إِعِيبْرَانِييّنْ 6

‏1 س ؤُينِّي أَذْ نجّْ ثَامزْوَارُوثْ ن وَاوَاڒْ ن لْمَاسِيحْ، أَذْ نُويُورْ زَّاثْ غَارْ ؤُكمّڒْ. نِيغْ ثخْسمْ أَذْ ثسَّارْسمْ ثْوَاڒَا نّغْنِيثْ ذْسَاسْ إِ تُّوبثْ زِي ڒخْذَايمْ إِمُّوثنْ ؤُ إِ لْ-إِيمَانْ ذِي أَربِّي، ‏2 ؤُ إِ ثْغُورِي ن ؤُسغْضصْ ذ ؤُسَارْسِي ن إِفَاسّنْ ؤُڒَا إِ ثْنُوكْرَا زِي ثَادَّارْثْ ن إِمتِّيننْ ذ لْحِيسَابْ إِ ڒبْذَا؟ ‏3 أَذْ نڭّْ مَانْ أَيَا، مَاڒَا أَذْ ذ أَنغْ إِسْمحْ سِيذِي مَانْ أَيَا.   

‏4 مِينْزِي إِنِّي د-إِهْوَانْ إِ ؤُسغْضصْ إِشْثْ ن ثْوَاڒَا ؤُشَا قَّاسنْ ثَاوْهِيبْثْ ن ؤُجنَّا ؤُشَا طّْفنْ أَرُّوحْ إِقدّْسنْ،    ‏5 ؤُشَا قَّاسنْ أَوَاڒْ إِشْنَانْ ن أَربِّي ذ جّهْذْ ن وَاكُوذْ إِ د غَا يَاسنْ، ‏6 ؤُشَا خنِّي أَوَارْنِي مَانْ أَيَا أَذْ خْضَانْ عَاوذْ، ؤُشَا أَذْ تّْوَاسّْفَاقنْ إِ تُّوبثْ زِي جْذِيذْ، أَقَا نِيثْنِي أَذْ صلّْبنْ ؤُ أَذْ سّحْقَارنْ مِّيسْ ن أَربِّي إِشْثْ ن ثْوَاڒَا نّغْنِي. ‏7 مِينْزِي ثَامُّورْثْ، ثنِّي إِسسّنْ أَنْژَارْ ونِّي خَاسْ إِشَّاثنْ أَطَّاسْ ن ثْوَاڒَاوِينْ، ثسّْغمِّي أَغمُّويْ إِشْنَا إِ ينِّي ؤُمِي ثتّْوَافدْجحْ، ؤُشَا خنِّي ثكْسِي لْبَارَاكَا زِي أَربِّي. ‏8 مَاشَا مَاڒَا ثسّغْمِي-د إِسنَّاننْ ذ ثْزڭّْوَارْثْ، أَقَا ثمّنْضَارْ ؤُ ثُوذسْ إِ نّعْڒثْ ؤُشَا أَنڭَّارْ نّسْ ذ أَشْمَاضْ س ثْمسِّي.

أَضْمَانْ ن لْوَاعْذْ ن أَربِّي

‏9 مَاشَا وَاخَّا نسَّاوَاڒْ أَمُّو، زِي جِّيهثْ نْومْ أَ-يْ-أَيثْمَا، أَقَا نسّنْ نِيشَانْ ثِيمسْڒَايِينْ إِشْنَانْ إِتّْڒَاحنْ أَكْ-ذ ثُوذَارْثْ.

‏10 مِينْزِي أَربِّي وَارْ إِدْجِي ذ ونِّي وَارْ إِسڭّْذنْ مَاحنْذْ أَذْ إِتُّو ڒْخذْمثْ نْومْ ذ ثَايْرِي نْومْ، ثنِّي ثُوغَا ثسّشْنمْ ذڭْ يِيسمْ نّسْ، إِ زَّايسْ ثُوغَا كنِّيوْ ثْسخَّارمْ إِ إِمْقدَّاسنْ ؤُشَا ثتّْسخَّارمْ أَسنْ عَاذْ.   

‏11 مَاشَا ذَايْنغْ مژْرِي حِيمَا كُوڒْ إِجّنْ زَّايْومْ أَذْ إِسّْشنْ أَمْحَاضْ ذ إِجّْ إِ ؤُكمّڒْ ن ؤُسِيثمْ أَڒْ أَنڭَّارْ،

‏12 وَارْ ثتِّيڒِيمْ ذ إِمعْڭَازْ، مَاشَا أَذْ ثِيڒِيمْ ذ إِمضْفَارنْ ن يِينِّي س لْ-إِيمَانْ ذ تَّاسِيعْ ن ڒْخَاضَارْ ذوْڒنْ ذ إِوْرِيثنْ ن لْوَاعْذْ.

أَمْثَانْ ن لْوَاعْذْ ن أَربِّي

‏13 مِينْزِي ڒَامِي إِوَاعْذْ أَربِّي إِبْرَاهِيمْ، إِجِّيدْجْ س يِيخفْ نّسْ، مِينْزِي وَارْ ذِينْ إِدْجِي ونّغْنِي إِمْغَارْ خَاسْ مَاحنْذْ أَذْ أَسْ إِجَّادْجْ،

‏14 إِنَّا:

”س ثِيذتّْ، أَذْ أَشْ بَارْكغْ

ؤُشَا أَذْ أَشْ أَرْنِيغْ أَطَّاسْ س وَاطَّاسْ.“   

‏15 ؤُشَا أَمُّو، أَمْ إِتّْصبَّارْ، أَقَا إِكْسِي إِبْرَاهِيمْ لْوَاعْذْ.

‏16 مَاغَارْ إِوْذَانْ جُّودْجنْ غَارْ مِينْ خَاسنْ إِدْجَانْ ذ أَمقّْرَانْ ؤُ مَارَّا أَمْشُوبّشْ جَارْ أَسنْ أَذْ إِقْضَا نِيشَانْ س إِشْثْ ن ثْجَادْجِيثْ.   

‏17 س ؤُينِّي ثُوغَا إِخْسْ أَربِّي أَذْ إِسّْشنْ س ؤُفيّضْ إِ إِوْرِيثنْ بلِّي لْوَاعْذْ نّسْ وَارْ إِتّْبذِّيڒْ شَا، ؤُشَا إِضْمنْ إِ-ث س إِشْثْ ن ثْجَادْجِيثْ.

‏18 حِيمَا س ثْنَاينْ ن ثْمسْڒَايِينْ وَارْ تّْبذِّيڒنْثْ شَا، أَمْ وَارْ إِزمَّارْ خنِّي أَذْ إِسّْخَارّقْ أَربِّي - ، أَذْ ذَايْنغْ إِتّْوَاڭّْ ؤُڒْ س وَاطَّاسْ، أَقَا ذَايْنغْ ذِي نشِّينْ إِنِّي غَارسْ أَروْڒنْ، حِيمَا أَذْ نطّفْ ذڭْ ؤُسِيثمْ إِ ذ أَنغْ إِتّْوَاوَاعْذنْ،

‏19 ذ ونِّي غَارْنغْ أَمشْنَاوْ أَڒيْزِيمْ ذِي ڒعْمَارْ نّغْ، مَاحنْذْ إِدْجْ ڒعْمَارْ إِمْثنْ، إِجّْ ن ؤُڒيْزِيمْ إِ د-إِتَّاذْفنْ غَارْ ذَاخڒْ ن ؤُڒحَّافْ، ‏20 مَانِي يُوذفْ يشُّو ونِّي ذ أَنغْ إِزْوَارنْ خْ ثِيزِي نّغْ، أَقَا إِذْوڒْ ذ أَكهَّانْ إِ ڒبْذَا ذِي صِّيفثْ ن مَالْكِيصَاذِيقْ.