1 Adlis n umezruy n wexřaq n Yeccu Lmasiḥ, mmis n Dawud, mmis n Ibrahim. ^■  

2 Ibrahim ijja-dd Isḥaq, Isḥaq ijja-dd Yaɛqub, Yaɛqub ijja-dd Yahuda d aytmas. ^■   3 Yahuda ijja-dd Fariṣ d Zaraḥ ak-d Tamar, Fariṣ ijja-dd Ḥaṣrun, Ḥaṣrun ijja-dd Aram, ^■   4 Aram ijja-dd Ɛamminadab, Ɛamminadab ijja-dd Naḥcun, Naḥcun ijja-dd Salmun, 5 Salmun ijja-dd Buɛaz ak-d Raḥab, Buɛaz ijja-dd Ɛubid ak-d Raɛut, Ɛubid ijja-dd Yassa, 6 Yassa ijja-dd Dawud, ajeǧid, uca Dawud, ajeǧid, ijja-dd Suliman ak-d temɣart n Uriya. ^■  

7 Suliman ijja-dd Raḥabɛam, Raḥabɛam ijja-dd Abiya, Abiya ijja-dd Asa, ^■   8 Asa ijja-dd Yahucafaṭ, Yahucafaṭ ijja-dd Yuram, Yuram ijja-dd Ɛuzziya, 9 Ɛuzziya ijja-dd Yutam, Yutam ijja-dd Aḥaz, Aḥaz ijja-dd Ḥizqiya,

10 Ḥizqiya ijja-dd Manassa, Manassa ijja-dd Amun, Amun ijja-dd Yuciya,

11 Yuciya ijja-dd Yakunya d aytmas di řweqt n tmeḥbast di Babil. ^■  

12 Awarni řami xasen uẓẓřen ɣar Babil, Yakunya ijja-dd Caɛaltiyil, Caɛaltiyil ijja-dd Zarubbabil. ^■  

13 Zarubbabil ijja-dd Abihud, Abihud ijja-dd Alyaqim, Alyaqim ijja-dd Ɛazur,

14 Ɛazur ijja-dd Ṣaduq, Ṣaduq ijja-dd Axim, Axim ijja-dd Aliyud,

15 Aliyud ijja-dd Aliɛazar, Aliɛazar ijja-dd Mattan, Mattan ijja-dd Yaɛqub,

16 Yaɛqub ijja-dd Yusuf, aryaz n Maryam, tenni i dd-ijjin Yeccu umi qqaren Lmasiḥ.

17 S uyenni marra arrawen zi Ibrahim ař Dawud iwḍen arbeɛṭac n warrawen. Zi Dawud ař tameḥbast di Babil arbeɛtac n warrawen uca zi tmeḥbast di Babil ař Lmasiḥ arbeɛtac n warrawen.

18 Ammu i yemsar wexřaq n Yeccu Lmasiḥ. Umi yemmas Maryam tuɣa-tt d tanexḍebt n Yusuf, iḍhar-dd belli nettat teksi aɛeddis zi Arruḥ Iqeddsen qbeř i ɣa meřcen. ^■  

19 Umi aryaz nnes Yusuf tuɣa iggur nican, war ixs ca ad tt issbehdeř, tuɣa yarezzu ad as iǧef s tnuffra. 20 Am tuɣa ittxarraṣ di man aya, iḍhar as-dd Lmalak n SIDI di tarjit, inna:

“A Yusuf, a mmis n Dawud,

war tteggʷed ad dd-tawyed Maryam d tamɣart nnek,

minzi wenni i dayes dd-ixeřqen, aqa Netta zi Arruḥ Iqeddsen.”

21 Nettat ad dd-taruw Aḥenjir, nettat ad t tsemma Yeccu,

minzi Netta ad issenjem řgens nnes zi ddnub nsen.” ^■  

22 Marra aya imsar ḥima ad ittwakemmeř min inna SIDI s uqemmum n unabi, umi inna:

23 “Xẓar, taɛzarect ad teksi ddeyset

uca ad dd-taruw Aḥenjir,

ad as ggen ‘Ɛimmanu-Il’

min ixs ad yini: ‘AREBBI aqa-t akidneɣ’. ” ^■  

24 Řami dd-ifaq Yusuf zeg iḍeṣ, igga am mammec tt yumur Lmalak n SIDI uca yiwyi-dd tamɣart nnes ɣares, 25 uca netta war ɣares dd-iqarreb ca ařami dd-turuw Mmis amenzu uca tsemma t ‘Yeccu’. ^■