إِرُومَانِييّنْ 10

‏1 أَ أَيْثْمَا، أَمژْرِي ن وُوڒْ إِنُو ؤُ ثَاژَادْجِيثْ ثنِّي ژُودْجغْ غَارْ أَربِّي ذِي طّْوعْ ن إِسْرَايِيلْ، أَقَا-ت حِيمَا أَذْ غَارْسنْ ثِيڒِي ثُوذَارْثْ. ‏2 أَقَا شهّْذغْ خَاسنْ أَقَا نِيثْنِي غَارْسنْ شْضَارثْ إِ أَربِّي، مَاشَا بْڒَا ثُوسّْنَا.    ‏3 مَاغَارْ وَارْ سِّيننْ ثَاسڭْذَا ن أَربِّي، مَاشَا أَرزُّونْ أَذْ طّْفنْ ذِي ثْسڭْذَا ن إِخفْ نْسنْ. س ؤُيَا وَارْ سّْوَاضْعنْ إِخفْ نْسنْ إِ ثْسڭْذَا ن أَربِّي.

‏4 مِينْزِي أَكمّڒْ ن شَّارِيعَا نتَّا ذ لْمَاسِيحْ، إِ ثْسڭْذَا إِ كُوڒْ إِجّنْ إِ إِتَّامْننْ.    ‏5 مِينْزِي مُوسَا يُورَا زِي جِّيهثْ ن ثْسڭْذَا ذِي شَّارِيعَا:

”ونِّي إِتّڭّنْ مَانْ أَيَا،

أَذْ زَّايسْ إِدَّارْ.“   

‏6 مَاشَا ثَاسڭْذَا ثنِّي زِي لْ-إِيمَانْ ثقَّارْ أَمُّو:

”وَارْ ثقَّارْ ذڭْ وُوڒْ نّكْ:

’وِي إِ غَا إِڭعّْذنْ غَارْ ؤُجنَّا ؤُشَا إِسّهْوَا لْمَاسِيحْ؟“   

‏7 نِيغْ:

”وِي إِ غَا إِهْوَانْ ذڭْ وحْفُورْ ن ڒَاخَارْثْ،

ؤُشَا إِسّْڭعّذْ لْمَاسِيحْ زِي ثَادَّارْثْ ن إِمتِّيننْ؟“

‏8 مَاشَا مِينْ غَا ثِينِي ثْسڭْذَا؟

”أَوَاڒْ يُوذسْ إِ شكْ، أَقَا-ث ذڭْ ؤُقمُّومْ نّكْ ؤُڒَا ذڭْ وُوڒْ نّكْ.“

وَا ذ أَوَاڒْ ن لْ-إِيمَانْ إِ زِي نتّْبَارّحْ.“   

‏9 مَاڒَا ثْشهْذذْ سِيذِيثْنغْ يشُّو س ؤُقمُّومْ نّكْ ؤُشَا أَذْ ثَامْنذْ س وُوڒْ نّكْ بلِّي أَربِّي إِسّْنكَّارْ إِ-ث زِي ثَادَّارْثْ ن إِمتِّيننْ، أَذْ ثدَّارذْ.

‏10 مِينْزِي ؤُڒْ إِ ذَايسْ إِتَّامنْ، أَذْ إِتّْوَاسڭّذْ، ؤُشَا أَقمُّومْ إِ زَّايسْ إِشهّْذنْ، أَذْ إِدَّارْ.

‏11 مِينْزِي ثِيرَا إِقدّْسنْ قَّارنْثْ:

”مَارَّا وِي زَّايسْ إِ غَا يَامْننْ،

وَارْ إِتّْسضْحِي شَا.“   

‏12 مِينْزِي وَارْ إِتّڭّْ بُو ڒْفَارْزْ جَارْ وُوذَايْ ذ إِرَامِييّنْ، مِينْزِي نتَّا ذ إِجّنْ، سِيذِي نْسنْ مَارَّا، ونِّي ذ بُو-وَاڭْڒَا إِ مَارَّا إِنِّي خَاسْ د-إِتّْڒَاغَانْ.   

‏13 ”مِينْزِي كُوڒْ إِجّنْ ونِّي إِ غَا إِڒَاغَانْ س يِيسمْ ن سِيذِي،

أَذْ إِنْجمْ.“   

‏14 مَامّشْ إِ غَا ڒَاغَانْ خْ ونِّي ذِي وَارْ ؤُمِيننْ شَا؟ نِيغْ مَامّشْ إِ غَا يَامْننْ ذڭْ ونِّي ؤُمِي وَارْ سْڒِينْ، نِيغْ مَامّشْ إِ غَا سْڒنْ مَاڒَا ؤُڒَا ذ إِجّْ وَارْ زَّايسْ إِبَارّحْ شَا؟

‏15 مَامّشْ إِ غَا بَارّْحنْ مَاڒَا وَارْ د-تّْوَاسكّنْ؟ أَمْ مَامّشْ ثُورَا:

”مشْحَاڒْ ضَارْفنْ إِضَارنْ ن يِينِّي إِتّْبَارّْحنْ س ڒهْنَا،

ن يِينِّي إِتّْبَارّْحنْ س ثبْرَاثِينْ ثِيصبْحَانِينْ.“   

‏16 خنِّي مَاشِي مَارَّا طَّاعنْ إِ ڒخْبَارْ أَصبْحَانْ، مِينْزِي إِشَاعْيَا إِقَّارْ:

”أَ سِيذِي إِنُو، وِي إِ غَا يَامْننْ زِي ثبْرَاثْ نّغْ؟“   

‏17 أَقَا لْ-إِيمَانْ زڭْ ؤُسْحسِّي ؤُشَا أَسْحسِّي زڭْ وَاوَاڒْ ن أَربِّي.

‏18 مَاشَا أَذْ إِنِيغْ:

”مَا زعْمَا نِيثْنِي وَارْ سْڒِينْ؟“،

ؤُ:

”خْزَارْ، ڒْحسّْ نْسنْ إِفّغْ-د غَارْ مَارَّا ثَامُّورْثْ،

ؤُشَا أَوَاڒنْ نْسنْ غَارْ ثْنڭُّورَا ن دُّونشْثْ.“   

‏19 مَاشَا أَذْ إِنِيغْ:

”مَا إِسْرَائِيل وَارْ ثفْهِيمْ شَا مَانْ أَيَا؟“

غَارْ ؤُمزْوَارْ مُوسَا إِنَّا:

”أَذْ ذَايْومْ ڭّغْ ثُوسْمِي زڭْ إِنِّي وَارْ إِدْجِينْ شَا ذ ڒْڭنْسْ

ؤُشَا س يِيجّْ ن ڒْڭنْسْ أَفْغُوڒْ أَذْ ذَايْومْ ڭّغْ أَخيّقْ.“   

‏20 خنِّي إِشَاعْيَا إِزْعمْ أَذْ يِينِي:

”أَقَا ؤُفِينْ أَيِي، إِنِّي وَارْ خَافِي يَارزُّونْ،

أَقَا ذوْڒغْ بَانغْ-د إِ ينِّي وَارْ خَافِي إِسّقْسِينْ.“   

‏21 مَاشَا زِي جِّيهثْ ن إِسْرَائِيل إِقَّارْ:

”أَسّْ إِكْمڒْ سّْوِيژّْضغْ إِفَاسّنْ إِنُو

إِ إِجّْ ن ڒْڭنْسْ إِتّمْشبّْشنْ، إِعصَّانْ.“