إِكُولُوسِييّنْ 2

‏1 مِينْزِي خْسغْ أَذْ ثسّْنمْ مشْحَاڒْ ذ أَمقّْرَانْ أَمنْغِي إِ تّڭّغْ خَاومْ ؤُ خْ ينِّي ذِي لَايُوذِيكِييَا ؤُ خْ مَارَّا إِنِّي وَارْ ذ أَيِي ژْرِينْ شَا س أَرِّيمثْ ذ وُوذمْ إِنُو، ‏2 حِيمَا أَذْ يَاذفْ ؤُفوّجْ غَارْ وُوڒَاونْ نْسنْ، ؤُ س ثَايْرِي أَذْ أَوْضنْ غَارْ ڒَامَانْ ذ ڒفْهَامثْ ذ ثُوسّْنَا ن سِّيرّْ ن أَربِّي، ثَابَابَاثْ، ؤُ ن لْمَاسِيحْ،    ‏3 نِّي ذِي نُّوفَّارنْ مَارَّا ڒكْنُوزْ ن ثِيغِيثْ ذ ثُوسّْنَا.   

أَعْڒَامْ غَارْ ڒْمُومِينْ خْ ثْغُورِي إِسّْخَارِّيقنْ

‏4 مَانْ أَيَا قَّارغْ ث، حِيمَا ؤُڒَا ذ إِجّْ وَارْ كنِّيوْ إِغكّْوِي شَا س وَاوَاڒنْ إِزوّْقنْ.    ‏5 وَاخَّا أَقَا أَيِي غَابغْ زِي جِّيهثْ ن أَرِّيمثْ، نِيشَانْ أَقَا أَيِي أَكِيذْومْ زِي جِّيهثْ ن أَرُّوحْ ؤُشَا فَارّْحغْ أَمْ تّْوَاڒِيغْ أَستّفْ ذ لْ-إِيمَانْ نْومْ نِيشَانْ ذِي لْمَاسِيحْ.   

‏6 أَمشْنَاوْ مَامّشْ ثْقبْڒمْ يشُّو لْمَاسِيحْ، سِيذِيثْنغْ، ؤُيُورمْ ذَايسْ،

‏7 أَمْ ثوْثِيمْ إِژوْرَانْ ؤُ ثتّْوَابْنَامْ ذَايسْ ؤُشَا ثتّْوَاضْممْ ذِي لْ-إِيمَانْ أَمْ مَامّشْ ثتّْوَاسّْڒمْذمْ، أَمْ ثتّْوَافيّْضمْ س ؤُقَاذِي.    ‏8 حْضَامْ ؤُڒَا ذ إِجّْ وَارْ كنِّيوْ إِغكّْوِي شَا س لْفلْسَافَا نِيغْ س وشْمَاثْ إِخْوَانْ عْلَاحْسَابْ ثُوبَّارْثْ ن إِوْذَانْ ؤُ عْلَاحْسَابْ لْفَارَايِيضْ ثِيمزْوُورَا ن دُّونشْثْ، وَارْ إِدْجِي عْلَاحْسَابْ لْمَاسِيحْ.    ‏9 مِينْزِي ذَايسْ إِزدّغْ قَاعْ ڒكْمَاڒثْ ن أَربِّي ذِي صِّيفثْ ن أَرِّيمثْ.

‏10 أَقَا ثدْجَامْ ثْكمّْڒمْ ذَايسْ، مَاغَارْ نتَّا ذ أَزدْجِيفْ خْ قَاعْ ڒحْكَامَاثْ ذ صُّولَاطَاثْ.   

‏11 أَقَا ثتّْوَاخثْنمْ ذَايسْ عَاوذْ س يِيجّْ ن وخْثَانْ، وَارْ إِدْجِي س إِفَاسّنْ ن إِوْذَانْ، مَاشَا ؤُمِي ثتّْوَاكّسْ زَّايْومْ أَرِّيمثْ ن دّْنُوبْ س وخْثَانْ ن لْمَاسِيحْ   

‏12 كنِّيوْ ثتّْوَانضْڒمْ أَكِيذسْ ذڭْ ؤُسغْضصْ، ؤُ زَّايسْ ثتّْوَاسْنكَّارمْ عَاوذْ أَكِيذسْ، مِينْزِي ثُومْنمْ ذِي جّهْذْ ن أَربِّي ونِّي ث-إِ-د-إِسّْنكَّارنْ زِي ثَادَّارْثْ ن إِمتِّيننْ.   

‏13 كنِّيوْ، إِنِّي ثُوغَا ذ إِمتِّيننْ س دّْنُوبْ نْومْ ؤُ س بْڒَا أَخْثَانْ ن ويْسُومْ نْومْ، أَقَا نتَّا يَارَّا كنِّيوْ عَاوذْ غَارْ ثُوذَارْثْ أَكْ-ذ يِيخفْ نّسْ ؤُمِي ذ أَنغْ إِغْفَارْ مَارَّا ڒْمُوعْصِييّثْ نّغْ.   

‏14 س صُّولْطَا نّسْ أَقَا إِمْسحْ ثَابْرَاثْ ن ثنْفُوتْشْ ثنِّي ذ أَنغْ إِتّهْمنْ، أَقَا إِكْسِي ت زِي ڒْوسْثْ أَمْ ت إِسمَّارْ خْ صَّالِيبْ نّسْ.

‏15 أَمْ إِسَّارْسْ أَرِّيمثْ نّسْ، أَقَا إِسّضْهَارْ ڒحْكَامَاثْ ذ صُّولَاطَاثْ بْطَايْطَايْ ؤُشَا يَارَّا إِ-ثنْثْ أَذْ سّضْحَانْثْ س يِيخفْ نّسْ.   

‏16 خنِّي وَارْ ثجِّيمْ أَذْ كنِّيوْ إِسّهْوڒْ ؤُڒَا ذ إِجّْ، نِيغْ ذِي مَاشَّا ؤُڒَا ذِي ثِيسِّيثْ، نِيغْ ذڭْ وُوسَّانْ ن ڒعْيُوذَاثْ ؤُڒَا ذڭْ وَاسّْ ن ؤُيُورْ ن جْذِيذْ نِيغْ ذڭْ وُوسَّانْ ن سّبْثْ،   

‏17 مَاغَارْ ثِينَا ذ ثِيڒِي ن مِينْ إِ د غَا يَاسنْ، مَاشَا لْمَاسِيحْ أَقَا-ث ذ أَرِّيمثْ.   

‏18 وَارْ تّجِّيمْ حذْ أَذْ خَاومْ يڭّْ مَاحنْذْ أَذْ ثسّْوَاضْعمْ ڒْبَاڒْ ن يِيخفْ نْومْ إِ وعْبَاذْ ن لْمَالَاكَاثْ، أَمْ يَارزُّو أَذْ د-يَاذفْ ذِي مِينْ وَارْ إِژْرِي. أَقَا نتَّا إِخْوَا ذِي ثُوفّثْ نّسْ س ڒعْقڒْ نّسْ ن بْنَاذمْ،   

‏19 أَمْ وَارْ إِتّْشبَّارْ ذڭْ ؤُزدْجِيفْ إِ زِي ثْيمَّا قَاعْ أَرِّيمثْ س ڒمْغَارثْ إِ ذ أَسْ إِتِّيشْ أَربِّي، أَمْ ثتّْوَابْنَا ؤُ ثتّْوَاسنّذْ س ڒمْفَاصڒْ ذ إِغزْذِيسنْ نّسْ.

‏20 مَاغَارْ مَاڒَا ثمُّوثمْ أَكْ-ذ لْمَاسِيحْ إِ لْفَارَايِيضْ ثِيمزْوُورَا ن دُّونشْثْ، مَايمِّي خَاومْ تّْوَاڭّنْثْ عَاذْ ثوْصيَّاثْ أَخْمِي ثدَّارمْ عَاذْ ذِي دُّونشْثْ؟    ‏21 ’وَارْ ثْحَاذَا!‘، ’وَارْ ثْقَاسَا!‘، ؤُ ’وَارْ ثطّفْ!‘، ‏22 أَقَا أَثنْثْ ذ ثِينَامِيثِينْ أَذْ ودَّارنْثْ، أَقَا أَثنْثْ عْلَاحْسَابْ ثِيوصَّا ذ ثْغُورِي ن إِوْذَانْ.    ‏23 نِيثْنِي تّْبَاننْ أَخْمِي غَارْسنْ أَوَاڒْ ن ثِيغِيثْ، س وُوذمْ ن ؤُوَاضعْ ذ نّيّثْ ثَاذِييَانشْثْ، نْهْڒَا أَشطَّارْ خْ أَرِّيمثْ، مَاشَا وَارْ إِدْجِي إِ مِينْ إِشنْعنْ، مَاشَا إِ ثْيَاوَانْثْ ن ويْسُومْ ن يِيخفْ نْسنْ.