حُوشِيعَا 8

إِقَارّبْ-د ڒْحُوكْمْ خْ وعْبذْ ن إِفْرَايِيمْ إِ لَاصْنَامْ

‏1 ”ڭّمْ إِشّْ ن إِشَارِّي إِ ؤُصُوضِي غَارْ ؤُقمُّومْ نّكْ. أَمشْنَاوْ إِجّْ ن ؤُڭِيذرْ إِطَّاوْ سنّجْ إِ ثَادَّارْثْ ن سِيذِي، مَاغَارْ نِيثْنِي عدَّانْ خْ ڒْعَاهْذْ إِنُو ؤُ غوّْغنْ خْ شَّارِيعَا إِنُو.    ‏2 نِيثْنِي أَذْ خَافِي د-ڒَاغَانْ: ’أَربِّي إِنُو، نشِّينْ، إِسْرَائِيل، أَقَا نسّنْ شكْ!‘ ‏3 إِسْرَائِيل إِنْضَارْ مِينْ إِصبْحنْ، ڒعْذُو أَذْ ث إِضْفَارْ.

‏4 نِيثْنِي ڭِّينْ خَاسنْ إِجدْجِيذنْ، مَاشَا نِيثْنِي وَارْ دْجِينْ شَا زَّايِي، نِيثْنِي أَرشّْحنْ ڒْحُوكَّامْ، مَاشَا نشّْ وَارْ ث سِّينغْ. نِيثْنِي ڭِّينْ صَّانَامْ إِ يِيخفْ نْسنْ، س ؤُينِّي أَذْ إِتّْوَاقسّْ ڒْڭنْسْ. ‏5 أَينْذُوزْ نّكْ، أَ سَامَارْيَا، ذ ثَاعنْكْرِيفْثْ. أَغْضَابْ إِنُو يَارقّْ قِيبَاتْشْ نْسنْ. أَڒْ مڒْمِي غَا قِّيمنْ نِيثْنِي وَارْ زمَّارنْ أَذْ كْسِينْ ثَازْذُوڭِي؟    ‏6 مَاغَارْ إِفّغْ-د ڒخْيَاڒْ ن صَّانَامْ زِي إِسْرَائِيل، أَقَا إِجّْ ن بُو-صّنْعثْ إِڭَّا إِ-ث ؤُ وَانِيثَا وَارْ إِدْجِي ذ أَربِّي. وَاهْ، أَذْ إِوْضَا ذ إِوثْوِيثنْ، أَينْذُوزْ ن سَامَارْيَا.

‏7 مَاغَارْ نِيثْنِي زَارّْعنْ أَسمِّيضْ ؤُ مجَّارنْ ثَاحَارْيَاضْثْ. وَارْ تِّيفنْ ثِيذْرِينْ غَارْ إِغدُّوينْ، ؤُ زڭْ إِمنْذِي إِبدّنْ وَارْ زَّايْسنْ تّڭّنْ سّْمِيذْ، نِيغْ أَذْ إِتّْوَاڭّْ، مَاشَا أَذْ ث صَارْضنْ إِبَارَّانِييّنْ.

‏8 أَقَا إِسْرَائِيل إِتّْوَاصَارْضْ. ڒخُّو ذوْڒنْ أَمْ إِشْثْ ن ڒْقشْعثْ جَارْ ڒڭْنُوسْ، وَارْ د-ثُوسِي خْ ڒْخَاضَارْ إِ حذْ. ‏9 مَاغَارْ نِيثْنِي ڭعّْذنْ غَارْ أَشُّورْ. إِجّْ ن وغْيُوڒْ ن ڒخْڒَا إِتّْغِيمَا إِ يِيخفْ نّسْ وَاهَا، مَاشَا إِنِّي ن إِفْرَايِيمْ شَارَّانْ إِ إِمْحِيبَّانْ.

‏10 وَاخَّا نِيثْنِي زّنْزنْ إِخفْ نْسنْ إِ ڒڭْنُوسْ، مَاشَا ڭُّورْ ڒخُّو أَذْ ثنْ يَارْوغْ. نِيثْنِي زمَّارنْ أَذْ ڭّنْ مْغِيرْ ذْرُوسْ وَاهَا زِي سِّيبّثْ ن زّيَّارْ ن ؤُجدْجِيذْ ذ ڒْحُوكَّامْ.

‏11 مَاغَارْ إِفْرَايِيمْ إِڭَّا إِعَالْطَارنْ نّسْ ذ أَطَّاسْ حِيمَا أَذْ زَّايْسنْ إِدّنْبْ. أَقَا ذوْڒنْ ذ إِعَالْطَارنْ ن دّنْبْ إِ نتَّا.

‏12 نشّْ ؤُرِيغْ أَسنْ أَطَّاسْ ن ثْمسْڒَايِينْ زِي شَّارِيعَا إِنُو،¸ مَاشَا حسْبنْ خَاسنْثْ أَمْ شَا ن ڒْحَاجّثْ ذ ثَاغْرِيبْثْ.

‏13 خْ ضّْذَاقِي ن ثْغَارْصْثْ إِنُو، أَقَا نِيثْنِي وهّْبنْ أَيْسُومْ نْسنْثْ ؤُشَا تّتّنْ زَّايسْ، مَاشَا سِيذِي وَارْ زَّايْسنْ يَارطِّي. ڒخُّو أَذْ إِخَارّصْ ذِي ڒْمُوعْصِييّثْ نْسنْ ؤُ نتَّا أَذْ إِخدْجصْ دّْنُوبْ نْسنْ. أَذْ د-ذوْڒنْ غَارْ مِيصْرَا.

‏14 مَاغَارْ إِسْرَائِيل إِتُّو ونِّي ث إِڭِّينْ ؤُشَا إِبْنَا ثِيزَاوِييِّينْ ؤُشَا إِكتَّارْ يَاهُوذَا ثِيندَّامْ إِفَارْينْ، مَاشَا نشّْ أَذْ سّكّغْ إِشْثْ ن ثْمسِّي ذِي ثْندَّامْ نّسْ، أَذْ ثشّْ ڒقْصُورْ نّسْ.“