أَيُوبْ 18

ڒْحَارْضْ وِيسّْ ثْنَاينْ ن بِيلْذَاذْ: أَنڭَّارُو ن بْنَاذمْ ذ أَعفَّانْ

‏1 خَاسْ ؤُشَا يَارَّا-د بِيلْذَاذْ، ونِّي د-يُوسِينْ زِي شُوحَا، إِنَّا:

‏2 أَڒْ مڒْمِي عَاذْ ثَارزُّومْ أَذْ ثڭّمْ ثِيخشْفِينْ إِ وَاوَاڒنْ ن بْنَاذمْ؟

مَاڒَا ثْفهْممْ، خنِّي أَوَارْنِي إِ ؤُيَا أَذْ نسِّيوڒْ.

‏3 مَايمِّي إِ ذ أَنغْ إِتّْوَاڭّْ أَمْ ڒْمَاڒْ،

ؤُ نتّْوَاحْصَارْ ذِي بُوحْبڒْ ذِي ثِيطَّاوِينْ نْومْ؟

‏4 شكْ، أَ يَارْيَازْ ونِّي إِتّْمزّْقنْ إِخفْ نّسْ ذڭْ ؤُخيّقْ نّسْ!

مَا أَذْ جّنْ ثمُّورْثْ ذِي سِّيبّثْ نّكْ،

ؤُ أَذْ إِتّْوَاسْمُوطِّي جَّارْفْ زڭْ ومْشَانْ نّسْ؟     

‏5 وَاهْ، ثَافَاوْثْ ن إِعفَّاننْ أَذْ ثخْسِي،

ؤُ أَشعَّاڒْ ن ثْمسِّي نّسْ وَارْ إِتّڭّْ ثَافَاوْثْ عمَّارْصْ عَاذْ.

‏6 ثَافَاوْثْ ذِي ثْقِيذُونْثْ نّسْ أَذْ ثبَّارْشنْ،

ڒفْنَارْ نّسْ ثِيوَا نّسْ أَذْ ث سّْخسْينْ.

‏7 تَّارْجِيجنْ إِصُورَافْ نّسْ إِجهْذنْ،

شّْوَارْ ن يِيخفْ نّسْ أَذْ ث إِغْضڒْ.

‏8 مَاغَارْ س إِضَارنْ نّسْ أَذْ إِنَّاغْ ذڭْ ؤُصنَّاجْ،

أَذْ يُويُورْ خْ ثْرَاشَّا، مُّوذنْ ت إِ ثْنيْمَارْثْ.

‏9 ڒْفخْ أَذْ ث إِمْنعْ زڭْ ؤُنِيرْزْ،

ثَاسْغُونْثْ ن ثْجيَّافْثْ ثطّفْ ذَايسْ.   

‏10 ثنُّوفَّارْ ثسْغُونْثْ ن ثخْشفْثْ نّسْ ذِي ثمُّورْثْ،

ثَاخْشفْثْ نّسْ أَقَا-ت خْ وبْرِيذْ.

‏11 سِّيڭّْوذنْ ث إِنخْڒِيعنْ زِي مَارَّا إِغزْذِيسنْ،

ضفَّارنْ ث غَارْ إِضَارنْ نّسْ.   

‏12 إِزُّودْجْ ذَايسْ،

أَضيّعْ إِتّْرَاجَا إِ-ث غَارْ ؤُغزْذِيسْ نّسْ.   

‏13 أَرْژِييّثْ أَذْ ثشّْ مَارَّا إِغزْذِيسنْ ن أَرِّيمثْ نّسْ،

ؤُ إِغزْذِيسنْ ن أَرِّيمثْ نّسْ أَذْ ثنْ يشّْ إِجّْ ن ڒحْڒَاشْ إِنقّنْ أَڒْ طَّارْفْ.

‏14 مِينْخفْ ثُوغَا إِتّْشڒْ، إِتّْوَاقْڒعْ-د زِي ثْقِيضُونْثْ نّسْ.

ثْندّهْ إِ-ث أَرْژِييّثْ غَارْ ؤُجدْجِيذْ ن إِنخْڒِيعنْ.   

‏15 إِوْذَانْ نِّي وَارْ دْجِينْ ذ ينِّي نّسْ، زدّْغنْ ذڭْ ؤُقِيضُونْ نّسْ،

ڒشْبَارِييّثْ ثتّْوَازُوزَّارْ خْ ثْزذِّيغْثْ نّسْ.

‏16 زِي سْوَادَّايْ تَّاژْغنْ إِژوْرَانْ نّسْ،

زِي سنّجْ تّْوَاقسّنْ ڒفْرُوعْ نّسْ.

‏17 ڒِيذَارثْ نّسْ أَذْ ثتّْوَاكّسْ زِي ثمُّورْثْ،

وَارْ ذ أَسْ إِتّْغِيمِي عَاذْ إِسمْ ذڭْ وبْرِيذنْ.   

‏18 أَذْ ث عَارْننْ زِي ثْفَاوْثْ غَارْ ثَادْجسْثْ،

أَذْ سّْثوّْجنْ زِي دُّونشْثْ.   

‏19 وَارْ غَارسْ إِتِّيڒِي وَارَّاوْ نِيغْ جَّاذِيرَا ذِي ڒْڭنْسْ نّسْ،

وَارْ إِتّْغِيمِي ؤُڒَا ذ إِجّْ ذِي ثْزذِّيغِينْ نّسْ.   

‏20 خْ وَاسّْ نّسْ أَذْ أَرْجِيجنْ إِنِّي إِزدّْغنْ غَارْ مَانِي ثْغدْجِي ثْفُوشْثْ،

إِنِّي إِزدّْغنْ غَارْ مَانِيسْ إِ د-ثْنقَّارْ ثْفُوشْثْ أَذْ ثنْ ثطّفْ ثِيڭّْوُوذِي.

‏21 وَاهْ، أَمُّو إِ ثتّمْسَارْ إِ ثْزذِّيغِينْ ن إِمقْجَاحنْ،

وَا ذ أَمْشَانْ ن يِينِّي وَارْ إِسِّيننْ أَربِّي.