إِزهِّيذنْ 149

‏1 هَالِّيلُو-يَاهْ! غنّْجمْ إِجّْ ن يزْڒِي ذ أَمَايْنُو إِ سِيذِي،

سْعُودْجمْ ث ذڭْ وڭْرَاوْ ن إِمْثِيقَّانْ نّسْ.

‏2 أَذْ إِفَارْحْ إِسْرَائِيل زڭْ ونِّي ث إِڭِّينْ،

أَذْ أَرْشْقنْ إِحنْجِيرنْ ن صِيهْيُونْ س ؤُجدْجِيذْ نْسنْ.   

‏3 أَذْ صبّْحنْ نِيثْنِي إِسمْ نّسْ س شّْضِيحْ س نُّوبْثَاثْ،

أَذْ أَسْ زهّْذنْ س ؤُبنْذِيرْ ذ ڒْڭَامْبْرِي،   

‏4 مَاغَارْ سِيذِي يَارْضَا خْ ڒْڭنْسْ نّسْ،

أَذْ يَاوِي شَّانْ إِ إِمْوَاضْعنْ س ونْجَامْ.

‏5 أَذْ سْڒِيوڒْونْ إِمْثِيقَّانْ س شَّانْ نِّي،

أجّْ إِ-ثنْ أَذْ سْغُويّنْ س ڒفْرَاحثْ زڭْ إِمُوشَانْ نْسنْ ن أَرَّاحثْ.

‏6 إِزْڒَانْ ن ؤُعُودْجِي إِ أَربِّي ذڭْ ؤُقمُّومْ نْسنْ

إِجّْ ن سِّيفْ إِقْضعْ س ثْنَاينْ ن وُوذْمَاونْ ذڭْ ؤُفُوسْ نْسنْ،   

‏7 حِيمَا أَذْ نْثَاقْمنْ زِي ڒڭْنُوسْ،

حِيمَا أَذْ عَاقْبنْ شُّوعُوبْ،

‏8 حِيمَا أَذْ شَارْفنْ إِجدْجِيذنْ نْسنْ س سّْنَاسڒْ،

أَيْثْ ن ثَاصِيڒثْ نْسنْ س سْنَاسڒْ ن وُوزَّاڒْ،   

‏9 حِيمَا أَذْ خَاسنْ ڭّنْ ڒْحُوكْمْ يُورَانْ.

ذ مَانْ أَيَا أَذْ ثِيڒِي ذ لْعَاضَامَا ن مَارَّا إِمْثِيقَّانْ نّسْ. هَالِّيلُو-يَاه.