إِرُومَانِييّنْ 16

أَسدْجمْ غَارْ ؤُنڭَّارُو

‏1 وكّْڒغْ أَومْ ؤُتْشْمَاثْنغْ فُوبِي، ثنِّي ذ ثَامْسخَّارْثْ ن ثْمسْمُونْثْ ذِي كِينْخْرِييُوسْ، ‏2 حِيمَا أَذْ زَّايسْ ثَارحّْبمْ ذِي سِيذِيثْنغْ، أَمْ مَامّشْ إِتّْڒِيقْ إِ إِمْقدَّاسنْ، ؤُشَا أَذْ ت ثْعَاوْنمْ ذِي مَارَّا مِينْ زَّايْومْ ثتَّارْ نتَّاثْ، مِينْزِي أَقَا ثْعَاونْ أَطَّاسْ، ؤُڒَا ڒَا ذ نشّْ.

‏3 سدْجْممْ س ڒهْنَا خْ بْرِيسْكِيلَّا ذ أَكْوِيلَا، إِنِّي ذ إِمْسخَّارنْ أَكِيذِي ذِي يشُّو لْمَاسِيحْ،    ‏4 نِيثْنِي سبّْڒنْ ثُوذَارْثْ نْسنْ خْ سِّيبّثْ إِنُو. وَارْ دْجِيغْ ذ نشّْ وَاهَا ونِّي ثنْ إِتّْقَاذَانْ، مَاشَا عَاوذْ مَارَّا ثِيمسْمُونِينْ ن ڒڭْنُوسْ.

‏5 سدْجْممْ عَاوذْ س ڒهْنَا خْ ثْمسْمُونْثْ ثنِّي ذِي ثَادَّارْثْ نْسنْ.

سدْجْممْ خْ إِبَانِيثُوسْ، أَمْعِيزّْ إِنُو، س ڒهْنَا. نتَّا إِدْجْ زڭْ إِمنْزَا ن أَخَايَا ذِي لْمَاسِيحْ.

‏6 سدْجْممْ خْ مَارْيَامْ س ڒهْنَا. نتَّا ثُوغَا ثتَّامَارْ أَطَّاسْ خَاومْ.

‏7 سدْجْممْ س ڒهْنَا خْ أَنْذْرُونِيكُوسْ ذ يُونِييَاسْ إِنِّي ذ رَادْجْ إِنُو ذ إِمحْبَاسْ أَكِيذِي، أَقَا أَثنْ ذ إِرْيَازنْ إِتّْوَاسّْننْ غَارْ رُّوسُولْ، ثُوغَا أَثنْ ذِي لْمَاسِيحْ قْبڒْ خَافِي.   

‏8 سدْجْممْ س ڒهْنَا خْ أَمْبْلِييَاسْ، أَمْعِيزّْ إِنُو ذِي سِيذِيثْنغْ.

‏9 سدْجْممْ س ڒهْنَا خْ ؤُرْبَانُوسْ، ونِّي ذ أَمْسخَّارْ أَكِيذْنغْ ذِي لْمَاسِيحْ،

ؤُ أَسْثَاخِيسْ أَمْعِيزّْ إِنُو.

‏10 سدْجْممْ س ڒهْنَا خْ أَبِيلِّيسْ ونِّي إِتّْوَافَارْزنْ ذِي سِيذِيثْنغْ.

سدْجْممْ س ڒهْنَا خْ أَيْثْبَابْ ن ثَادَّارْثْ ن أَرِيسْثُوپُولُوسْ.

‏11 سدْجْممْ س ڒهْنَا خْ هِيرُوذِييُونْ ونِّي ذ ڒَادْجْ إِنُو.

سدْجْممْ س ڒهْنَا خْ أَيْثْبَابْ ن ثَادَّارْثْ ن نَارْكِيسُّوسْ إِنِّي إِدْجَانْ ذِي سِيذِيثْنغْ.

‏12 سدْجْممْ س ڒهْنَا خْ ثَارِيفِينَا ذ ثَارِيفُوسَا ثِينِّي إِتَّامَارنْ ذِي سِيذِيثْنغْ.

سدْجْممْ س ڒهْنَا خْ بَارْسِيسْ، أَمْعِيزّْ، ونِّي إِتَّامَارنْ أَطَّاسْ ذِي سِيذِيثْنغْ.

‏13 سدْجْممْ س ڒهْنَا خْ رُوفُوسْ ونِّي إِتّْوَافَارْزنْ ذِي سِيذِيثْنغْ، ؤُڒَا خْ يمَّاسْ ثنِّي عَاوذْ أَمْ إِشْثْ ن ثْيمَّاثْ إِ نشّْ.

‏14 سدْجْممْ س ڒهْنَا خْ أَسِينْكْرِيثُوسْ، فْلِيڭُونْ، هِيرْمَاسْ، بَاثْرُوبَاسْ، هِيرْمِيسْ ؤُشَا خْ وَاوْمَاثنْ إِنِّي أَكِيذْسنْ.

‏15 سدْجْممْ س ڒهْنَا خْ فِيلُولُوغُوسْ ذ جُولِييَا ذ نِيرِييُوسْ ذ ؤُتْشْمَاسْ ذ ؤُلِيمْبَاسْ ذ مَارَّا إِمْقدَّاسنْ إِنِّي أَكِيذْسنْ.

‏16 سدْجْممْ خْ وَايَاوْيَا س ؤُسُوذمْ إِقدّْسنْ.

مَارَّا ثِيمسْمُونِينْ ن لْمَاسِيحْ مَارَّا تّْسدْجَامنْثْ خَاومْ.   

‏17 مَاشَا تّْزَاوْڭغْ كنِّيوْ، أَ ثَاوْمَاثْ، مَاحنْذْ أَذْ ثحْضَامْ زِي وِي إِتّڭّنْ أَمسبْضِي ذ ثْعِينْكْرِيفِينْ، بَارَّا إِ ثْغُورِي إِ ثغْرِيمْ. بعّْذمْ خَاسنْ.   

‏18 مِينْزِي أَمشْنَاوْ إِنَا وَارْ سخَّارنْ شَا إِ سِيذِيثْنغْ يشُّو لْمَاسِيحْ، مَاشَا إِ ؤُعذِّيسْ نْسنْ. س ڒهْرُوذْ إِصبْحنْ ذ وَاوَاڒنْ إِزوّْقنْ خدّْعنْ ؤُڒَاونْ ن إِحَافِييّنْ.   

‏19 مِينْزِي طَّاعثْ نْومْ ثتّْوَاسّنْ غَارْ مَارَّا إِوْذَانْ. س ؤُينِّي فَارْحغْ زَّايْومْ، مَاشَا خْسغْ أَذْ ثِيڒِيمْ ذ إِمِيغِيسنْ ذِي ثْشُونِي ؤُڒَا ذ إِمزْذَاڭنْ زِي ڒْغَارْ.    ‏20 أَربِّي ن ڒهْنَا أَذْ إِثحَّا شِّيطَانْ سَاذُو إِضَارنْ نْومْ ذغْيَا. أَرْضَا ن سِيذِيثْنغْ يشُّو لْمَاسِيحْ أَذْ كِيومْ يِيڒِي. أَمِينْ.

‏21 إِتّْسدْجَامْ-د خَاومْ ثِيمُوثِييُو ونِّي إِخدّْمنْ أَكِيذِي س ڒهْنَا،

ؤُڒَا ذ إِنِّي زِي ڒَادْجْ إِنُو: لُوكِييُوسْ ذ يَاسُونْ ذ سُوسِيبَاثْرُوسْ.   

‏22 نشّْ، ثَارْثِييُوسْ، ونِّي يُورَانْ ثَابْرَاثْ-أَ، تّْسدْجَامغْ خَاومْ ذِي سِيذِيثْنغْ س ڒهْنَا.

‏23 إِتّْسدْجَامْ-د خَاومْ خَايُوسْ س ڒهْنَا. نتَّا يَارحّبْ زَّايِي ؤُڒَا زِي ثْمسْمُونْثْ مَارَّا.

إِتّْسدْجَامْ-د خَاومْ إِرَاسْثُوسْ س ڒهْنَا. نتَّا ذ أَمْكلّفْ خْ لْبَالَاذِييَّا ذ كْوَارْثُوسْ، ؤُمَاثْنغْ.   

أَوَاڒْ غَارْ ؤُنڭَّارْ

‏24 إِ ونِّي غَارْ ثدْجْ صُّولْطَا مَاحنْذْ أَذْ كنِّيوْ إِضْمنْ عْلَاحْسَابْ ڒخْبَارْ أَصبْحَانْ إِنُو إِ إِتّْوَابَارّْحنْ زِي جِّيهثْ ن يشُّو لْمَاسِيحْ، عْلَاحْسَابْ أَسَارْڭَابْ ن سِّيرّْ ونِّي ثُوغَا إِنُّوفَارنْ ذڭْ إِكُوذنْ ن ڒْوقْثْ ن ڒبْذَا، ‏25 مَاشَا أَقَا إِتّْوَاسّضْهَارْ-د ڒخُّو س ثِيرَا إِقدّْسنْ س ؤُفُوسْ ن إِنَابِييّنْ ؤُ إِتّْوَاسْشنْ إِ مَارَّا ڒڭْنُوسْ عْلَاحْسَابْ ڒُومُورْ ن أَربِّي ونِّي إِدْجَانْ إِ ڒبْذَا أَڒَامِي ذ أَسْ إِ غَا طَّاعنْ س لْ-إِيمَانْ،    ‏26 أَقَا إِ نتَّا ونِّي ذ بَابْ ن ثِيغِيثْ وحّْذسْ، إِ نتَّا ؤُمِي غَا يِيڒِي ؤُعُودْجِي س يشُّو لْمَاسِيحْ إِ ڒبْذَا قَاعْ. أَمِينْ.

‏27 أَرْضَا ن سِيذِيثْنغْ يشُّو لْمَاسِيحْ أَذْ كِيومْ يِيڒِي مَارَّا. أَمِينْ.