زَاكَارِييَّا 13

أَسفْصِي ذ ؤُسِيزْذڭْ ن ؤُرْشَالِيمْ

‏1 ”ذڭْ وَاسّْ نِّي ڭُّورْ أَذْ ثدُّوقّزْ إِشْثْ ن ثَاڒَا إِ ثَادَّارْثْ ن ذَاوُوذْ ؤُڒَا إِ إِمزْذَاغْ ن ؤُرْشَالِيمْ، ضِيدّْ إِ دّنْبْ ؤُ ضِيدّْ إِ ڒخْمجْ.

‏2 ذڭْ وَاسّْ نِّي أَذْ إِمْسَارْ، أَمُّو إِ إِقَّارْ سِيذِي ن ڒْعسْكَارَاثْ، نشّْ أَذْ ثحِّيغْ إِسْمَاونْ ن ڒخْيَاڒَاثْ ن صَّانَامْ زِي ثمُّورْثْ، حِيمَا وَارْ خَاسنْ عقّْڒنْ عَاذْ. ؤُڒَا ذ إِنَابِييّنْ ذ بُوحْبڒْ أَمنْڭُوسْ أَذْ ثنْ جّغْ أَذْ فّْغنْ زِي ثمُّورْثْ.    ‏3 أَذْ إِمْسَارْ، مَاڒَا شَا ن إِجّنْ أَذْ إِنبَّا، بلِّي بَابَاسْ ذ يمَّاسْ إِنِّي ث-إِ-د إِجِّينْ، أَذْ أَسْ إِنِينْ: ’شكْ وَارْ تّْغِيمِيذْ ثدَّارذْ، مَاغَارْ شكْ ثسِّيوْڒذْ إِخَارِّيقنْ ذڭْ إِسمْ ن سِيذِي!‘ بَابَاسْ ذ يمَّاسْ إِنِّي ث-إِ-د إِجِّينْ، أَذْ ث سّْنُوقّْبنْ، خْمِي إِ غَا إِنبَّا.   

‏4 ذڭْ وَاسّْ نِّي أَذْ إِمْسَارْ أَقَا إِنَابِييّنْ أَذْ سّضْحَانْ، كُوڒْ إِجّْ خْ ثْمژْرِيوْثْ نّسْ، خْمِي إِ غَا إِتّْنبَّا. نِيثْنِي وَارْ تِّيرِيضنْ شَا أَبَارْثسُّو ن شّْعَارْ مَاحنْذْ أَذْ سّْخَارّْقنْ. ‏5 نتَّا أَذْ يِينِي ’نشّْ وَارْ دْجِيغْ ذ أَنَابِي، نشّْ ذ إِجّْ ن ورْيَازْ ونِّي إِتّْفدْجْحنْ إِيَّارْ، مِينْزِي إِكْسبْ أَيِي إِجّنْ زِي ثمْژِي إِنُو.‘ ‏6 مَاڒَا أَذْ أَسْ إِنِينْ: ’مِينْ عْنَانْ خنِّي إِيزِّيمنْ نِّي ذڭْ إِفَاسّنْ نّكْ؟‘، أَذْ يِينِي نتَّا: ’أَمُّو إِتّْوَاوْثغْ ذِي ثَادَّارْثْ ن إِمْعِيزّنْ إِنُو.‘ “

‏7 ”سِّيفْ، كَّارْ خْ ؤُمكْسَاوْ إِنُو ؤُ خْ ورْيَازْ نِّي إِدْجَانْ ذ أَمْعَاشَارْ إِنُو!، أَمُّو إِ إِقَّارْ سِيذِي ن ڒْعسْكَارَاثْ. وّثْ أَمكْسَاوْ إِنُو ؤُشَا خنِّي أَذْ إِمّْسبْضَا وُودْجِي ؤُ نشّْ أَذْ أَرّغْ أَفُوسْ إِنُو ثِيوَّا إِمُوقْڒِيڒنْ.“   

‏8 ”أَذْ إِمْسَارْ ذِي ثَامُّورْثْ مَارَّا، إِقَّارْ سِيذِي، أَقَا ثْنَاينْ ن إِزيْنَاثْ أَذْ تّْوَاقضْعنْ ؤُ نِيثْنِي أَذْ سُّوفّْغنْ بُوحْبڒْ، مَاشَا أَزْينْ وِيسّْ ثْڒَاثَا أَذْ ذَايسْ إِقِّيمْ. ‏9 أَزْينْ وِيسّْ ثْڒَاثَا أَذْ ث نْضَارغْ ذِي ثْمسِّي، حِيمَا أَذْ إِتّْوَاصفَّا أَمْ مَامّشْ سّصْفَانْ نُّوقَارْثْ ؤُ نشّْ أَذْ ثنْ جَارّْبغْ أَمْ مَامّشْ تّْجَارَّابنْ ؤُرغْ. نتَّا أَذْ إِڒَاغَا س يِيسمْ إِنُو ؤُ نشّْ أَذْ أَسْ سْڒغْ. أَذْ إِنِيغْ: ’ڒْڭنْسْ إِنُو!‘ ؤُ نتَّا أَذْ يِينِي: ’سِيذِي ذ أَربِّي إِنُو!‘ “