إِزهِّيذنْ 29

‏1 أَزهّذْ ن ذَاوُوذْ.

وْشمْ إِ سِيذِي، أَرَّاوْ ن أَربِّي،

وْشمْ إِ سِيذِي أَعُودْجِي ذ ثْزمَّارْ.   

‏2 وْشمْ إِ سِيذِي أَعُودْجِي ن يِيسمْ نّسْ،

سجْذمْ إِ سِيذِي س ؤُشوَّارْ إِقدّْسنْ.

‏3 ثْمِيجَّا ن سِيذِي ثدَّارْضحْ ثِيوَا إِ وَامَانْ،

أَربِّي ن ؤُعُودْجِي إِسّْهمْهمْ،

سِيذِي، خْ وَامَانْ أَطَّاسْ.   

‏4 ثْمِيجَّا ن سِيذِي ثشُّورْ س جّهْذْ،

ثْمِيجَّا ن سِيذِي ثشُّورْ س ڒْعزّْ.

‏5 ثْمِيجَّا ن سِيذِي ثتَّارژَّا ثِيشجِّيرَا ن ثْنڭْلِينْ،

سِيذِي إِتَّارژَّا ثِينڭْلِينْ ن لُوبْنَانْ.

‏6 يَارَّا إِ-ثنْ أَذْ نڭْزنْ أَمشْنَاوْ أَينْذُوزْ،

أَذْرَارْ ن لُوبْنَانْ ذ وذْرَارْ ن سِيرْيُونْ أَمشْنَاوْ أَمژْيَانْ ن ؤُفُونَاسْ ن ڒخْڒَا.   

‏7 ثْمِيجَّا ن سِيذِي ثْنقّشْ إِشعَّاڒنْ ن ثْمسِّي.

‏8 ثْمِيجَّا ن سِيذِي ثَارَّا ڒخْڒَا إِتَّارْجِيجِي،

سِيذِي يَارَّا ڒخْڒَا ن قَاذَاشْ إِتَّارْجِيجِي.

‏9 ثْمِيجَّا ن سِيذِي ثَارَّا ثُوذَاذِينْ تَّارْونْثْ،

نتَّا إِتّْعَارَّا إِزغْرَانْ،

مَاشَا ذِي زَّاوشْثْ نّسْ ثَامقّْرَانْثْ مَارَّا ثسَّاوَاڒْ خْ ؤُعُودْجِي نّسْ.

‏10 سِيذِي ثُوغَا إِتّْغِيمَا أَمْ ڒْقَاضِي غَارْ سّحْڒثْ ن وَامَانْ،

سِيذِي إِتّْغِيمَا أَمْ ؤُجدْجِيذْ إِ ڒبْذَا.   

‏11 سِيذِي أَذْ إِوْشْ جّهْذْ إِ ڒْڭنْسْ نّسْ،

سِيذِي أَذْ إِبَاركْ ڒْڭنْسْ نّسْ س ڒهْنَا.