إِزهِّيذنْ 49

‏1 إِ ؤُمقّْرَانْ ن إِمغْنَاجنْ. زڭْ أَيْثْ ن قُورَاحْ. أَزهّذْ.

‏2 سْڒمْ إِ ؤُيَا، مَارَّا ڒڭْنُوسْ،

سْحسّمْ مَارَّا، أَ إِمزْذَاغْ ن ثمُّورْثْ،

‏3 أَمْ ثَارْوَا ن أَذَامْ، أَمْ ثَارْوَا ن إِجّْ ن ورْيَازْ،

أَيْثْبَابْ ن وَاڭْڒَا ذ إِمزْڒَاضْ جْمِيعْ أَكْ-ذ وَايَاوْيَا!

‏4 أَقمُّومْ إِنُو إِسَّاوَاڒْ ثِيغِيثْ،

إِخَارِّيصنْ ن وُوڒْ إِنُو شُّورنْ س ڒفْهَامثْ.

‏5 نشّْ أَذْ وْشغْ أَمزُّوغْ إِنُو إِ وَاوَاڒْ إِوزْننْ،

أَذْ سَّارْڭْبغْ ثْحَاجِيثْ إِنُو ن ثْوَافِيثْ غَارْ ثِيرَارْثْ ن ڒْڭَامْبْرِي.   

‏6 مَايمِّي إِ غَا ڭّْوذغْ ذڭْ وُوسَّانْ إِعفَّاننْ،

خْمِي د أَيِي ثتّنّضْ ڒْمُوعْصِييّثْ ن يِينِّي ذ أَيِي د-إِضفَّارنْ ذِي ثِيرِي إِنُو.   

‏7 أَقَا ذِينْ إِنِّي إِتّْشَاڒنْ خْ ڒكْسِيبثْ نْسنْ،

ؤُ تّْفيّْشنْ س وَاڭْڒَا نْسنْ أَمقّْرَانْ،

‏8 مَاشَا ؤُڒَا ذ إِجّْ ن ثَاوْمَاثْ وَارْ إِزمَّارْ أَذْ إِفْذِي إِجّْ ن ورْيَازْ،

وَارْ إِزمَّارْ أَذْ إِخدْجصْ تَّامَانْ ن وصْڒَاحْ ن يِيخفْ نّسْ إِ أَربِّي.   

‏9 ڒفْذِييّثْ ن ڒعْمَارْ نْسنْ ثِيغْڒَا أَطَّاسْ،

وَارْ د-ثتِّيسْ إِ ڒبْذَا،

‏10 حِيمَا نتَّا أَذْ إِدَّارْ إِ ڒبْذَا،

عمَّارْصْ وَارْ إِژَارّْ أَنْضڒْ.

‏11 مَاغَارْ إِتّْوَاڒَا إِمِيغِيسنْ مُّوثنْ،

مَاشَا أَپُوهَاڒِي ذ ؤُقفُّوحْ أَذْ تّْوَاقسّنْ س ثْنَاينْ،

أَذْ جّنْ ڒكْسِيبثْ نْسنْ إِ إِنّغْنِي أَوَارْنِي أَسنْ.

‏12 أَخَارّصْ ن وُوڒْ نْسنْ أَقَا ثُوذْرِينْ نْسنْ أَذْ قِّيمنْثْ إِ ڒبْذَا،

ثِيزذِّيغِينْ نْسنْ زِي جِّيڒْ أَڒْ جِّيڒْ.

وَاخَّا ؤُڒَا ذ ثِيمُّورَا ڭِّينْ أَسنْثْ إِسْمَاونْ نْسنْ.

‏13 بْنَاذمْ س مَارَّا شَّانْ نّسْ، وَارْ إِتّْغِيمِي شَا،

نتَّا يَارْوسْ ذِي ڒْمَاڒْ نِّي يڭُّورنْ غَارْ قطُّو.

‏14 وَا ذ أَبْرِيذْ إِ غَارْسنْ، مِينْ خفْ تّْسنَّاذنْ،

ؤُشَا إِنِّي ثنْ إِضفَّارنْ أَذْ جِّيوْننْ س ؤُقمُّومْ نْسنْ. سِيلَاهْ.   

‏15 أَمْ وُودْجِي سَّاريّْحنْ نِيثْنِي إِخفْ نْسنْ ذِي ڒَاخَارْثْ،

ڒْموْثْ أَذْ ثنْ ثَارْوسْ.

إِمْسڭَّاذنْ أَذْ خَاسنْ حكْمنْ خْ ضّْبحْ،

ؤُشَا أَدُّوذْ نْسنْ أَذْ إِذْوڒْ إِ ڒْغشّْ ذِي ڒَاخَارْثْ،

تّْوَاسُّوفّْغنْ نِيثْنِي زِي ثْزذِّيغْثْ نّسْ.   

‏16 مَاشَا أَربِّي أَذْ إِفْذِي ڒعْمَارْ إِنُو زڭْ ؤُفُوسْ ن ڒَاخَارْثْ،

مَاغَارْ نتَّا أَذْ أَيِي يَاوِي أَكِيسْ. سِيلَاهْ.   

‏17 وَارْ تّڭّْوذْ شَا مَاڒَا شَا ن ورْيَازْ إِذْوڒْ ذ بُو-وَاڭْڒَا،

مَاڒَا أَشُووَّارْ ن ثَادَّارْثْ نّسْ يَارْنِي،

‏18 مَاغَارْ ذِي ڒْموْثْ نّسْ وَارْ أَكِيذسْ إِكسِّي شَا مَارَّا أَيَا،

أَشُووَّارْ نّسْ وَارْ إِهكّْوِي أَكِيذسْ أَوَارْنِي أَسْ.

‏19 وَاخَّا إِتّْوَابَاركْ ڒعْمَارْ نّسْ ذِي ثُوذَارْثْ نّسْ،

وَاخَّا نِيثْنِي أَذْ شكْ سّمْغَارنْ مَاغَارْ ثڭِّيذْ مِينْ إِصبْحنْ إِ يِيخفْ نّكْ،

‏20 أَقَا أَذْ د-يَاوضْ ڒعْمَارْ نّسْ غَارْ جِّيڒْ ن ڒجْذُوذْ نّسْ،

نِّي وَارْ ژَترّنْ ثَافَاوْثْ إِ ڒبْذَا.

‏21 بْنَاذمْ س ثشْرِيمْثْ، مَاشَا وَارْ إِفهّمْ،

نتَّا أَمْ ڒبْهِيمثْ إِفنَّانْ.