Tasřit iɣḍaren
2
1 Yusa-dd ɣari wawař n SIDI, inna: 2 “Uyur, barreḥ deg umezzuɣ n Urcalim, ini: ‘Ammu i iqqar SIDI: Necc ttxarraṣeɣ dayem, di tmexsiwt icewwaren n temẓi nnem, x tayri n wussan n tnexḍabt nnem, umi dd ayi dd-teḍfared di řexřa, di temmurt tamessucit. 3 Israil tuɣa d amqeddes i SIDI, tamezwarut n ṣṣabet nnes. Marra wi zzayes iccin, iddakkwař dayes řɛib, iwḍa-dd xasen řɣar, ammu i iqqar SIDI.’ ”
4 “Sřem i wawař n SIDI, kenniw zi taddart n Yaɛqub, d marra řaǧat n taddart n Israil. 5 Ammu i iqqar SIDI: ‘Man řɣecc nni dayi ufin ibabaten nwem ařami xafi ḥeyyḍen uca ḍfaren řbaṭeř uca dewřen simant nsen di řbaṭeř ■ 6 u war sseqsin: Mani iǧa SIDI, wenni d aneɣ dd-issuffɣen zi Miṣra, wenni d aneɣ issecnen abrid di řexřa, x ict n temmurt n řexřa d ixendraq, x ict n temmurt n řaẓaɣ d tiři n řmewt, x ict n temmurt war xas iɛdu uřa d ijj u war dayes izdiɣ uřa d ijj n bnadem? 7 Necc iwyeɣ kenniw ɣar ict n temmurt isseɣmayen ḥima ad zzayes teccem řɣiǧet d řxar. Maca umi din tiwḍem, tessxemjem tammurt inu u tarrim tasɣart inu d jjɛifect. 8 Ikehhanen war sseqsin: Mani iǧa SIDI?, uca inni tuɣa iḥeṭṭan Ccariɛa war d ayi ssinen u imeksawen ɛeddun-dd xafi u inabiyyen ttnabben s Baɛal uca ḍfaren iryazen war isekkwin.□ ■
9 S uyenni Necc ad arniɣ ad mcubbceɣ akidwem, uřa ak-d iḥenjiren n iḥenjiren nwem ad mcubbceɣ, ammu i iqqar SIDI.’ ”
10 “Ẓwam maca ɣar tegzirin n ayt n Kittim, aqa sekkem ireqqasen ɣar Qidar, beytem uca xzarem mliḥ, ma imsar ɛemmarṣ amecnaw man aya? □
11 Ma ɛemmarṣ ibeddeř ca n řgens irebbiten nnes, waxxa war ǧin d irebbiten? Řgens inu maca iwca řɛezz nnes deg wemcan n min war ineffɛen. ■
12 Iřim d ignawen x man aya, kenniw a ijenwan, uca ggʷedem, nxeřɛem ař ṭṭarf, ammu i iqqar SIDI. ■
13 Maɣar řgens inu igga tnayen n řeɛyub: Necc, řɛunṣar n waman iddaren, aqa semḥen dayes maḥend ad ɣzan anuten i yixef nsen, anuten s tazzect i ixwan zeg waman.■
14 Ma Israil d ismeɣ niɣ d ijj ittwaru d ismeɣ di taddart? Mayemmi idweř i zzardet?
15 Ssbuɛruten xas wayraden imeẓyanen, ggin ad sřen i tmijja nsen. Nitni arrin tammurt nnes d řxarbet, tineddam nnes ttwascemḍent ařami war iqqim izeddeɣ daysent uřa d ijj. ■
16 Ɛawed ḥeffen ayt n Nuf d Taḥfanis aceqquf n uzeǧif nnek.
17 Ma war teggid ca manawya i yixef nnem, minzi cem tsemḥed di SIDI, AREBBI nnem am Netta indeḥ i cem deg webrid?”
18 “Řexxu, min din jar am d jar webrid n Miṣra maḥend ad teswed din aman zi Cixur, zeg iɣzar d abarcan? Min jar am d webrid n Accur ařami din i ɣa teswed aman n yeɣzar n Lfuraṭ? □ ■
19 Tuɛeffna nnem ad cek tarebba u ibriden n uweddar nnem ad cem ɛaqben. Ssen u xzar, mammec war iḥři u mecḥař yarzeg aqa tsemḥed di SIDI, AREBBI nnem, u war zzayi tᵉtteggʷeded, ammu i iqqar Sidi inu, SIDI n řɛeskarat.” ■
20 “Zi řebda tarẓid azayřu nnem u tcarrged iceddiyyen nnem. Cem tennid: ‘War xseɣ ad ac sexxareɣ!’ Minzi x kuř řgeɛɛdet yuɛřan u sadu kuř tacejjart tazizawt tuḍared am temɣart n farq-ccɣeř. □ 21 Necc maca tuɣa ẓẓuɣ cem d tazayart taḥurrit, d zzariɛet icnan aṭṭas. Mammec tdewřed ɣar tseḍwin n tzayart n řexřa tabarranect? ■ 22 Waxxa tessirded ixef nnem s llixiyya uca tarnid asray s ṣṣabun, ɛad ad teqqim řmuɛṣiyyet nnem zzat i wudem inu, ammu i iqqar Sidi inu, SIDI.” ■
23 “Mammec tzemmared ad tinid: ‘Necc war ttwasxemjeɣ ca, necc war ḍfareɣ ca Ibaɛlen!’ Xzar ɣar webrid nnem di teɣzurt, ɛqeř min teggid, cem d tařɣemt tefsus tᵉttazzeř, tenni ittemxarwaḍen deg ibriden nnes! 24 Aqa-tt d taɣyuč n řexra, innumen di řexřa, tenni ittcemman arriḥ deg wenẓar nnes umi tḥaj. Wi tt i ɣa issbedden di nnecwet nnes? Qaɛ wi tt yarezzun war iḥdij ad issiḥeř ixef nnes, ad tt yaf deg uyur n nnecwet nnes. 25 Ḥḍa aḍar nnem, war ittiři uḍar nnem břa tisiřa uřa tmijja nnem war tᵉttiẓeɣ s ufadi. Cem maca teqqared: ‘War xas nessiwiř, ɛemmarṣ! Maɣar necc ɛecqeɣ di midden, xseɣ ad uyureɣ awarni asen!’ ”
26 “Am uxewwan inneḥṣeř isseḍḥa, ammu i ɣa sseḍḥan inni n taddart n Israil, nitni d ijeǧiden nsen d řḥukkam nsen d ikehhanen nsen d inabiyyen nsen. 27 Nitni qqaren i ukeccuḍ: ‘Cek d baba!’, u i weẓru: Cek tejjid ayi-dd!, maɣar nitni wcin ayi s weɛrur u war iǧi s uɣembub, maca di řeḥṣaret nsen qqaren: ‘Kkar, senjem aneɣ!’ 28 Mani ǧan řexxu irebbiten nnek, inni teggid i yixef nnek? Ejj i-ten ad dd-kkaren, mařa zemmaren ad cek fekken ɣar řweqt n řeḥṣaret nnek, maɣar irebbiten nwem am lɛadad n tneddam nnek, a Yahuda!” ■
29 “Mayemmi akidi temcubbucem kenniw? Kenniw marra tᵉttɛeddam xafi, ammu i iqqar SIDI.” 30 “X baṭeř i wtiɣ iḥenjiren nwem, war jjin ixef nsen ad areyyḍen. Ssif nwem icca inabiyyen nwem am wayrad iɣarrṣen. ■ 31 A kenniw, a jjiř n yiḍa, ḥḍam awař n SIDI. Ma tuɣa ayi d řexřa i Israil, niɣ d tammurt n taǧest d tabarcant? Mayemmi xenni iqqar řgens inu: ‘Aqa neccin nennufṣeř zzayek, war i dd ɣarek neddikkwiř ɛad!’? ■ 32 Ma ad tᵉttu teɛzarect talwizt nnes niɣ ad tᵉttu tesřit taḥezzamt nnes izewwqen n řemřac? Waxxa amenni i d ayi ittu řgens inu, aṭṭas n wussan břa řeḥsab. ■ 33 Mecḥař tessned mliḥ ad tarzud abrid n tayri? S uyenni i tessřemded i ibriden nnem timesřayin tiɛeffanin. 34 Uřa deg ubeḥrur n warruḍ nnem ufin idammen n řeɛmurat iḍeɛfen izdigen, inni war temniɛed umi ucaren tudrin, wah zi ssibbet n marra man aya aqa imsar. □ 35 Uca ɛad teqqared: ‘S tidett, necc d tamezdagt, aqa aɣḍab nnes iheyyeḍ xafi!’ Xzar, Necc ad kim carrɛeɣ, minzi teqqared: ‘Necc war ggiɣ ddnub!’ 36 Mayemmi tᵉtteggʷajed aṭṭas uca tbeddřed řebda abrid nnem? Uřa tammurt n Miṣra ad cem tecmet, am mammec i d am tecmet Accur. 37 Uřa ssenni ad teggʷejed s ifassen nnem x uzeǧif, maɣar SIDI inḍar marra inni x tᵉttecřed, ařami war ittiři aya uřa akidsen.”