إِرُومَانِييّنْ 6

أَسغْضصْ ذِي لْمَاسِيحْ

‏1 مِينْ إِ غَا نِينِي خنِّي؟ مَا أَذْ نقِّيمْ ذِي دّنْبْ حِيمَا أَذْ إِمَّارْنِي أَرْضَا؟ ‏2 عمَّارْصْ! نشِّينْ إِنِّي إِمُّوثنْ إِ دّنْبْ، مَامّشْ عَاذْ ذَايسْ إِ غَا ندَّارْ؟ ‏3 مَا وَارْ ثسِّينمْ شَا بلِّي إِنِّي زَّايْنغْ إِتّْوَاسّْغضْصنْ ذِي يشُّو لْمَاسِيحْ، تّْوَاسّْغضْصنْ ذِي ڒْموْثْ نّسْ؟    ‏4 أَقَا نتّْوَانْضڒْ أَكِيذسْ س ؤُسغْضصْ ذِي ڒْموْثْ، حِيمَا أَمْ مَامّشْ د-إِتّْوَاسْنكَّارْ لْمَاسِيحْ زِي ثَادَّارْثْ ن إِمتِّيننْ غَارْ ؤُعُودْجِي ن بَابَاسْ، أَمُّو إِ غَا نُويُورْ ؤُڒَا ذ نشِّينْ ذِي ثُوذَارْثْ ن جْذِيذْ.    ‏5 مِينْزِي مَاڒَا نتّْوَاژُّو ذ إِجّنْ أَكِيذسْ س ثفْرَاسْ ن ڒْموْثْ نّسْ، خنِّي أَمُّو إِ غَا نِيڒِي عَاوذْ ذ إِجّنْ أَكِيذسْ س ثفْرَاسْ ن ثْنُوكْرَا نّسْ.    ‏6 أَقَا نسّنْ بلِّي بْنَاذمْ نّغْ أَقْذِيمْ إِتّْوَاصلّبْ أَكِيذسْ، حِيمَا أَذْ ثبْضڒْ أَرِّيمثْ ن دّنْبْ، وَارْ نْذِيكّْوِيڒْ عَاوذْ ذ إِمْسخَّارنْ إِ دّنْبْ.    ‏7 مِينْزِي ونِّي إِمُّوثنْ، أَقَا إِتّْوَافكّْ زِي دّْنُوبْ.   

‏8 مَاڒَا ثُوغَا نمُّوثْ أَكْ-ذ لْمَاسِيحْ، أَقَا أجّْ أَنغْ أَذْ نَامنْ بلِّي أَذْ ندَّارْ عَاوذْ أَكْ-ذ لْمَاسِيحْ.    ‏9 مِينْزِي نسّنْ بلِّي لْمَاسِيحْ إِتّْوَاسْنكَّارْ-د زِي ثَادَّارْثْ ن إِمتِّيننْ، وَارْ إِتّْمتِّي عَاوذْ. أَقَا ڒْموْثْ وَارْ خَاسْ ثْحكّمْ عَاذْ.   

‏10 مِينْزِي زڭْ ؤُغزْذِيسْ ن ڒْموْثْ إِ إِمُّوثْ، أَقَا إِمُّوثْ إِ دّْنُوبْ إِجّْ ن ؤُمُورْ إِ ڒبْذَا، مَاشَا زڭْ ؤُغزْذِيسْ ن ثُوذَارْثْ إِ إِدَّارْ، إِدَّارْ إِ-ت إِ أَربِّي.   

‏11 أَمُّو كنِّيوْ عَاوذْ: حسْبمْ إِخفْ نْومْ ذ إِمتِّيننْ إِ دّنْبْ، مَاشَا ذ إِمدَّارنْ إِ أَربِّي ذِي سِيذِيثْنغْ، يشُّو لْمَاسِيحْ.

‏12 خنِّي وَارْ ثجِّيمْ دّنْبْ أَذْ إِحْكمْ ذِي أَرِّيمثْ نْومْ إِفنَّانْ، أَذْ أَسْ ثطَّاعمْ ذِي نّشْوَاثْ نّسْ،

‏13 ؤُشَا وَارْ تّوْشِيمْ إِغزْذِيسنْ ن أَرِّيمثْ نْومْ أَمْ دُّوزَانْ إِ ڒْمُوعْصِييّثْ، مَاشَا وْشمْ إِخفْ نْومْ إِ أَربِّي، أَمْ إِوْذَانْ إِنِّي إِذوْڒنْ غَارْ ثُوذَارْثْ جَارْ ن إِمتِّيننْ ؤُشَا وْشمْ إِغزْذِيسنْ ن أَرِّيمثْ نْومْ إِ أَربِّي أَمْ دُّوزَانْ إِ ثْسڭْذَا.   

‏14 دّنْبْ وَارْ خَاومْ إِحكّمْ شَا، مِينْزِي وَارْ ثدْجِيمْ سَاذُو شَّارِيعَا مَاشَا سَاذُو أَرْضَا.

إِمْسخَّارنْ ن ثْسڭْذَا

‏15 مَامّشْ خنِّي؟ مَا أَذْ نخْضَا مِينْزِي وَارْ ندْجِي شَا سَاذُو شَّارِيعَا، مَاشَا سَاذُو أَرْضَا؟ عمَّارْصْ!

‏16 مَا وَارْ ثسِّينمْ شَا بلِّي ونِّي ؤُمِي ثوْشِيمْ إِخفْ نْومْ ذ إِمْسخَّارنْ إِ طَّاعثْ، أَقَا كنِّيوْ ذ إِمْسخَّارنْ إِ ونِّي ؤُمِي ثطَّاعمْ، مَا إِ دّنْبْ إِ ثطَّاعمْ نِيغْ إِ ثْسڭْذَا؟   

‏17 ثْقَاذْ أَسْ إِ أَربِّي، أَقَا ثُوغَا كنِّيوْ ذ إِمْسخَّارنْ إِ دّنْبْ ؤُشَا ثْذوْڒمْ ثطَّاعمْ س وُوڒْ إِ دَّابْ إِصْفَانْ ن ؤُسڒْمذْ إِ زِي ثتّْوَاسْڒمْذمْ.

‏18 ڒَامِي ثتّْوَافكّمْ زِي دّنْبْ ثْذوْڒمْ ذ إِمْسخَّارنْ ن ثْسڭْذَا.   

‏19 سَّاوَاڒغْ أَمْ بْنَاذمْ خْ سِّيبّثْ ن ثُوضْعفْثْ ن أَرِّيمثْ نْومْ، مِينْزِي أَمْ مَامّشْ ثوْشِيمْ إِغزْذِيسنْ نْومْ ذ إِمْسخَّارنْ إِ ڒخْمجْ ؤُ إِ مِينْ إِدْجَانْ ضِيدّْ ن شَّارِيعَا أَڒْ غَا ثْضَادّمْ شَّارِيعَا، أَمنِّي ڒخُّو وْشمْ إِغزْذِيسنْ نْومْ ذ إِمْسخَّارنْ إِ ثْسڭْذَا أَڒْ غَا ثتّْوَاقدّْسمْ. ‏20 مِينْزِي ڒَامِي ثُوغَا كنِّيوْ ذ إِمْسخَّارنْ ن دّنْبْ، ثُوغَا كنِّيوْ ذ إِحُورِّييّنْ زِي جِّيهثْ ن ثْسڭْذَا.    ‏21 مَانْ ڒْغِيدْجثْ إِ ثُوغَا غَارْومْ ڒخْذنِّي؟ ثِيمسْڒَايِينْ ثِينِّي إِ زِي ثتّْصضْحَامْ ڒخُّو؟ س مِينْزِي أَنڭَّارْ نْسنْثْ ذ ڒْموْثْ. ‏22 مَاشَا ڒخُّو، ؤُمِي ثتّْوَافكّمْ زِي دّنْبْ ؤُشَا ثْذوْڒمْ ذ إِمْسخَّارنْ ن أَربِّي، أَقَا ڒْغِيدْجثْ نْومْ ثتّْوَاقدّسْ، ؤُشَا ؤُنڭَّارْ نّسْ ثُوذَارْثْ إِتّْذُومَانْ. ‏23 مِينْزِي ڒخْڒَاصْ ن دّنْبْ ذ ڒْموْثْ، مَاشَا ثَاوْهِيبْثْ ن أَرْضَا ن أَربِّي ذ ثُوذَارْثْ إِتّْذُومَانْ س سِيذِيثْنغْ، يشُّو لْمَاسِيحْ.