إِزهِّيذنْ 116

‏1 نشّْ تّخْسغْ،

مَاغَارْ سِيذِي إِسْڒَا إِ ثْمِيجَّا إِنُو، أَحشّمْ إِنُو،

‏2 مَاغَارْ نتَّا إِوْشَا أَيِي أَمژُّوغْ نّسْ.

أَذْ أَسْ ڒَاغِيغْ مَارَّا ؤُسَّانْ ن ثُوذَارْثْ إِنُو.

‏3 إِسغْوَانْ ن ڒْموْثْ نّْضنْ أَيِي-د،

ثوْضَا-د خَافِي ثِيڭّْوُوذَا ن ڒَاخَارْثْ.

نشّْ ؤُفِيغْ أَقَا أَيِي تّْوَاحْصَارغْ ؤُ شضْنغْ.   

‏4 ڒَاغِيغْ خْ يِيسمْ ن سِيذِي، نِّيغْ:

”أَ سِيذِي، فكّْ ڒعْمَارْ إِنُو!“

‏5 سِيذِي ذ أَحْنِينْ ذ أَمْسڭّذْ،

أَربِّي نّغْ ذَايسْ ڒحْنُونشْثْ.

‏6 سِيذِي إِحطَّا ؤُڒَاونْ ن إِحَافِييّنْ.

نشّْ ثُوغَا أَيِي أَمْ ؤُنعْضَابْ، مَاشَا نتَّا إِسّنْجمْ أَيِي.

‏7 هْنَا عَاوذْ، أَ ڒعْمَارْ إِنُو،

مَاغَارْ سِيذِي إِڭَّا أَشْ مِينْ إِصبْحنْ.   

‏8 مَاغَارْ شكْ، أَ سِيذِي، ثحْضِيذْ ڒعْمَارْ إِنُو زِي ڒْموْثْ،

ثِيطَّاوِينْ إِنُو زڭْ إِمطَّاونْ، أَضَارْ إِنُو زڭْ ؤُنقْرَاضْ.

‏9 أَذْ ؤُيُورغْ زَّاثْ إِ وُوذمْ ن سِيذِي،

ذِي ثمُّورَا ن يِينِّي إِدَّارنْ.

‏10 نشّْ ؤُمْنغْ، س ؤُينِّي نِّيغْ:

”نشّْ تّْوَاحْصَارغْ أَطَّاسْ!“   

‏11 ذِي ثِيڭّْوُوذِي إِنُو نِّيغْ: ”مَارَّا إِوْذَانْ ذ أَيْثْ ن بُو-إِخَارِّيقنْ!“   

‏12 مَامّشْ إِ غَا خدْجْصغْ سِيذِي،

خْ مَارَّا ڒْخَارْ إِ ذ أَيِي إِڭَّا؟

‏13 أَذْ سّْڭعّْذغْ ڒْكَاسْ ن ؤُسنْجمْ أَمقّْرَانْ،

أَذْ ڒَاغِيغْ خْ يِيسمْ ن سِيذِي.

‏14 نشّْ أَذْ كمّْڒغْ لْوُوعُوذْ إِنُو إِ سِيذِي،

قِيبَاتْشْ إِ مَارَّا ڒْڭنْسْ نّسْ.

‏15 أَقَا إِغْڒَا ذِي ثِيطَّاوِينْ ن سِيذِي،

ڒْموْثْ ن إِمْثِيقَّانْ نّسْ.

‏16 أَ سِيذِي، أَقَا نشّْ ذ أَمْسخَّارْ نّكْ،

نّشْ ذ أَمْسخَّارْ نّكْ، مِّيسْ ن ثَايَّا نّكْ.

شكْ ثسَّارْخُوذْ خَافِي إِشذِّيينْ إِنُو.

‏17 نشّْ أَذْ شكْ د-أَوْيغْ ثَاوْهِيبْثْ ن ؤُقَاذِي،

أَذْ ڒَاغِيغْ خْ يِيسمْ ن سِيذِي.

‏18 نشّْ أَذْ سّْقفْڒغْ لْوُوعُوذْ إِنُو إِ سِيذِي،

قِيبَاتْشْ إِ مَارَّا ڒْڭنْسْ نّسْ.

‏19 ذِي ڒمْرَاحَاثْ ن ثَادَّارْثْ ن سِيذِي،

ذِي ڒْوسْثْ نّمْ، أَ ؤُرْشَالِيمْ! هَالِّيلُو-يَاه.