أَوَاڒنْ ن يشُّو خْ ڒمْڒَاشْ ذ وَادْجَافْ
19
1 أَڒَامِي إِكمّڒْ يشُّو أَوَاڒنْ-أَ، إِفّغْ زِي لْجَالِيلْ، يِيوضْ غَارْ جّْوَايهْ ن ثمُّورْثْ ن يَاهُوذِييَّا ثِينِّي إِدْجَانْ خْ ؤُجمَّاضْ ن يغْزَارْ ن لْ'ؤُرْذُونْ. ▪ 2 أَقَا إِضْفَارْ إِ-ث إِجّْ ن ڒْغَاشِي ذ أَمقّْرَانْ، إِسّْڭنْفَا ثنْ ذِينِّي. 3 ؤُسِينْ-د غَارسْ ؤُڒَا ذ إِفَارِيسِييّنْ، ثُوغَا أَرزُّونْ أَذْ ث جَارّْبنْ، نَّانْ أَسْ: ”مَا إِحدْجڒْ إِ ورْيَازْ أَذْ إِدْجفْ إِ ثمْغَارْثْ نّسْ أَمنِّي وَاهَا؟“ ▪ 4 يَارَّا-د خَاسنْ، إِنَّا: ”مَا وَارْ ثغْرِيمْ شَا بلِّي ونِّي ثنْ د-إِخڒْقنْ، إِخْڒقْ إِ-ثنْ-د زڭْ ؤُمزْوَارُو ذ أَوْثمْ ذ ثوْثمْثْ، ▪ 5 ؤُشَا أَقَا إِنَّا: ’س ؤُينِّي أَذْ إِسْمحْ ورْيَازْ ذِي بَابَاسْ ذ يمَّاسْ، أَذْ إِقّنْ غَارْ ثمْغَارْثْ نّسْ، ؤُشَا ثْنَاينْ إِذْسنْ نِّي أَذْ إِڒِينْ ذ إِشْثْ ن أَرِّيمثْ‘؟ ▪ 6 أَمُّو وَارْ تِّيڒِينْ عَاذْ ذ ثْنَاينْ، مَاشَا أَذْ إِڒِينْ ذ إِشْثْ ن أَرِّيمثْ. مِينْ إِسّْمُونْ أَربِّي، وَارْ ث إِبطِّي بْنَاذمْ.“ ▪ 7 نَّانْ أَسْ: ”مَايمِّي يُومُورْ مُوسَا خنِّي مَاحنْذْ أَذْ إِوْشْ ثَابْرَاثْ ن وَادْجَافْ، حِيمَا أَذْ أَسْ إِدْجفْ؟“ ▪ 8 إِنَّا أَسنْ: ”مُوسَا إِجَّا كنِّيوْ أَذْ ثدْجْفمْ إِ ثمْغَارِينْ نْومْ زِي سِّيبّثْ ن ڒقْسَاحثْ ن وُوڒَاونْ نْومْ، مَاشَا وَارْ إِدْجِي أَمُّو زڭْ ؤُمزْوَارُو. 9 مَاشَا نشّْ أَذْ أَومْ إِنِيغْ: ونِّي إِ غَا إِدْجْفنْ إِ ثمْغَارْثْ نّسْ، وَارْ إِدْجِي ذِي سِّيبّثْ ن فَارْقْ-شّْغڒْ، ؤُشَا أَذْ إِمْڒشْ إِشْثنْ نّغْنِي، أَقَا نتَّا إِزنَّا، ؤُ ونِّي إِ غَا إِمڒْشنْ ثَامْغَارْثْ ثنِّي إِدْجْفنْ، أَقَا ؤُڒَا ذ نتَّا إِزنَّا.“ ▪ 10 إِمحْضَارنْ نّسْ نَّانْ أَسْ: ”مَاڒَا أَمُّو إِ ثدْجْ ثْمسْڒَاشْثْ جَارْ بْنَاذمْ ذ ثمْغَارْثْ نّسْ، خنِّي نْهْڒَا مَا أَذْ إِمْڒشْ.“
11 مَاشَا نتَّا إِنَّا أَسنْ: ”مَاشِي مَارَّا زمَّارنْ أَذْ قبْڒنْ أَوَاڒْ-أَ مْغِيرْ إِنِّي ؤُمِي ثمّوْشْ. ▪
12 مِينْزِي أَقَا ذِينْ إِنِّي إِتّْوَاقسّنْ إِنِّي د-إِتّْوَاخڒْقنْ أَمُّو زڭْ ؤُعذِّيسْ ن يمَّاثْسنْ، ؤُشَا أَقَا ذِينْ إِنِّي إِتّْوَاقسّنْ زڭْ إِفَاسّنْ ن إِوْذَانْ ؤُشَا أَقَا ذِينْ إِنِّي إِقسّنْ إِخفْ نْسنْ ذِي طّْوعْ ن ثْڭلْذِيثْ ن إِجنْوَانْ. ونِّي إِزمَّارنْ أَذْ ث إِقْبڒْ، أجّْ إِ-ث أَذْ ث إِقْبڒْ.“
يشُّو إِبَاركْ إِحنْجِيرنْ إِمژْيَاننْ
13 ڒخْذنِّي إِوْينْ أَسْ-د إِحنْجِيرنْ إِمژْيَاننْ مَاحنْذْ أَذْ خَاسنْ إِسَّارْسْ أَفُوسْ نّسْ ؤُشَا أَذْ أَسنْ إِكْسِي س ڒْمعْرُوفْ، مَاشَا إِمحْضَارنْ نّسْ وبّْخنْ ثنْ. ▪
14 مَاشَا يشُّو إِنَّا: ”جّمْ إِحنْجِيرنْ أَذْ غَارِي د-أَسنْ، وَارْ ثنْ منّْعمْ شَا، مِينْزِي ثَاڭلْذِيثْ ن إِجنْوَانْ ن يِينِّي أَمشْنَاوْ نِيثْنِي.“ ▪
15 إِسَّارْسْ خَاسنْ أَفُوسْ نّسْ ؤُشَا إِرُوحْ سّنِّي.
يشُّو أَكْ-ذ وبْڒِيغْ ونِّي ذ بَابْ ن وَاڭْڒَا
16 ؤُشَا خْزَارْ، إِقَارّبْ-د إِجّنْ، إِنَّا أَسْ: ”أَ أَمْسغَّارْ أَصبْحَانْ، مِينْ غَا ڭّغْ ذ أَصبْحَانْ حِيمَا أَذْ غَارِي ثِيڒِي ثُوذَارْثْ إِتّْذُومَانْ؟“ ▪
17 إِنَّا أَسْ يشُّو: ”مَايمِّي إِ ذ أَيِي ثْڒَاغِيذْ ’أَصبْحَانْ‘؟ وَارْ إِدْجِي حذْ ذ أَصبْحَانْ مْغِيرْ إِجّنْ، أَقَا-ث ذ أَربِّي. مَاشَا مَاڒَا ثخْسذْ أَذْ ثَاذْفذْ غَارْ ثُوذَارْثْ، طّفْ ذِي ثْوصَّا.“
18 إِنَّا أَسْ: ”مَانْ ثِينَا؟“ إِنَّا أَسْ يشُّو: ”وَارْ نقّْ، وَارْ زنِّي، وَارْ تِّيشَارْ، وَارْ شهّذْ س ژُورْ، ▪
19 وقَّارْ بَابَاشْ ذ يمَّاشْ ؤُشَا أَذْ ثخْسذْ أَمْقَارّبْ نّكْ أَمْ إِخفْ نّكْ.“ ▪ 20 أَبْڒِيغْ إِنَّا أَسْ: ”أَقَا ضْفَارغْ ثِيمسْڒَايِينْ-أَ مَارَّا زِي ثمْژِي إِنُو. مِينْ ذ أَيِي إِتّْخِيصّنْ عَاذْ؟“ 21 يشُّو إِنَّا أَسْ: ”مَاڒَا ثخْسذْ أَذْ ثِيڒِيذْ ثْكمّْڒذْ، رُوحْ، زنْزْ مَارَّا مِينْ غَاركْ، أوْشْ إِ-ث إِ إِمزْڒَاضْ ؤُشَا أَذْ غَاركْ يِيڒِي إِجّْ ن ڒْكنْزْ ذڭْ ؤُجنَّا، خنِّي أَسْ-د، ضْفَارْ أَيِي-د.“ ▪ 22 ڒَامِي إِسْڒَا وبْڒِيغْ أَوَاڒْ-أَ، إِرُوحْ إِشْضنْ، مِينْزِي ثُوغَا غَارسْ أَطَّاسْ ن وَاڭْڒَا.
23 خَاسْ ؤُشَا إِنَّا يشُّو إِ إِمحْضَارنْ نّسْ: ”س ثِيذتّْ، نشّْ أَذْ أَومْ إِنِيغْ، أَقَا يوْعَارْ خْ بَابْ ن وَاڭْڒَا أَذْ يَاذفْ غَارْ ثْڭلْذِيثْ ن إِجنْوَانْ. ▪ 24 ؤُشَا نشّْ أَذْ أَومْ إِنِيغْ عَاوذْ، أَقَا إِهْونْ إِ وڒْغمْ أَذْ يكّْ زِي ثِيطّْ ن ثْسِينفْثْ خْ بُو وَاڭْڒَا أَذْ يَاذفْ غَارْ ثْڭلْذِيثْ ن أَربِّي.“ 25 ؤُمِي ت سْڒِينْ إِمحْضَارنْ نّسْ، نّْخڒْعنْ، نَّانْ: ”وِي إِزمَّارنْ خنِّي أَذْ إِتّْوَاسّنْجمْ عَاذْ؟“ 26 أَمْ ثُوغَا ذَايْسنْ إِخزَّارْ يشُّو، إِنَّا أَسنْ: ”غَارْ إِوْذَانْ وَارْ إِزمَّارْ، مَاشَا غَارْ أَربِّي كُوڒْشِي ذِي ثْزمَّارْ نّسْ!“ ▪
27 خنِّي يَارَّا-د بُوطْرُوسْ، إِنَّا أَسْ: ”خْزَارْ، أَقَا نشِّينْ نجَّا كُوڒْشِي، نضْفَارْ إِ شكْ-د. مِينْ غَارْنغْ إِ غَا يِيڒِينْ؟“ ▪ 28 يشُّو إِنَّا أَسنْ: ”س ثِيذتّْ، نشّْ أَذْ أَومْ إِنِيغْ، أَقَا خْمِي إِ غَا ثذْوڒْ مَارَّا دُّونشْثْ ذ جْذِيذْ، خْمِي إِ غَا إِقِّيمْ مِّيسْ ن بْنَاذمْ خْ ڒْعَارْشْ ن ؤُعُودْجِي نّسْ، أَقَا ؤُڒَا ذ كنِّيوْ إِنِّي ذ أَيِي د-إِضْفَارنْ أَذْ ثقِّيممْ خْ ثنْعَاشْ ن ڒكْرَاسِي إِڭلّْذنْ حِيمَا أَذْ ثْحكْممْ خْ ثنْعَاشْ ن ثْقبَّاڒْ ن أَيْثْ ن إِسْرَائِيل. ▪ 29 كُوڒْ إِجّنْ ونِّي إِسمْحنْ ذِي ثُوذْرِينْ نِيغْ ذڭْ أَيْثْمَاسْ نِيغْ ذِي يسّْمَاسْ نِيغْ ذِي بَابَاسْ نِيغْ ذڭْ يمَّاسْ نِيغْ ذِي ثمْغَارْثْ نّسْ ذ ثَارْوَا نّسْ ؤُڒَا ذِي ثْندَّامْ ذِي طّْوعْ ن يِيسمْ إِنُو، أَذْ إِكْسِي مْيَا ن ثْسقَّارْ ؤُشَا أَذْ إِوَارْثْ ثُوذَارْثْ إِتّْذُومَانْ. ▪ 30 مَاشَا أَطَّاسْ ن يِينِّي إِدْجَانْ ذ إِمزْوُورَا، أَذْ إِڒِينْ ذ إِنڭُّورَا ؤُشَا أَطَّاسْ ن إِنڭُّورَا أَذْ إِڒِينْ ذ إِمزْوُورَا.“ ▪