إِزهِّيذنْ 47

‏1 إِ ؤُمقّْرَانْ ن إِمغْنَاجنْ. زڭْ أَيْثْ ن قُورَاحْ. أَزهّذْ.

‏2 أَ مَارَّا ڒڭْنُوسْ، وْثمْ ذڭْ إِفَاسّنْ،

سْغُويّمْ إِ أَربِّي س ؤُسْڒِيوْڒوْ إِجهْذنْ.

‏3 مَاغَارْ سِيذِي، أَمْعُودْجِي خْ كُوڒْشِي، أَقَا إِسَّاڭّْوَاذْ،

نتَّا ذ إِجّْ ن ؤُجدْجِيذْ ذ أَمقّْرَانْ خْ مَارَّا ثَامُّورْثْ.

‏4 نتَّا إِسَّاضَارَا أَنغْ-د ڒڭْنُوسْ،

نتَّا يَارَّا شُّوعُوبْ سَاذُو إِضَارنْ نّغْ.

‏5 نتَّا إِفَارّزْ ثَاسْغَارْثْ نّغْ ن ثمُّورْثْ إِ نشِّينْ،

ثنِّي ذ أَفيّشْ ن يَاعْقُوبْ ونِّي ثُوغَا إِتّخْسْ. سِيلَاهْ.

‏6 أَربِّي يُوڒِي سنّجْ س ؤُسْڒِيوْڒوْ،

سِيذِي، غَارْ ثْمِيجَّا ن ؤُصُوضِي ذڭْ ؤُيِيشّْ ن إِشَارِّي.

‏7 زهّْذمْ إِ أَربِّي، زهّْذمْ!

زهّْذمْ إِ ؤُجدْجِيذْ، زهّْذمْ!

‏8 مَاغَارْ أَربِّي ذ أَجدْجِيذْ خْ مَارَّا ثَامُّورْثْ.

زهّْذمْ أَيَا إِ ؤُخمِّي ذَايسْ.

‏9 أَربِّي إِحكّمْ خْ ڒڭْنُوسْ،

أَربِّي إِتّْغِيمَا خْ ڒْعَارْشْ نّسْ إِقدّْسنْ.

‏10 ثَارْوَا ن ثَاصِيڒثْ نْ ڒڭْنُوسْ تّْوَاسْمُوننْ غَارْ ڒْڭنْسْ ن أَربِّي ن إِبْرَاهِيمْ،

مَاغَارْ ثِيسدَّارِييّنْ إِ ؤُسڒْقِي ن ثمُّورْثْ إِ أَربِّي.

نتَّا أَقَا إِتّْوَاسّْعُودْجْ قَاعْ.