يَاهُوذَا 1

يَاهُوذَا

أَسدْجمْ غَارْ ؤُمزْوَارُو

‏1 يَاهُوذَا، أَمْسخَّارْ ن يشُّو لْمَاسِيحْ، ذ ؤُمَاسْ ن يَاعْقُوبْ، إِ ينِّي إِتّْوَاڒَاغَانْ زِي ڒڭْنُوسْ، إِنِّي إِتّْوَاعِيزّنْ زِي أَربِّي، ثَابَابَاثْ، ؤُ إِنِّي إِتّْوَاحْضَانْ ذِي يشُّو لْمَاسِيحْ. ‏2 إِڒِي أَذْ غَارْومْ ثمَّارْنِي أَرّحْمثْ ذ ڒهْنَا ذ ثَايْرِي.

حْضَامْ إِخفْ نْومْ زڭْ إِمْسڒْمَاذنْ إِسّْخَارِّيقنْ

‏3 أَ إِمْعِيزّنْ، ؤُمِي شطَّارغْ مَاحنْذْ أَذْ أَومْ د-أَرِيغْ خْ ؤُسنْجمْ نّغْ إِمُوننْ، أَقَا ؤُفِيغْ بلِّي إِتّْخصَّا أَيِي أَذْ أَومْ د-أَرِيغْ س ؤُزِييَّارْ حِيمَا أَذْ ثمّنْغمْ س جّهْذْ خْ لْ-إِيمَانْ إِ إِمّوْشنْ إِشْثْ ن ثْوَاڒَا إِ إِمْقدَّاسنْ. ‏4 مِينْزِي شَا ن إِوْذَانْ خْثُوتّْڒنْ غَارْ ذَاخڒْ، إِنِّي ثُوغَا إِتّْوَازمّنْ إِ ڒْحُوكْمْ-أَ قْبڒْ، أَقَا نِيثْنِي ذ لْكُوفَّارْ، إِنِّي إِبدّْڒنْ أَرْضَا ن أَربِّي نّغْ ذڭْ ؤُفُوشّحْ، ؤُشَا نكَّارنْ أَينِّي ن سِيذِي أَربِّي ذ سِيذِيثْنغْ، يشُّو لْمَاسِيحْ.   

‏5 مَاشَا خْسغْ أَذْ كنِّيوْ سّْعقْڒغْ، أَقَا كنِّيوْ ثسّْنمْ مَانْ أَيَا مْلِيحْ، بلِّي أَربِّي، ؤُمِي إِفكّْ ڒْڭنْسْ زِي ثمُّورْثْ ن مِيصْرَا، ثُوغَا إِهلّكْ أَوَارْنِي مَانْ أَيَا إِنِّي وَارْ يُومِيننْ شَا.    ‏6 ؤُشَا لْمَالَاكَاثْ نِّي وَارْ حْضِينْثْ أَوقَّارْ نْسنْ أَمزْوَارُو، مَاشَا جِّينْثْ ثَازذِّيغْثْ نْسنْ، أَقَا نتَّا إِحْضَا خَاسنْ س سّْنَاسڒْ وَارْ إِتّْوِيڒِينْ سَاذُو ثَادْجسْثْ إِ ڒْحُوكْمْ ن وَاسّْ أَمقّْرَانْ،    ‏7 أَمْ مَامّشْ سَاذُومْ ذ عَامُورَّا ذ ثْندَّامْ إِ ذ أَسْ د-إِنّْضنْ، مَانِي ڭِّينْ نِيثْنِي فَارْقْ-شّْغڒْ أَمشْنَاوْ مِينْ ڭِّينْثْ ثِينَا س ثْنَاينْ ؤُ ضْفَارنْثْ أَرِّيمَاثْ نّغْنِي، أَقَا تّْوَامَّارْسنْثْ ذ إِمذْيَا ن ثْمسِّي إِتّْذُومَانْ أَمْ تّْوَاحكْمنْثْ غَارْ شّْرعْ.   

‏8 أَمنِّي عَاوذْ إِ إِمْسَارْ إِ ينِّي إِتّْهَاذْفنْ ذِي ثِيرْجَا: نِيثْنِي سّخْمَاجنْ أَرِّيمثْ، وَارْ قبّْڒنْ صُّولْطَا ؤُشَا تّْشقَّافنْ ذِي مِينْ إِدْجَانْ ذ أَعُودْجِي.

‏9 مَاشَا مِيخَايِيلْ، أَزدْجِيفْ ن لْمَالَاكَاثْ، ڒَامِي ثُوغَا إِتّمْشُوبّشْ أَكْ-ذ إِبْڒِيسْ خْ أَرِّيمثْ ن مُوسَا، وَارْ خَاسْ إِحْكِيمْ س إِجّْ ن ڒْحُوكْمْ إِتّْشقَّافنْ، مَاشَا إِنَّا: ”سِيذِي أَذْ شكْ إِخدْجصْ!“   

‏10 مَاشَا إِنَا تّْشقَّافنْ ذِي مَارَّا مِينْ وَارْ سِّيننْ، ؤُشَا س ثْمسْڒَايِينْ إِ غَارْ تّْوَاجبّْذنْ نِيثْنِي أَمشْنَاوْ إِمُودَّارنْ إِڭْنَاونْ عْلَاحْسَابْ طّْبِيعثْ نْسنْ، أَقَا تّْوَاغشّنْ زَّايْسنْثْ.     

‏11 ؤُشْثْ خَاسنْ، مِينْزِي نِيثْنِي ؤُيُورنْ أَبْرِيذْ ن قَايِينْ، ضْفَارنْ أَغكّْوِي ن بَالْعَامْ ذِي طْوعْ ن ڒْمُونثْ، ؤُ تّْوَاهلْكنْ ذڭْ ؤُغوّغْ ن كُورَاخْ.   

‏12 إِنَا ذ إِنِّي إِسّْفطَّاحنْ إِخفْ نْسنْ ذڭْ ؤُرَارنْ نْسنْ، وَارْ تّْسضْحِينْ شَا أَذْ غبَّانْ. أَقَا أَثنْ ذ إِسيْنُوثنْ بْڒَا أَنْژَارْ، تّْوَاعَارّْننْ زِي سَّا غَارْ ذِيهَا س ؤُسمِّيضْ، أَقَا أَثنْ ذ ثِيشجِّيرَا نِّي ذِي إِدْجْ ڒْغِيدْجثْ نْسنْثْ ثْودَّارْ، وَارْ تِّيشنْثْ ڒْغِيدْجثْ، مُّوثنْثْ وِيسّْ مَارْثَاينْ ؤُشَا تّْوَاقڒْعنْثْ خْ إِژوْرَانْ نْسنْثْ.   

‏13 نِيثْنِي ذ ڒمْوَاجْ ن ڒبْحَارْ إِهَاجنْ، إِنِّي إِسُّوسُوفنْ إِكُوفَّانْ ن ڒفْضِيحثْ نْسنْ، أَقَا أَثنْ ذ إِثْرَانْ ودَّارنْ إِنِّي ؤُمِي ثتّْوَاسوْجذْ ثُوبَّارْشنْثْ ن ثَادْجسْثْ إِ ڒبْذَا.   

‏14 مَاشَا حَانُوخْ، ونِّي ذ وِيسّْ سبْعَا زِي أَذَامْ، إِنبَّا خَاسنْ، إِنَّا: ”خْزَارْ، سِيذِي أَذْ د-يَاسْ أَكْ-ذ ڒُوڒُوفْ ن ڒُوڒُوفْ ن إِمْقدَّاسنْ نّسْ،   

‏15 حِيمَا أَذْ إِڭّْ ڒْحُوكْمْ نّسْ خْ مَارَّا، حِيمَا أَذْ إِسّقْنعْ مَارَّا لْكُوفَّارْ نِّي إِدْجَانْ جَارْ أَسنْ خْ ڒخْذَايمْ ن لْكُوفْرْ نْسنْ، ثِينِّي إِڭِّينْ ذِي لْكُوفْرْ نْسنْ، ؤُ خْ وَاوَاڒنْ إِقسْحنْ إِ زِي شقّْفنْ إِمذْنَابْ إِكْفَارنْ.“   

‏16 إِنَا تّْعكَّاسنْ، تّْشثْشَانْ خْ كُوڒْ دَّابْ ن سِّيبّثْ، أَمْ ڭُّورنْ غَارْ نّشْوَاثْ نْسنْ، أَقمُّومْ نْسنْ إِسَّاوَاڒْ س ثْمسْڒَايِينْ ثِيعفَّانِينْ أَڒْ طَّارْفْ، تّڭّنْ ثِيقدُّوحِينْ إِ شَا ن إِوْذَانْ إِ ثِيزِي نْسنْ.   

‏17 مَاشَا كنِّيوْ، أَ إِمْعِيزّنْ إِنُو، عقْڒمْ أَوَاڒنْ إِ إِزَّارْ سِّيوْڒنْ زَّايْسنْ رُّوسُولْ ن سِيذِيثْنغْ يشُّو لْمَاسِيحْ،   

‏18 إِنِّي ذ أَومْ إِنَّانْ، أَقَا ذڭْ ؤُنڭَّارْ ن إِكُوذنْ أَذْ ذِينْ إِڒِينْ إِمسْثهزَايّنْ، إِنِّي إِ غَا يُويُورنْ عْلَاحْسَابْ نّشْوثْ ن ڒقْجَاحثْ نْسنْ.   

‏19 أَقَا ذ يِينَا ذ إِنِّي إِفَارّْزنْ إِخفْ نْسنْ أَمْ إِوْذَانْ إِضفَّارنْ طّْبِيعثْ ن يِيخفْ نْسنْ، مِينْزِي وَارْ غَارْسنْ بُو أَرُّوحْ.

أَعْڒمْ ذ ؤُسجّعْ

‏20 مَاشَا كنِّيوْ، أَ إِمْعِيزّنْ إِنُو، تّْوَابْنَامْ عَاوذْ ذِي لْ-إِيمَانْ نْومْ إِقدّْسنْ، أَمْ ثژَّادْجَامْ ذِي أَرُّوحْ إِقدّْسنْ. ‏21 أجّْ أَنغْ أَذْ نحْضَا إِخفْ نّغْ ذِي ثَايْرِي ن أَربِّي أَمْ نتّْرَاجَا أَرّحْمثْ ن سِيذِيثْنغْ يشُّو لْمَاسِيحْ إِ ثُوذَارْثْ نّغْ إِتّْذُومَانْ. ‏22 قڒْعمْ شَا زَّايْسنْ زِي ثْمسِّي. ‏23 ؤُشَا، مَاڒَا ثُوبنْ نِيثْنِي، سشّْنمْ أَسنْ أَرّحْمثْ س ثِيڭّْوُوذِي، أَمْ ثتّْعِيفِّيذْ زِي ثْشَامِيرْ إِ إِتّْوَاسْخمْجنْ زڭْ ويْسُومْ.

أَسمْغَارْ إِ أَربِّي

‏24 مَاشَا إِ نتَّا، ونِّي إِزمَّارنْ أَذْ أَنغْ إِحْضَا بْڒَا دّنْبْ نِيغْ ڒخْمجْ ؤُ أَذْ أَنغْ يجّْ أَذْ نْبدّْ نِيشَانْ بْڒَا ڒْعِيبْ، ‏25 - أَقَا نتَّا ذ أَربِّي وحّْذسْ، أَمْسنْجمْ نّغْ - ، إِ نتَّا، أَمْ نْبدّْ زَّاثْ إِ ؤُعُودْجِي نّسْ س ڒفْرَاحثْ، أَذْ غَارسْ يِيڒِي ؤُسمْغَارْ ذ صُّولْطَا ذ شَّانْ ذ لْعَاضَامَا، أَمْ ڒخُّو أَمْ سَّا غَارْ زَّاثْ إِ ڒبْذَا قَاعْ. أَمِينْ.