لِيمَانْ ذِي مِّيسْ ن أَربِّي
5
1 مَارَّا ونِّي يُومْننْ بلِّي يشُّو ذ لْمَاسِيحْ، أَقَا نتَّا إِتّْوَاخْڒقْ-د زِي أَربِّي، ؤُشَا مَارَّا ونِّي إِتّخْسنْ ونِّي ث-إِ-د يجِّينْ، أَذْ إِخْسْ عَاوذْ ونِّي زَّايسْ د-إِتّْوَاخڒْقنْ. ▪ 2 زِي مَانْ أَيَا نسّنْ بلِّي نتّخْسْ ثَارْوَا ن أَربِّي، خْمِي نتّخْسْ أَربِّي ؤُ نتّڭّْ ثِيوصَّا نّسْ. 3 مِينْزِي ثَا ذ ثَايْرِي زِي أَربِّي، أَذْ نحْضَا ثِيوصَّا نّسْ، ؤُشَا ثِيوصَّا نّسْ وَارْ وْعَارنْثْ شَا. ▪ 4 مَارَّا مِينْ د-إِتّْوَاخڒْقنْ زِي أَربِّي أَذْ إِغلّبْ خْ دُّونشْثْ. ذ وَا ذ أَغْڒَابْ إِ إِغلّْبنْ خْ دُّونشْثْ، أَقَا-ث ذ لْ-إِيمَانْ نّغْ! ▪ 5 مَانْ ونْ إِ غَا إِغلّْبنْ خْ دُّونشْثْ، مْغِيرْ ونِّي يُومْننْ بلِّي يشُّو ذ مِّيسْ ن أَربِّي! ▪ 6 ذ وَا إِ د-إِكِّينْ زڭْ وَامَانْ ذ إِذَامّنْ، يشُّو لْمَاسِيحْ. وَارْ د-يكِّي زڭْ وَامَانْ وَاهَا، مَاشَا زڭْ وَامَانْ ذ إِذَامّنْ. 7 أَرُّوحْ ذ ونِّي إِشهّْذنْ، مِينْزِي أَرُّوحْ ذ ثِيذتّْ. 8 ؤُشَا أَقَا ذِينْ ثْڒَاثَا ن يِينِّي إِشهّْذنْ: أَرُّوحْ ذ وَامَانْ ذ إِذَامّنْ، ؤُشَا نِيثْنِي س ثْڒَاثَا ذ إِجّنْ.
9 مَاڒَا نقْبڒْ شّْهَاذثْ ن إِوْذَانْ، مشْحَاڒْ ذ ثَامقّْرَانْثْ شّْهَاذثْ ن أَربِّي؟ ثَا ذ شّْهَاذثْ ن أَربِّي ثنِّي إِشْهذْ خْ مِّيسْ.
10 ونِّي يُومْننْ ذِي مِّيسْ ن أَربِّي، غَارسْ شّْهَاذثْ-أَ ذڭْ إِخفْ نّسْ. ونِّي وَارْ يُومِيننْ شَا ذِي أَربِّي، أَقَا إِڭَّا إِ-ث ذ بُو-إِخَارِّيقنْ مِينْزِي نتَّا وَارْ يُومِينْ شَا ذِي شّْهَاذثْ ثنِّي إِوْشَا أَربِّي خْ مِّيسْ. ▪
11 ؤُشَا ثَا ذ شّْهَاذثْ: أَربِّي إِوْشَا أَنغْ ثُوذَارْثْ إِتّْذُومَانْ ؤُشَا ثُوذَارْثْ نِّي أَقَا-ت ذِي مِّيسْ. ▪
12 ونِّي غَارْ إِدْجْ ثَاممِّيثْ، غَارسْ ثُوذَارْثْ. ونِّي وَارْ غَارْ إِدْجِي مِّيسْ ن أَربِّي، وَارْ غَارسْ بُو ثُوذَارْثْ.
أَوَاڒْ ذ ؤُسدْجمْ غَارْ ؤُنڭَّارُو
13 ؤُرِيغْ أَومْ-د مَانْ أَيَا، حِيمَا أَذْ ثسّْنمْ بلِّي غَارْومْ ثُوذَارْثْ إِتّْذُومَانْ ؤُشَا حِيمَا أَذْ ثَامْنمْ ذڭْ يِيسمْ ن مِّيسْ ن أَربِّي. ▪
14 ذ ثَا ذ تِّيقّثْ ثنِّي غَارْنغْ ذَايسْ، أَقَا مَارَّا مِينْ زَّايسْ نتَّارْ عْلَاحْسَابْ مِينْ إِخْسْ نتَّا، نتَّا أَذْ غَارْنغْ إِسڒْ. ▪
15 مَاڒَا نتّْوَاسّقْنعْ نِيشَانْ أَقَا أَذْ أَنغْ إِسڒْ مِينْ مَا ذ أَسْ نتَّارْ، خنِّي نتِّيقّْ بلِّي أَقَا يُوسَا-د أَنغْ مِينْ ذ أَسْ نتَّارْ.
16 مَاڒَا إِجّنْ إِژْرَا ؤُمَاسْ إِخْضَا، إِجّْ ن ؤُخطُّو وَارْ إِدْجِي شَا إِ ڒْموْثْ، أجّْ إِ-ث أَذْ إِتَّارْ ذِي طّْوعْ نّسْ، ؤُشَا أَذْ أَسْ ثمّوْشْ ثُوذَارْثْ، إِ ونِّي وَارْ إِخطِّينْ شَا إِ ڒْموْثْ. أَقَا ذِينْ أَخطُّو إِ ڒْموْثْ، خْ وَا وَارْ ذ أَومْ قَّارغْ أَذْ إِتَّارْ. ▪
17 مَارَّا ثُوعفّْنَا، أَقَا-ث ذ دّنْبْ، ؤُشَا أَقَا ذِينْ دّنْبْ إِ وَارْ إِدْجِينْ شَا أَڒْ ڒْموْثْ. ▪
18 نسّنْ بلِّي كُوڒْ إِجّنْ ونِّي د-إِتّْوَاخڒْقنْ زِي أَربِّي، وَارْ إِخطِّي شَا، مِينْزِي ونِّي د-إِتّْوَاخڒْقنْ زِي أَربِّي أَذْ إِحْضَا إِخفْ نّسْ ؤُ وَارْ ث إِتّْحِيذِي ؤُمْعفَّانْ.▪
19 نسّنْ، أَقَا أَنغْ زِي أَربِّي ؤُشَا دُّونشْثْ مَارَّا أَقَا-ت ذڭْ إِفَاسّنْ ن ؤُمْعفَّانْ، 20 نسّنْ بلِّي مِّيسْ ن أَربِّي أَقَا يُوسَا-د ؤُشَا إِوْشَا أَنغْ-د ڒفْهَامثْ حِيمَا أَذْ نسّنْ ونِّي إِدْجَانْ ذ ثِيذتّْ ؤُ حِيمَا أَذْ نِيڒِي ذڭْ ونِّي ذ ثِيذتّْ، ذِي مِّيسْ يشُّو لْمَاسِيحْ. ذ وَا ذ أَربِّي س ثِيذتّْ ذ ثُوذَارْثْ إِتّْذُومَانْ. ▪
21 أَ إِحنْجِيرنْ إِنُو، حْضَامْ إِخفْ نْومْ زڭْ وعْبذْ ن لْ-أَصْنَامْ!