgelda nnes, azeǧif n Yahuyakin, ajeǧid n Yahuda, uca issuffeɣ i-t-i-dd zi řeḥbes. ■ 32 Netta iɛdeř akides, iwca as řkursi nnes tiwa i řekrasi n ijeǧiden nneɣni inni tuɣa ɣares di Babil. 33 Issars Yahuyakin arruḍ nnes n řeḥbes uca idweř ittett ɣares, min ikka iddar. 34 X řmeɛteq nnes, řebda immewc as řmeɛteq nnes s ufus n ujeǧid n Babil, kuř ass min dd-ikkaren n wass nni, ař ass n řmewt nnes, min ikka iddar. □