ثَاروْسَا ن ثْحِيمَارْثْ ن أَربِّي
5
1 تّْزَاوْڭغْ إِنِّي ذ إِمْغَارنْ جَارْ أَونْ، نشّْ ذ ونِّي ذ أَمْغَارْ أَكِيذْومْ ذ أَشهَّاذْ ن ؤُودّبْ إِ إِكِّينْ خْ لْمَاسِيحْ ؤُڒَا ذ أَمْعَاشَارْ ذڭْ ؤُعُودْجِي نّسْ إِ د غَا إِتّْوَاسّضْهَارْ: 2 أَروْسمْ ثَاحِيمَارْثْ ن أَربِّي ثنِّي ثْحطَّامْ، وَارْ إِدْجِي س ؤُغِيڒْ مَاشَا س ڒْخَاضَارْ، وَارْ إِدْجِي ذِي طّْمعْ ن أَرْبحْ وَارْ إِحْڒِينْ، مَاشَا س مَارَّا وُوڒْ نْومْ، ▪ 3 وَارْ إِدْجِي أَمْ إِنِّي إِدْجَانْ خْ ثْحِيمَارْثْ، مَاشَا ؤُمِي ثدْجَامْ ذ إِجّْ ن ؤُمذْيَا إِشْنَا إِ نِيثْنِي. ▪ 4 ؤُشَا خْمِي د غَا إِضْهَارْ ؤُمكْسَا أَمقّْرَانْ أَذْ زَّايسْ ثطّْفمْ تَّاجْ ن ؤُعُودْجِي إِ وَارْ إِفنِّينْ. ▪ 5 ؤُ كنِّيوْ، إِبْڒِيغنْ، سَارْسمْ إِخفْ نْومْ سَاذُو إِمْغَارنْ نْومْ، بيْسمْ إِخفْ نْومْ س ؤُوَاضعْ إِجّْ إِ ونّغْنِي، مِينْزِي أَربِّي إِتّْعكَّاسْ إِمْعفَّارنْ، مَاشَا إِمْوَاضْعنْ إِوْشَا أَسنْ أَرْضَا. ▪ 6 سمْژَايمْ إِخفْ نْومْ سَاذُو أَفُوسْ إِجهْذنْ ن أَربِّي، حِيمَا أَذْ كنِّيوْ إِسُّوعْڒَا ذِي ڒْوقْثْ نّسْ. ▪ 7 مَارَّا إِمْنُوسنْ نْومْ أَرّمْ ثنْ غَارْ أَربِّي، أَقَا نتَّا إِتّْهِيلَّا ذَايْومْ. ▪
8 أَرّمْ-د ڒْبَاڒْ، حْضَامْ، مِينْزِي ڒعْذُو نْومْ، شِّيطَانْ أَمقّْرَانْ، إِتّْحَامَا أَمْ وَايْرَاذْ إِدْجُوژنْ، ؤُ يَارزُّو مِينْ إِزمَّارْ أَذْ إِصَارْضْ. ▪ 9 منْعمْ أَكِيذسْ إِخفْ نْومْ أَمْ ثطّْفمْ نِيشَانْ ذِي لْ-إِيمَانْ، أَقَا ثسّْنمْ بلِّي أَيْثْمَاثْومْ ذِي دُّونشْثْ ؤُڒَا ذ نِيثْنِي كسِّينْ أَودّبْ-أَ. ▪
10 مَاشَا أَربِّي ن أَرْضَا ونِّي ذ أَنغْ د-إِڒَاغَانْ غَارْ ؤُعُودْجِي نّسْ إِتّْذُومَانْ س يشُّو لْمَاسِيحْ، أَقَا نتَّا، أَوَارْنِي ڒَامِي نْودّبْ ذْرُوسْ ن ڒْوقْثْ، أَذْ أَنغْ إِسّجْهذْ، أَذْ أَنغْ إِضْمنْ ؤُ أَذْ أَنغْ إِسدّْ إِ ڒبْذَا. ▪
11 غَارسْ نتَّا أَعُودْجِي ذ صُّولْطَا ذ ڒْعزّْ إِ ڒبْذَا ن ڒبْذَاثْ قَاعْ. أَمِينْ.
أَسدْجمْ غَارْ ؤُنڭَّارُو
12 ؤُرِيغْ أَومْ-د شَا ن ثْمسْڒَايِينْ وَارْ إِدْجِي أَطَّاسْ، س ؤُفُوسْ ن سِيلْوَانُوسْ، ؤُمَا ذ أَمْثِيقِّي، ؤُ نشّْ قنّْعغْ ؤُ شهْذغْ أَقَا مَانْ أَيَا ذِي مِينْ ذِي ثدْجَامْ، أَقَا-ث ذ أَرْضَا ن أَربِّي ذ ثِيذتّْ.
13 ثَامسْمُونْثْ إِتّْوَافَارْزنْ إِ إِدْجَانْ ذِي بَابِيلْ، ثْسدْجَامْ خَاومْ س ڒهْنَا، ؤُڒَا ذ مِّي مَارْكُوسْ.
14 سدْجْممْ خْ وَايَاوْيَا س ؤُسُوذمْ إِقدّْسنْ. ڒهْنَا أَذْ كِيومْ يِيڒِي مَارَّا إِذْومْ إِ إِدْجَانْ ذِي لْمَاسِيحْ. أَمِينْ. ▪