إِخَارِّيصنْ وَارْ زمَّارنْ أَذْ بضْڒنْ ڒْخذْمثْ
11
1 سكّْ أَغْرُومْ نّكْ ثِيوَا إِ وَامَانْ، مَاغَارْ أَوَارْنِي إِ أَطَّاسْ ن وُوسَّانْ أَذْ ث ثَافذْ عَاوذْ. 2 بْضَا ث ذِي سبْعَا، نِيغْ عَاذْ ذِي ثْمنْيَا، مَاغَارْ شكْ وَارْ ثسِّينذْ مَانْ ڒْغَارْ إِ غَا يِيڒِينْ ذِي ثمُّورْثْ. ▪ 3 مَاڒَا شُّورنْ إِسيْنُوثنْ، تّْزدْجَاعنْ أَنْژَارْ خْ ثمُّورْثْ. مَا ثَاشجَّارْثْ ثوْضَا غَارْ لْجَانُوبْ نِيغْ غَارْ شَّامَالْ، ذڭْ ومْشَانْ مَانِي ثوْضَا، ثتّْغِيمَا ذِينْ ثزّڒْ. ▫
4 ونِّي إِخزَّارنْ ڒبْذَا غَارْ ؤُسمِّيضْ، وَارْ ڭُّورْ أَذْ إِزَارْعْ، ونِّي إِحطَّانْ ڒبْذَا إِسيْنُوثنْ، وَارْ ڭُّورْ أَذْ إِمْجَارْ.
5 أَمْ مَامّشْ شكْ وَارْ ثسِّينذْ أَبْرِيذْ ن ؤُصمِّيضْ، أَمُّو إِ وَارْ ثسِّينذْ ؤُڒَا مَامّشْ تّْوَاڭّنْ إِيْسَانْ ذڭْ ؤُعذِّيسْ ن ثمْغَارْثْ س دّيْسثْ: أَمُّو إِ وَارْ ثسِّينذْ ثْمڭَّا ن أَربِّي ونِّي إِتّڭّنْ مَارَّا مِينْ إِدْجَانْ. ▪ 6 زَارْعْ زَّارِيعثْ نّكْ غَارْ ثُوفُّوثْ ؤُ وَارْ تّكّسْ أَفُوسْ نّكْ غَارْ ثْمذِّيثْ، مَاغَارْ شكْ وَارْ ثسِّينذْ مِينْ إِڭُّورنْ أَذْ إِفْڒحْ، ثَا نِيغْ ثَا، نِيغْ عَاذْ س ثْنَاينْ إِذْسنْثْ ڭُّورنْثْ أَذْ إِڒِينْثْ صبْحنْثْ.
سْفَارْحْ ذِي ثمْژِي نّكْ، مَاشَا سّنْ أَقَا ڒْحُوكْمْ ن أَربِّي أَذْ د-يَاسْ
7 ثَافَاوْثْ ذ ثْمِيژِيذْثْ ؤُ مْلِيحْ إِ ثِيطَّاوِينْ أَذْ ژَترنْثْ ثْفُوشْثْ. 8 وَاهْ، مَاڒَا أَرْيَازْ إِدَّارْ أَطَّاسْ ن إِسڭّْوُوسَا، أجّْ إِ-ث أَذْ إِفَارْحْ ذِي مَارَّا ثِينَا، ؤُ أجّْ إِ-ث أَذْ إِخَارّصْ ذڭْ ؤُسَّانْ إِبَارْشَاننْ، ؤُڒَا ذ نِيثْنِي ڭُّورْ أَذْ إِڒِينْ ذڭْ وَاطَّاسْ. مَارَّا مِينْ إِ ذ إِ غَا يَاسنْ، أَقَا-ث ذِي ڒْبَاطڒْ.
9 فَارْحْ، أَ شكْ أَحُوذْرِي، ذِي ثمْژِي نّكْ، سْفَارْحْ ؤُڒْ نّكْ ذڭْ وُوسَّانْ ن ثمْژِي نّكْ. ؤُيُورْ ذڭْ إِبْرِيذنْ ن وُوڒْ نّكْ ؤُ ذِي مِينْ تّْوَاڒَانْثْ ثِيطَّاوِينْ نّكْ، مَاشَا سّنْ أَقَا سِيذِي أَذْ شكْ إِسّكّْ خْ مَارَّا أَيَا إِ شّْرعْ.
10 سِيڭّْوجْ ڒْهمّْ خْ وُوڒْ نّكْ ؤُ سْحيّذْ ڒْغَارْ خْ أَرِّيمثْ نّكْ، مَاغَارْ ثمْژِي ذ ڒْوقْثْ س ؤُشوَّافْ أَبَارْشَانْ أَقَا أَثنْ ذِي ڒْبَاطڒْ.