64
1 “Mři dd-tehwid, am timessi tessareɣ tizgi u amecnaw timessi tesstartar aman, maḥend ad ittwasscen Isem nnek i iɣrimen nnek, ḥima ad arjijen zzatek řegnus, 2 umi teggid timesřayin issaggʷaden i war tent nriji ɛemmarṣ. Mři dd-tehwid ařami arjijen idurar zzat i wudem nnek.” 3 “Zeg wecḥař uya ɛemmarṣ war t sřin, uřa d amezzuɣ war t isři, uřa d tiṭṭ war t teẓri, aqa d ijj n arebbi nneɣni nhřa Cek, wenni itteggen ca di ṭṭweɛ n yinni xas ittrajan. ■ 4 Wenni ifarrḥen zi tsegda uca ad zzayes yegg, ad t teřqid Cek, inni xak itteɛqiřen deg ibriden nnek. Xzar, teffugmed, minzi neccin nexḍa. Negga i-t ɛad řebda, ma xenni ad nettwanjem? 5 Neccin marra am umexmuj, marra řmuɛṣiyyet nneɣ am warruḍ ixeǧḍen deg idammen, neccin marra am tfart nissřaw, uca řmuɛṣiyyet nneɣ tkessi aneɣ am uṣemmiḍ. ■
6 Uřa d ijj war ittřiɣi Isem nnek, uřa d ijj ittekkar ḥima ad dayek iṭṭef, maɣar Cek tessnuffared aɣembub nnek xaneɣ uca tejjid aneɣ ad nɣarq deg ufus n řmuɛṣiyyet nneɣ. 7 Maca řexxu, a SIDI, Cek d Babatneɣ, neccin d třaxt u Cek d bu-třaxt nneɣ, neccin marra d řxedmet n ifassen nnek.
8 A SIDI, war teggid ad idduqqez weɣḍab nnek ammu aṭṭas u war ttidar i řebda řmuɛṣiyyet. Aqa da, xzar, neccin marra d řgens nnek. ■ 9 Tineddam nnek timqeddasin dewřent d řexřa, Ṣihyun tedweř d tanezruft, Urcalim d amcan ittwareddǧen.
10 Taddart nneɣ tamqeddast teccur s tissiqt, mani ibabaten nneɣ ssemɣaren Cek, tᵉttwacmeḍ s tmessi u marra min xaneɣ iɛizzen, idweř d řxirbet.
11 Ma tzemmared ad tmenɛed ixef nnek di qaɛ aya, a SIDI, ma tzemmared ad tesseɣded u ad aneɣ teḥṣared ammu aṭṭas?”