إِزهِّيذنْ 146

‏1 هَالِّيلُو-يَاه. أَ ڒعْمَارْ إِنُو، صبّحْ إِ سِيذِي.

‏2 نشّْ أَذْ صبّْحغْ إِ سِيذِي مِينْ غَا كّغْ دَّارغْ،

أَذْ زهّْذغْ إِ أَربِّي إِنُو مِينْ ذَا غَا كّغْ عَاذْ.   

‏3 وَارْ تّْشَاڒْ خْ ثَارْوَا ن ثَاصِيڒثْ، خْ مِّيسْ ن بْنَاذمْ،

ونِّي ؤُمِي وَارْ غَارْ إِدْجِي بُو ؤُسنْجمْ.   

‏4 إِفّغْ بُوحْبڒْ نّسْ، إِذْوڒْ غَارْ ثمُّورْثْ.

ذڭْ وَاسّْ نِّي سِيمَانْثْ نّسْ أَذْ قْضَانْ إِنْوَاينْ نّسْ.

‏5 سّعْذْ ن ونِّي غَارْ إِدْجْ أَربِّي ن يَاعْقُوبْ ذ أَمْعَاونْ،

ونِّي إِتّْرَاجَانْ سِيذِي، أَربِّي نّسْ،

‏6 ونِّي إِڭِّينْ إِجنْوَانْ ذ ثمُّورْثْ، ڒبْحَارْ ذ مَارَّا مِينْ ذَايسْ،

ونِّي ذَايسْ ڒَامَانْ إِ ڒبْذَا،   

‏7 ونِّي إِتَّاغنْ ثَاسْغَارْثْ إِ ينِّي إِتّْوَاحصَّارنْ،

ونِّي إِتِّيشنْ أَغْرُومْ إِ ينِّي إِدْجُوژنْ.

سِيذِي يَارخُّو إِ إِمحْبَاسْ.

‏8 سِيذِي يَارزّمْ إِ إِذَارْغَاڒنْ ثِيطَّاوِينْ،

إِسّْبدَّا إِنِّي إِڭُّورنْ إِتّقْوِيسنْ،

سِيذِي إِتّخْسْ إِمْسڭَّاذنْ.   

‏9 سِيذِي إِحطَّا إِبَارَّانِييّنْ،

إِتِّيشْ أَفُوسْ إِ ؤُيُوجِيڒْ ذْ ثِيجَّاڒْ،

مَاشَا أَبْرِيذْ ن إِعفَّاننْ أَذْ ث إِسّْفَارْغْ.

‏10 سِيذِي أَذْ إِحْكمْ إِ ڒبْذَا،

أَربِّي نّكْ، أَ صِيهْيُونْ، إِحكّمْ زِي جِّيڒْ أَڒْ جِّيڒْ. هَالِّيلُو-يَاه.