ڒْحَاكمْ ونِّي إِ غَا د-إِخڒْقنْ ذِي بَايْثْ-لَاهْمْ
5
1 ”ؤُ شكْ، بَايْثْ-لَاحْمْ إِفْرَاثَا، وَاخَّا شكْ ذ أَمژْيَانْ أَڒَامِي وَارْ ثْزمَّارذْ أَذْ ثِيڒِيذْ جَارْ ڒُوڒُوفْ ن يَاهُوذَا،
أَقَا زَّايكْ إِ د غَا إِفّغْ نتَّا إِ نشّْ،
مَاحنْذْ أَذْ يِيڒِي ذ ڒْحَاكمْ خْ إِسْرَائِيل.
أَبَانِي نّسْ أَقَا-ث زِي مشْحَاڒْ ؤُيَا،
زڭْ وُوسَّانْ ن ڒبْذَا. ▪
2 خْ ؤُينِّي نتَّا أَذْ ثنْ إِسلّمْ أَڒْ ڒْوقْثْ نِّي،
أَقَا ثنِّي إِ غَا يَارْونْ، أَقَا ثُورُووْ-د.
خنِّي أَذْ د-إِذْوڒْ ڒْبَاقِي ن يَايْثْمَاسْ،
جْمِيعْ أَكْ-ذ أَيْثْ ن إِسْرَائِيل.
3 نتَّا أَذْ إِبدّْ ذِينِّي
ؤُشَا أَذْ يَارْوسْ ذِي جّهْذْ ن سِيذِي،
ذِي ڒُوعْڒَا ن يِيسمْ ن سِيذِي، أَربِّي نّسْ.
نِيثْنِي أَذْ زذْغنْ ذِينِّي،
مَاغَارْ نتَّا أَذْ يِيڒِي ذ أَمقّْرَانْ
أَڒْ إِنڭُّورَا ن ثمُّورْثْ. ▫
4 وَانِيثَا أَذْ يِيڒِي ذ ڒهْنَا.“
”خْمِي د غَا يَاسْ أَشُّورْ غَارْ ثمُّورْثْ نّغْ،
ؤُ خْمِي د غَا يَاذفْ غَارْ ڒقْصُورْ نّغْ،
خنِّي أَذْ أَسْ نسّڒْقَا سبْعَا ن إِمكْسَاونْ
ذ ثْمنْيَا ن أَيْثْ ن جّهْذْ زِي مِيدّنْ. ▪
5 نِيثْنِي أَذْ حْضَانْ خْ ثمُّورْثْ ن أَشُّورْ س سِّيفْ
ؤُ ثَامُّورْثْ ن نِيمْرُوذْ ذِي ثوُّورَا نّسْ.
أَمُّو نتَّا أَذْ أَنغْ إِسّنْجمْ زڭْ ؤُفُوسْ ن أَشُّورْ،
خْمِي د غَا يَاسْ وَانِيثَا غَارْ ثمُّورْثْ نّغْ
ؤُ خْمِي د غَا يَاذفْ غَارْ وُوذمْ ن ثمُّورْثْ نّغْ.“
ڒْبَاقِي نِّي إِ غَا إِنّجْمنْ
6 ”ڒْبَاقِي ن يَاعْقُوبْ أَذْ يِيڒِي ذِي ڒْوسْثْ ن ڒڭْنُوسْ
أَمشْنَاوْ نّْذَا ن سِيذِي،
أَمشْنَاوْ ثِيدُّومِينْ خْ وفْسُو أَزِيزَا،
ونِّي وَارْ إِخزَّارنْ غَارْ ؤُڒَا ذ إِجّْ ن ورْيَازْ
ؤُ وَارْ إِتّْرِيجِينْ ثَارْوَا ن بْنَاذمْ.
7 ڒْبَاقِي ن يَاعْقُوبْ أَذْ يِيڒِي جَارْ ڒڭْنُوسْ،
ذِي ڒْوسْثْ نْ ڒڭْنُوسْ،
أَمشْنَاوْ أَيْرَاذْ جَارْ ڒْمَاڒْ ن يزْغَارْ،
أَمشْنَاوْ أَيْرَاذْ ذ أَمژْيَانْ جَارْ ثْحِيمْرِيوِينْ ن وُودْجِي،
ونِّي، خْمِي إِ غَا إِعْذُو،
إِعفّسْ ؤُ إِتّْشَارَّاڭْ
ؤُشَا وَارْ ذِينْ ؤُڒَا ذ إِجّْ إِ غَا إِفكّنْ. ▫
8 أَفُوسْ نّكْ أَذْ يِيڒِي إِتّْوَاسْڭعّذْ سنّجْ إِ ينِّي إِ شكْ إِحصَّارنْ،
ؤُشَا مَارَّا ڒْعذْيَانْ نّكْ أَذْ تّْوَامْحَانْ.“
9 ”أَذْ إِمْسَارْ ذڭْ وَاسّْ نِّي، أَمُّو إِ إِقَّارْ سِيذِي،
أَقَا نشّْ أَذْ ثحِّيغْ إِيْسَانْ نّكْ زِي ڒْوسْثْ نّكْ
ؤُ أَذْ سّْهلّْكغْ إِكَارُّوثنْ نّكْ. ▪
10 أَذْ مْحِيغْ ثِيندَّامْ زِي ثمُّورْثْ نّكْ،
ؤُ أَذْ هذْمغْ مَارَّا لْپُورْجَاثْ نّكْ.
11 نشّْ أَذْ قضْعغْ ثَاسحَّارْثْ نّكْ زڭْ ؤُفُوسْ نّمْ،
ؤُ وَارْ غَاركْ تِّيڒِينْ عَاذْ إِبزْڭَاونْ.
12 ڒخْيَاڒَاثْ نّمْ إِنقْشنْ ذ إِمَايْضُوثنْ نّكْ إِقدّْسنْ،
أَذْ ثنْ مْحِيغْ زِي ڒْوسْثْ نّكْ،
حِيمَا وَارْ ثتِّيضَارذْ عَاذْ،
إِ ڒْخذْمثْ ن إِفَاسّنْ نّكْ.
13 ثِيربِّينْ نّكْ ن شْوَارْثِي أَذْ ثنْثْ ثحِّيغْ زِي ڒْوسْثْ نّكْ،
ؤُ أَذْ هذْمغْ ثِيندَّامْ نّكْ.
14 نشّْ أَذْ نْثَاقْمغْ س وغْضَابْ ؤُ س وسْعَارْ
خْ ڒڭْنُوسْ نِّي وَارْ إِتّخْسنْ أَذْ سْڒنْ.“