Zzardet s tazřa, takeccaḍt deɣya
8
1 Inna ayi SIDI: “Ksi tařwiḥt tameqqrant, tarid xas s řeqřem n bnadem ařami zemmaren ad t ɣaren: ‘Zzardet s tazřa, takeccaḍt deɣya!’ ” 2 Řechud imtiqqan iwyeɣ-ten d acehhad i yixef inu: akehhan Uriya d Zakariyya, mmis n Yabraxya. 3 Tuɣa udfeɣ x tnabit u teksi s ddeyset, turuw-dd ijj n uḥenjir. Uca inna ayi SIDI: “Egg as: ‘Mahar-Calal, Xac-Baz!’, ixs ad yini: ‘Zzardet s tazřa, takeccaḍt deɣya!’ 4 Maɣar qbeř ma ad iřmed uḥenjir ad yini: ‘Baba!’, niɣ: ‘Yemma!’, ad kksen agřa n Dimacq d zzardet n Samarya zzat i wudem n ujeǧid n Accur.” 5 Yarni SIDI deg wawař akidi, inna:
6 “Minzi řgens-a isseḥqar aman yarsan ittazzřen n Ciluha, s uya ifarḥ Raṣin d mmis n Ramalya. 7 S uyenni, xzar, Sidi inu ad yarr aman yewɛaren d imeqqranen n yeɣzar n Lfuraṭ ad xasen ḥemřen, ixs ad yini ajeǧid n Accur d marra aɛuǧi nnes. Ad igeɛɛed zi marra taryiwin nnes u ad dd-issfiy tiwa n marra timuwwa nnes. 8 Ad yadef ɣar Yahuda, ad tt issɣarq uca ad yarni ad ɣares dd-yazzeř ař dd-as i ɣa yaweḍ ař yiři. Xmi i ɣa isswiẓẓeḍ afriwen nnes ad dřen tiru n temmurt nnek! Arebbi aqa-t akideneɣ, A Ɛimmanu-Il.”
9 “Hajam, a kenniw řegnus, maca waxxa amenni ad tᵉttwařebzem! Ejj marra jjwayeh iggʷejen n ddunect ad wcen imezzuɣen nsen: waxxa tḥezzmem ixef nwem, ad tᵉttwařebzem, waxxa tḥezzmem ixef nwem, ad tᵉttwařebzem!
10 Mcawarem, maca amcawar nwem ad ifceř! Inim ijj n wawař, war ittiři, maɣar Arebbi aqa-t akidneɣ, ‘Ɛimmanu-Il’.”
Řumur n SIDI i Icaɛya
11 Maɣar ammu i d ayi inna SIDI, umi xafi ijhed ufus nnes u isseřmed ayi ḥima war ggureɣ x webrid n řgens-a, inna:
12 “War qqarem ‘Tameɛmuč!’ i marra umi iqqar řgens-a ‘Tameɛmuč!’ War tteggʷedem u war ttnexřiɛem!
13 SIDI n řɛeskarat ad t tessqeddsem, ad zzayes teggʷedem u ad zzayes tenxeřɛem.
14 Netta ad yiři d Zzawect Iqeddsen, d aẓru n unedraf uřa d taṣḍart n uneqraḍ i tnayen n tudrin n Israil, d taxceft d tracca i imezdaɣ n Urcalim. ■
15 Aṭṭas jar asen ad nnqarḍen, ad wḍan, ad ttwarẓen, ad dewřen ɣar texceft uca ad nnaɣen.” ■
16 “Cfen Cchadet, cemmeɛ Ccariɛa jar imeḥḍaren inu!”
17 “Necc ad rajiɣ SIDI, wenni iřeḥḥfen i uɣembub nnes zzat i taddart n Yaɛqub, xas i ɣa tecřeɣ.
18 Xzar, necc d iḥenjiren nni d ayi iwca SIDI, aqa aneɣ neǧa i řeɛřamat d lmuɛjizat di Israil zi ssibbet n SIDI n řɛeskarat nni izeddɣen x wedrar n Ṣihyun. ■
19 “Mařa nnan awem: ‘Seqsam inni issawařan ak-d imettan d igezzanen, inni ittweswisen u ittwecwicen!’, xenni ini: ‘Ma war dd-yusi i yijj n řgens ad isseqsa Arebbi nnes? Ma iɛeddeř ad sseqsan imettan di ṭṭweɛ n yinni iddaren?’ ■
20 ‘Ɛeqbem ɣar Ccariɛa d Cchadet!’ Mařa war uyuren ɛlaḥsab awař-a, war ɣarsen tᵉttiři tfawt n řefjar.”
21 “Ad inneḍ řgens da d diha, icḍen u iǧuz, uca mařa iǧuz uca ixeyyeq, ad inɛeř řgens ajeǧid nnes d AREBBI nnes. Ma ad xzaren ɣar ujenna 22 niɣ ɣar temmurt, aqa da mɣir řeḥṣaret d ṭṭřam, ṭṭřam issaggʷad. Ittwasuffeɣ řgens ɣar tubbarcent. ■
23 Maca war ittɣimi ṭṭřam issaggʷad mani teǧa řeḥṣaret řexxu. Zic yiwi-dd Netta aseḥqar ɣar temmurt n Zabulun u ɣar temmurt n Naftali, ammu i ɣa yawi di řweqt i dd ɣa yasen ccan x webrid n řebḥar, x ujemmaḍ n L'Urdun, ɣar Ljalil n řegnus.” ■