ثِيثُوسْ 2

ثَاغُورِي ن صَّاحْ

‏1 مَاشَا شكْ، سِيوڒْ مِينْ إِتّْڒِيقنْ إِ ثْغُورِي ن صَّاحْ.

‏2 سڒْمذْ إِوسَّارنْ مَاحنْذْ أَذْ إِڒِينْ فَاقنْ، أَذْ ؤُيُورنْ س ؤُثبّثْ ذ ثَازْذُوڭِي، ؤُ س لْ-إِيمَانْ ن صَّاحْ ؤُ س ثَايْرِي ذ ضّْبَارْ. ‏3 سڒْمذْ ثِيوسُّورَا عَاوذْ أَمُّو، مَاحنْذْ أَذْ ڭُّورنْثْ أَمْ إِتّْڒِيقْ أَكْ-ذ ثِيڭّْوُوذِي زِي أَربِّي، وَارْ تّْشقِّيفنْثْ شَا، وَارْ وْشِينْثْ إِ بِينُو، مَاشَا أجّْ إِ-ثنْثْ أَذْ سّْڒمْذنْثْ مِينْ إِصبْحنْ،    ‏4 حِيمَا أَذْ شجّْعنْثْ ثِيمْغَارِينْ ثِيمژْيَانِينْ أَذْ ؤُيُورنْثْ س ؤُوقَّارْ، أَذْ خْسنْثْ إِرْيَازنْ نْسنْثْ ذ ثَارْوَا نْسنْثْ، ‏5 ؤُشَا أَذْ ذَايْسنْثْ يِيڒِي ؤُثبّثْ ذ ثَازْذُوڭِي، أَذْ وْشنْثْ ثَايْنِيثْ إِ أَيْثْ بَابْ ن ثَادَّارْثْ نْسنْثْ، أَذْ ڭّنْثْ أَرَّايْ إِ يرْيَازنْ نْسنْثْ، حِيمَا ؤُڒَا ذ إِجّْ وَارْ إِتّْوَاشقّفْ شَا ذڭْ وَاوَاڒْ ن أَربِّي.   

‏6 شجّْعثْ عَاوذْ إِبْڒِيغنْ حِيمَا أَذْ ؤُيُورنْ أَمْ أَيْثْ ن ڒحْڒَاڒْ. ‏7 أڭّْ إِخفْ نكّْ ذِي مَارَّا ذ لْمَاثَالْ ن ڒخْذَايمْ ثِيصبْحَانِينْ ؤُ خْمِي ثسّْڒمْذذْ، أجّْ أَوَاڒْ نّكْ أَذْ يِيڒِي ذ صّحْ،    ‏8 س ثْسخَّايْثْ، بْڒَا ڒْغشّْ ؤُشَا ؤُڒَا ذ إِجّْ أَذْ ث إِسّحْقَارْ، أَڒْ غَا إِسضْحَا بُو-ثْغنَّانْثْ ؤُمِي وَارْ إِزمَّارْ أَذْ خَانغْ إِسِّيوڒْ س ؤُڒَا ذ إِجّْ ن وَاوَاڒْ إِسّْفطَّاحنْ.   

‏9 إِتّْخصَّا إِ إِمْسخَّارنْ حِيمَا أَذْ طَّاعنْ إِ أَيْثْبَابْ نْسنْ، أَذْ أَسنْ أَرْضَانْ ذِي مَارَّا، وَارْ ثنْ تّْعكّْسنْ،   

‏10 وَارْ تَّاشَارنْ، مَاشَا أَذْ سّشْننْ ڒْمَانثْ نْسنْ إِشْنَانْ، حِيمَا ثْغُورِي ن أَربِّي، ڒْعُونْصَارْ نّغْ ن ثُوذَارْثْ، أَذْ أَسْ إِتّْوَاڭّْ شَّانْ.

‏11 مِينْزِي أَرْضَا ن أَربِّي إِ ؤُسنْجمْ ن مَارَّا، أَقَا إِفّغْ-د إِ مَارَّا إِوْذَانْ،

‏12 حِيمَا أَذْ أَنغْ ثَاربَّا مَاحنْذْ أَذْ نتّجّْ ڒقْجَاحثْ ذ نّشْوَاثْ ن دُّونشْثْ، حِيمَا أَذْ ندَّارْ ذِي دُّونشْثْ-أَ س ؤُثبّثْ ذ ثْسڭْذَا س ؤُوقَّارْ إِ أَربِّي،   

‏13 أَمْ نتّْرَاجَا أَسِيثمْ إِتّْوَابَارْكنْ ؤُڒَا ذ أَسَارْڭبْ ن ؤُعُودْجِي ن أَربِّي أَمقّْرَانْ ذ ڒْعُونْصَارْ نّغْ ن ثُوذَارْثْ، يشُّو لْمَاسِيحْ،   

‏14 ونِّي إِ خَانغْ إِوْشِينْ إِخفْ نّسْ، مَاحنْذْ أَذْ أَنغْ إِسلّكْ زِي مَارَّا ڒْمُوعْصِييّثْ، حِيمَا أَذْ إِسِّيزْذڭْ إِ يِيخفْ نّسْ إِجّْ ن ڒْڭنْسْ إِمحْضنْ إِ ڒخْذَايمْ ثِيصبْحَانِينْ.   

‏15 سِيوڒْ خْ مَانْ أَيَا، زِييَّارْ ؤُ وبّخْ س مَارَّا جّهْذْ، وَارْ ثجِّي حذْ أَذْ شكْ إِسّحْقَارْ.