إِزهِّيذنْ 8

‏1 إِ ؤُمقّْرَانْ ن إِمغْنَاجنْ، س ثغْنِينْثْ ن ؤُجِيتِّي. أَزهّذْ ن ذَاوُوذْ.

‏2 أَ سِيذِي، أَربِّي نّغْ، مَامّشْ إِجْهذْ يِيسمْ نّكْ خْ مَارَّا ثَامُّورْثْ،

شكْ ذ ونِّي إِڭِّينْ لْعَاضَامَا نّكْ سنّجْ إِ إِجنْوَانْ.

‏3 زڭْ ؤُقمُّومْ ن إِحنْجِيرنْ ذ إِسيْمَانْ،

ثڭِّيذْ لْبَارَاجْ خْ ينِّي شكْ إِحصَّارنْ،

حِيمَا أَذْ ثْبلّْعذْ أَبْرِيذْ خْ ڒعْذُو ؤُ خْ ونِّي يَارزُّونْ أَذْ إِخْڒفْ.   

‏4 مَاڒَا ثْوَاڒِيغْ أَجنَّا، ڒْخذْمثْ ن إِضوْضَانْ نّكْ،

ثَازِيرِي ذ يثْرَانْ، إِنِّي ثڭِّيذْ،

‏5 مِينْ إِعْنَا خنِّي بْنَاذمْ، أَقَا شكْ ثْخَارّْصذْ ذَايسْ،

مِّيسْ ن بْنَاذمْ، أَقَا شكْ ثْخزَّارذْ غَارسْ؟   

‏6 شكْ ثَارِّيذْ ث مْغِيرْ شْوَايْثْ وَاهَا قلّْ إِ أَربِّي،

ثوْشِيذْ أَسْ تَّاجْ ن ؤُعُودْجِي ذ ڒْعزّْ.

‏7 شكْ ثَارِّيذْ ث أَذْ إِحْكمْ خْ ثْمڭَّا ن إِفَاسّنْ نّكْ،

ثسَّارْسذْ مَارَّا سْوَادَّايْ إِ إِضَارنْ نّسْ:   

‏8 ؤُدْجِي ذ إِفُونَاسنْ، مَارَّا إِنَا،

ؤُڒَا ذ ڒْمَاڒْ ن ييَّارْ،

‏9 إِجْضَاضْ ن ؤُجنَّا ذ إِسڒْمَانْ ن ڒبْحَارْ،

مَارَّا مِينْ إِتّْشُوقَانْ إِبْرِيذنْ ن ڒبْحُورْ.

‏10 أَ سِيذِي، سِيذِيثْنغْ،

مَامّشْ إِجْهذْ يِيسمْ نّكْ ذِي مَارَّا ثَامُّورْثْ!